ZAKARI 13 - Boy Lonana

¹ Hu buu namma ni mbona hin ɓaɗ hu ziŋ Davidna, suu Yerusalemma a fi kumuna kay sulukŋa u dla cora.

Lona hin bulum fulina ki may, suu jok vun lona suu cona ki may

² Yawe, ma Saɓakŋa Kom Belna, di ana, hu buu namma ni dlara hin liya. An hin bulum sem fulina ki hu mbassa. Sa hin ka ɓak kasi oloɗi. An hin bulum suu jok vun Lona suu cona ki hu mbassa u ŋgus masira cora.

³ Na ɗaŋŋi li ni sana tuɗ fok u boy ma dira, jokom ha ki may ni, bum u sum hin dam ana, «Aŋ kak iiri oloɗi. Aŋ njaɗ ni dlara kaboyna u sem Yawe.» Na ɗaŋŋi bum u sum hin cokomu hu li ma nam jok boyna ki tuna.

⁴ Hu buu namma ni gegelay ma jok vun Lona hin mbuɗ ki zolona kay sun mamba hu li ma nam jok vun Lona tuna, nam hin ka cuk barawra taɗ tlimiɗta a mbaɗ suuna oloɗi.

⁵ Nam hin tin vunum di ana, «An ka sa jok vun lonaɗi, an ni sa horokŋa. An ndaŋga manda ay konni u goo tan day.»

⁶ Na ɗaŋŋi asi hin joɓom ana, «Mbil ma gu dikiŋ wanna ni me laŋge?» Nam hin hoŋ dira ana, «An fi mbil namma ay ni hu ziŋ banayannara.»

Banara mbuɗuɗ wilira

⁷ Ŋgewra col ki kolo kay saan ma taa yoona, kay sa tuɗ u an ma jivi cocona, Yawe, ma Saɓakŋa Kom Belna, di na. Waɗ sa taa yoona, timigiina hin njay kiyo, kon hin hoŋ waɗ suu gorina lay.

⁸ Yawe di ana, «Ki hu mbassa halaŋ ŋgol suuna hin miɗ kiyo, suu ɦiw hin hin may.»

⁹ Suu hin asina an tukusi u kura. An hin yoorosi ki ko suuna yoo doonora na, an hin yoorosi ki ko suuna yoo lorra na. Asi hin yan sen may, an hin humusi may. An hin di ana, «Ni suu mansina.» Asi hin di ana, «Loonna ni Yawe.»