ZAKARI 4 - Boy Lonana

Dlara tak taɗ ki a vadlara, va tin pindilla kamma u conora

¹ Sa sunda huulona ma ɓak u anna hoŋ ay dliɗin kolo ko ndal dliɗ sana kolo hu senara na.

² Nam joɓon ana, «Aŋ wi ni mege?» An hoŋom dira ana, «Tlena tak tasi irinu, ni va ma tin pindilla kamma tam ki u lorra halaŋ, li ma vo mbulna hu umba kaŋgara may, yamba kolora pindilla ka hu kiɗisiya u gogor kom ma tuɗ mbulna ha hu pindillana kiɗisiya may.

³ Ŋgusu conora coli keŋem mba', ma dew coli eg li ma vo mbulna kay ɓik gulu may, ma hiŋŋa kay ɓik njuf may.»

⁴ An hin hoŋ joɓ sa sunda huulona ma ɓak u anna ana, «Va namma ni mege malanna?»

⁵ Sa sunda huulona ma ɓak u anna hoŋon dira ana, «Aŋ ka wi doli va nammaɗi su?» An hoŋom dira ana, «Ҥawaa, malanna.»

^6a Nam hoŋon dira ana,

^10b «Pindilla kiɗisiyara ni ii Yawe, asi ka gol sun mayra laɗ kay yam ndaŋgara ki ni halaŋ halaŋ.»

¹¹ An hoŋom dira joɓom ana, «Ŋgusu conora coli eg va vo mbul pindilla ɓik njuf may, ɓik gul mayna ni mege?»

¹² An hoŋom dira a yanda mbara joɓom ana, «Ko ŋgusu conora ma mba' ma tuɗ mbulna ha hu pindilla tam ko lorra nana ni me mayge?»

¹³ Nam dan ana, «Aŋ ka wi doli tlesuu asi varak balamasinaɗi su?» An hoŋom dira ana, «Ҥawaa, malanna.»

¹⁴ Nam dan ɗaŋŋi ana, «Ni suu wara suu mba' suu ŋgaɓasi ki a li sun mbulnana, suu col fok malaŋ ndaŋgarana halaŋ halaŋŋa.»

Di boyna maŋ Zorobabel irim hindi

^6b Boyna vi Yawe ma ɓakam kay Zorobabelna ni ko wanda na, Ka ni u ɦiŋgaɗi lay, ka u saɓakŋaɗi lay, ni u Musuk manda, Yawe, ma Saɓakŋa Kom Belna, di na.

⁷ Ndak li ay jew ni mege, ndak ɦinira ŋgolla? Fok Zorobabel ndak mbuɗ ki ni lii mbassa, ni hu li namma tli ɦinira ŋgolla ay ki u yira yi kolo kaɗ u saɓakam kaɗta.

⁸ Yawe ɓakan boy mamma ni ko wanda na,

⁹ Zorobabel gi u zi ndaɗta kaŋga u kommi namu, kom hin daɓaɗ sunuɗ ki ni nam lay, agi hin wi ki ana Yawe, ma Saɓakŋa Kom Belna, sunun ay egegi ni namu.

^10a Ka gol sun mayra laɗ jew ewra coɗi. Sa ma ka min buu ma jivi ma ay jewnaɗina ni gege? Laygi furira hu li ma aygi wi gogoyra ŋgaɓaɗta vira ko Zorobabelna.