ZAKARI 12 - Boy Lonana

Li ma kakka u buɗta buɗ Yerusalem kira

¹ Di boyna. Yawe ɓak Israel. Yawe ma li huulona, li ndaŋgara, li ŋgussa hu suuna layna di ana,

² An hin mbuɗ Yerusalem ki ko va ma oy u yaandana kay suu keŋeɗna halaŋ. Dla ndaɗta hin li ki eg Yuda hu li ma suu mba a duu u Yerusalemma.

³ Gasi, hu buu namma wanni an hin tin Yerusalem ki fok suuna halaŋ ko ndal gogoyra sa ka ndak a tlaɗ ki koloɗira na. Gegelay ma min a tlaɗ kolona hin dak tamu. Na lay njaf suu kay ndaŋgarana halaŋ hin vi vunusi kaɗu.

⁴ Hu buu namma wanni, Yawe di ana, an hin guruɗ kulumina ki may, suu fuli kasina hin mbuɗ ki ndaana, may irin ka tini kay zi ma Yudana na ta, kulumi suu vi suunana halaŋ an hin dugusi irisi kiyo.

⁵ Muli suu Yudana hin ɓak tasi hurusi kurufu ana, «Suu hu Yerusalemma saɓak masina ni eg Yawe, ma saɓakŋa kom belna, Loosina.»

⁶ Hu buu namma wanni an hin mbuɗ muli suu Yudana ko ndal kura ŋgali u gunara na, ko ndal dolla muni duk usuna na. Asi hin ci suu keŋesina ki halaŋ halaŋ bik njuf may, bik gulu may. Na may Yerusalem hin li kakira ni hu liiɗ ma dewna.

⁷ Yawe hin suɗ mbutluɓma Yudana ki jewe a furira hu ziŋ Davidna u furira vi suu hu Yerusalemma gol ko asi jivi su suu Yudana naɗi.

⁸ Hu buu namma wanni Yawe hin baa kom ha ki kay Yerusalem, suu maŋi dukusina hu buu namma ni asi hin mbuɗ ki ko David na, zi ma vi Davidna hin li ni ko Lona na, fokosi ko ndal sa sunda huulona vi Yawe na.

Hahawra hu mbassa halaŋ

⁹ Hu buu namma an hin vi tan ci suu mbay duu u Yerusalemma ki halaŋ.

¹⁰ An hin njay ŋgus mayra saara jivira u giyamba kaŋgara kay ziŋ Davidna u suu Yerusalemma. Na ɗaŋŋi asi hin golonu sa asi cokomma. Asi hin tiirim matam ko ndal goo ma dewna na. Asi hin tii kam ko suuna tii kay goo ma vuɗ jewna na.

¹¹ Hu buu namma ni hahawra Yerusalemba hin li ŋgolla ni ko hahawra Hadad Rimmonda hu fulla Megidora na.

¹² Mbassa hin tiira, njaf suuna ki kay tasi zeɗ zeɗ. Njaf suu vi Davidna ki kay tasiya. Boyogina kay tasi may. Njaf suu vi Natanna ki kay tasiya, boyogina kay tasi may.

¹³ Njaf suu vi Levina ki kay tasiya, boyogina kay tasi may. Njaf suu vi Simeyna ki kay tasiya, boyogina kay tasi may.

¹⁴ Njaf suu hiŋŋa halaŋ ki kay tasi zeɗ zeɗ, boyogina kay tasi may.