ZAKARI 14 - Boy Lonana

Yara daɓ daganda u mbara Yawe hin mbara

¹ Gola, Buu ma vi Yawena ka mbaa, irigi na gokgok suuna hin ɓorow jona ki vo varagi, Yerusalem.

² An hin tok suu eg Yerusalem tok tokŋa a col duuna. Hin tli ɦoŋzina, hin to ziginina ki kaŋga may, ɓeŋ boyogina ki may, ŋgol suuna hin tuɗ ki mbaɓura, na may usira hinda hin ka casi ki ɦoŋzina oloɗi.

³ Na ɗaŋŋi Yawe hin yow suuna ay um duu u suu asina hu buu ma asi ci tasina, hu buu ma yara.

⁴ Hu buu namma nam hin col sem kay ɦinira Conora mayra vok taɗ u Yerusalem u maɗiinara. Ҥinira Conora hin wak ki duk ay u maɗiina ta ta fiɗigina, mbuɗ ki ɦuɗugum ŋgolla. Keŋ ɦinira maa dew hin ɦuɗ ha ki dali may, koɗ ma hiŋŋa hin ɦuɗ ha ki mbayaw may.

⁵ Agi hin pii ki hu ɦuɗugum ndaɗta, kay ana ɦuɗugum ɦinira hin tew ha ki hu Azal. Agi hin pii ko agi pii ki hu cokira ndaŋgara dlak hu li ma Oziyas a mulna hu Yudara na. Olo, Yawe, Loonna, hin mbay u suu mam suu teteɗna umu.

⁶ Hu buu namma ni kiɗikka hin ka li oloɗi lay. Semeɗna u dlammagina hin ka ci sa oloɗi lay.

⁷ Buu namma hin li ni dew, Yawe wamu. Faalira hin ka liɗi lay. Njeŋgera hin ka liɗi lay. May lina tew fiɗigi wa ni kiɗikka hin weleɗa.

⁸ Hu buu namma ni mbo ma heɓma hin baɗ hu Yerusalem, keŋ ɦiw tuɗ hu mbo lum ma ŋgolna maɗiina, keŋ ɦiw tuɗ hu mbo lum ma ŋgolna fiɗigina may. Hin li ko ndaɗta na hu til faɗta lay, hu ndolla lay.

⁹ Na ɗaŋŋi Yawe hin tak tam ki a mul ma kay ndaŋgara halaŋŋa. Hu buu namma wanni Yawe li ni dew, sem dew may.

¹⁰ Mbassa halaŋ hin mbuɗ ki senena, col ha kay Gueba ta ta tew hu Rimmon keŋ Yerusalem mbayawna. Ndaɗ hin mbuɗ ki kolo ŋgolla, eg liiɗu, col ha vun grek ma vi Benjaminna ta ta tew ha ki hu li ma vun grek ma basina ta ta tew ha ki hu vun grek ma keŋŋa, col ay eg gulumun ma vi Hananeelna ta ta tew ha ki hu li ma em tlena vi mulna na.

¹¹ Asi hin kak huwa, dla co hin ka li oloɗi, Yerusalem hin kak u heɓpa.

¹² Gola, ni dla co mayra Yawe hin poŋ suu duu u Yerusalemma u ndaɗta. Nam hin cimisi kiyo, na ɗaŋŋi gegelay hin li colira ni kay semu, zozoy irisi hin cim ki hu zuluɗu, sinisi hin cim ki funusiya.

¹³ Hu buu namma ni Yawe hin gasi dlara ŋgolla kasi mbuɗusi ki ndaana cocoo. Gegelay hin kaw ndaramma komu, asi hin njogoɗ tasiya.

¹⁴ Yuda hin taɓ ki ko taɗ u Yerusalem a duuna. Na ɗaŋŋi begera vi suu keŋesinara halaŋ hin tokoɗ ki eg taɗu. Lorra may, doonora may, barawi na may, tlena ŋgol cocoo.

¹⁵ Dla cora ko ndaɗta nara hin mba kay kulumina, kay jamballa, kay koro ma Makkana, kay mburi suu vi suu babali masisina halaŋ, dla ndaɗta hin li kasi ni na may.

¹⁶ Na ɗaŋŋi suu may suu hin iiri duu u Yerusalemma hin yow ay kolo basara tew tew a goɓ kaŋga fok mulna, Yawe, ma Saɓakŋa Kom Belna, a hin li luu ma vi mbutluɓmana.

¹⁷ Na may, suu may suu tuɗ ka Yerusalem u suu masisina a goɓ kaŋga fok mulna, Yawe, ma Saɓakŋa Kom Belna ɗina, Lona hin ka si varasiɗi.

¹⁸ Lini suu Egiptena tuɗ kaɗi ni, na ɗaŋŋi dla cora Yawe poŋ suu mba ka a li luu ma vi mbutluɓma ɗina hin ka ndi kasiɗi su?

¹⁹ Egipte hin fi waɗta ni na, suu mba ka a li luu ma vi mbutluɓmaɗina hin fi waɗta ni na lay.

²⁰ Hu buu namma ni geeleŋga kel kuluminara hin ɓiiriɗ tlena egeɗ ana, «Hin ki ni maŋ Yawe». Doyogina hu zira vi Yawera hin li ni ko ndal tassa ma yam busuna tinira fun givin ma togolla na.

²¹ Doyogi suu hu Yerusalemma u suu hu Yudana halaŋ hin hinisi ki maŋ Yawe, ma Saɓakŋa Kom Belna. Suu hin mbay a li ɓivunnana halaŋ hin li sunda u asi a zal tlegeyesi suu ɓivunna. Suu paara hin ka li hu zira vi Yawe, ma saɓakŋa kom belna, hu buu namma oloɗi.