ZAKARI 3 - Boy Lonana

Dlara tak taɗ ki a fiɗirara, mul ŋgol ma li ɓivunna Josuwe

¹ Yawe takan mul ŋgol ma li ɓivunna, Josuwe, coli fok sa sunda vi Yawe. Satanna may ni coli kay bikim ma njufna a kaam boyna egemba.

² Sa sunda vi Yawe di Satanna ana, «Ko Yawe seŋeŋ vunuŋ kiyo, Satan. Gasi ko Yawe seŋeŋ vunuŋ kiyo, nam ma ŋgaɓ Yerusalem kina. Kay sa namma ni ko vun gu ma tlam ay ki duk kurana naɗi su?»

³ Josuwe coli fok sa sunda u baraw ma zodina egemu.

⁴ Sa sunda huulona hoŋ dira maŋ suu coli fokomma ana, «Fokom barawi suu zozod suu egemma kiyo.» Nam hin di Josuwe ana, «Gola an yowoŋ cooŋga ki wa, hin cukuŋ egeŋŋi baraw ma luuna.»

⁵ Nam hoŋ dira ana, «Asi ɗuɗum kay yammi baraw ma ki mbusina.» Asi ɗuɗum baraw ma mbusina kay yam may, cukum barawna egem may. Nam sa sunda vi Yawe coli egesi may.

⁶ Na ɗaŋŋi sa sunda vi Yawe di Josuwe anaba,

⁷ «Yawe, ma Saɓakŋa Kom Belna, di ana, Lini aŋ tuɗ hu voɗ manda, lini aŋ li u gaɗ manda, aŋ taŋga hin ti mulla kay ziinna aŋ hin golon huu taraŋ ziinna, an hin kakaŋ ki duk suu ki coli tani wanna.»

Lona hin hoŋ saam ma sunda aya

⁸ Hum haa, Josuwe, mul ŋgol ma li ɓivunna, aŋ u ndaryaŋ suu ka moli fokoŋŋa, suu asina ni va ma takka, An ka hoŋ saan ma sunda aya ma yam ana, gogor guna na.

⁹ Gasi gologi gogoyra an haɗ maŋ Josuwe wanna. Iira tini kay gogoy ta dew ndaɗta na kiɗisiya. An tanda hin tiniɗ ndalaɗu. Yawe, ma Saɓakŋa Kom Belna, di na, an hin bulum suluk ma hu mbas ndaɗtana ki hu buu ma dewna.

¹⁰ Yawe, ma Saɓakŋa Kom Belna, di ana, hu buu namma ni agi hin yagi tagi ay na zeɗ zeɗ u ŋgusu gugutlura, u ŋgusu tulumma.