ZAKARI 2 - Boy Lonana

Dlara tak taɗ a mbarara, mekka u suu dli caffa

¹ An tli irin kolo na ni an wi tlena, tlege asina ni mekka fiɗi.

² An joɓ sa sunda huulona ma ɓak u ana ɗaŋŋi ana, «Tle asina ni mege?» Nam hoŋon dira ana, «Ni mek mayra njay suu Yudana, suu Israelna u suu Yerusalemma kira.»

³ Yawe hin takan suu dli caffa fiɗi olo.

⁴ An joɓ ɗaŋŋi ana, «Suu asina mbay a li ni mege?» Nam hoŋon dira ana, «Mekka ni mek mayra njay suu Yudana ki sa dew lay ka tli yam koloɗira. Suu dli caffa mba ni kay a mbuɗusi ndaanara, a kus mek suu asina kira, suu yow mekesi kolo kasi kay mbassa Yudara a njayaɗ kira.»

Dlara tak taɗ ki a hindirara, zew ma ŋgara

⁵ An tli irin kolo na ni, an wi tlena. Sana u zew ma ŋgara kom viiya.

⁶ An joɓom ana, «Aŋ tuɗ arage?» Nam hoŋon dira ana, «Ŋga fiyek Yerusalem, a waɗ fiyekeɗ ki may bubuuɗ ki may.»

⁷ Gola wani sa sunda huulona, ma ɓak u anna ɦuɗ tam ha ki may. Sa sunda huulona ma daŋŋa ka tuɗ ay ŋgafam may.

⁸ Nam dam ana, «Liŋa, ɓak ha maŋ goozoŋ ma ha wanna dam ana, Yerusalem hin hinni a ɦoŋzi ma ki malina, kay suu bolowna u mbuuri suu bolow suu ka huruɗna.

⁹ Yawe di ana, an tanda may ni an hin kakŋi huwa. An hin li kaɗ ni ko ndal gulumun maɗna na u kura, an hin li a saɓak ma huruɗna ni anu.»

Yawe hoŋ suu mbee kina ay yira

¹⁰ Tuɗuygiya, tuɗuygiya, Yawe di ana, coloygi zak hiniygi mbassa mbayawra kiyo. Yawe di ana ni hu keŋ li ma fiɗi ma semeɗna sii hu hulona ma an njayagi ki hurumma.

¹¹ Tuɗuygiya, Siyon, pii kiyo, ndak mayra ha ki kaki hu Babilonda.

¹² Yawe, ma Saɓakŋa Kom Belna, ma sunun ay u saɓakŋa kay suu ɦurumugi kina, ɓak ana, gasi sa ŋgenegina, ŋgenenni wawal irinu.

¹³ Gasi an wanna, an hin tli kon kolo kasiya, a suu mborɓii masisina ɦurumusi ki may, agi hin wi ki gasi ana Yawe, ma Saɓakŋa Kom Belna, sunun ay ni namu.

¹⁴ Yi kolo u delekka furira, li furira goora vi Siyonda, an wanni, an tuɗ kakŋi vo varaku. Yawe di na.

¹⁵ Suuna hin taɓ tasi u Yawe bolow coco hu buu namma. Asi hin mbuɗ ni suu mansina, an hin kakŋi vo varaku, ndak hin wi ana Yawe, ma Saɓakŋa Kom Belna, sunun ay egekŋi namu.

¹⁶ Yawe hin tli Yuda kiyo, ko ndal va jona kay ndaŋgara teteɗta na, nam hin ŋgaɓ Yerusalem daŋgadla olo.

¹⁷ Tlena halaŋ seŋegi fok Yawe, nam dliɗ ki wa, ka kal ay ki hu ziim ma teteɗna.