ZAKARI 11 - Boy Lonana

Suu saɓakŋa hin daɓ kiyo

¹ Mal vun ziikŋa kiyo, Liban, kura ŋgalak ŋgusugi maksina kiyo.

² Tii tagiya ŋgusu siprena kay ŋgusugina ŋgal ki wa, kay ana suu saɓakŋa casi ki wa. Tii tagiya ɦoyoki suu Basanna kay ana duk gu mayra sa ka kal huɗira gaɗ ki kaŋga wa.

³ Humugi oyra vi suu taa yoorina haa, kay jivi masira bulum ki wa. Humugi haa, gor dlona ka ŋgob kay ana ŋga tara vi lumma Yurdanna bulum ki wa.

Sa taa yoo ma jivina u ma taa yoo ma cona

⁴ Yawe Loonna ɓak ana, «Taa yoori suu ɦasi ki a ŋgaɗtana,

⁵ asi suu malayasi suu gususina ŋgaɗasi ki bay dlara kasi babana, asi suu asi gususi ki di ana, ŋgayagi Yawe, an mbuɗ ki bege wa, doli ɗaŋŋi suu taarasina ka wasi hahawasiɗi.

⁶ Yawe di ana an hin ka wi hahaw suu kay ndaŋgarana oloɗi. Gasi, an hin hin suuna kiyo, gegelay ko ndaram ma zina, ko mul mamma may. Mulina hin ɓeŋ ndaŋgara kiyo, an hin ka buɗ suuna ay ki kosiɗi.»

⁷ An taa doli ni yoori suu paara ɦasi ki a ŋgaɗtana. An yow tokolora taa yoona mba'. An yira jewra ana, «Jivira», ta mbara ana «Humba» an gijaŋ taa yoorina.

⁸ Na ɗaŋŋi an ci suu taa yoori suu hindina ki hu til ma dewna. An viɗ siɓpa ki u asi may, asi may ni hinin ki gaw.

⁹ An hin di ana, «An ka tuɗugi taara oloɗi. Mayra a miɗ kira miɗ kiyo. Ta a viɗ kira viɗ kiyo. Suu a hin iirina, kom tasi kiyo.»

¹⁰ An tli tokolo manda yaɗ ana «Jivira» kon tani kusuɗ kiyo, a bulum jivira an laɗ taɓ suuna u tasi u ndaɗta kiyo.

¹¹ Boy namma um gi ki kolo hu buu namma. Suu li paa yoorina suu humunna wi ana gasi ni boy ma Yawe ɓakamma.

¹² An dasi ana, «Li ni boy namma irigi jiviya ni, warakangi aya li kaɗi ni hinigina may.» Na may asi warakan ki silira dok hindi.

¹³ Yawe dan ana, «Gam ha ki maŋ sa yoo tlena, gussa jivira asi furiyun kaɗta.» An tli silira dok hindi ndaɗta gaɗ ha ki maŋ sa yoo tlena hu zira vi Yawera.

¹⁴ An hin kus tokolo manda yaɗ ana, «Humba» ki a bulum somora ki duk ɦoŋ Yuda u Israel.

¹⁵ Yawe dan ana, «Hal sa sunum kaɗina tinim a gol suu taa yoorina.

¹⁶ Gola an ka tli sa taa yoona ay hu mbassa wanda, timiira ba kira nam hin ka caa yam kaɗɗi mayra viɗ kira nam hin ka halaɗ ay oloɗi, mayra dakka nam hin ka ciliɗ kiɗi, mayra garaŋga nam hin ka laɗ uɗɗi lay. Nam hin kom suu ɗoorina kiyo, kususi gayasi ki lay.»

¹⁷ Cora ka kay sa taa yoo ma sunum kaɗi ma hin katlaŋ mamba kina. Ko ŋgewna ŋgaɗam bikim ki may, coom irimba njuffa ki may. Ko kom so kiyo, gasi ko kom so kiyo. Ko irimba njuffa mbek kiyo, gasi ko ndaɗ mbek kiyo.