ZAKARI 10 - Boy Lonana

Joɓogi ni Yawe joɓ fulinaɗi

¹ Joɓogi Yawe kay mbo lo ma hu til faɗtana. Yawe mba ɗugulla ay ni namu. Nam si yona ay kaŋga ŋgolla cocora ni namu, ɦal vuɗ tlena bagi hu senena maŋ gegelay ni namu.

² Gasi daŋ may fulina hoŋ dira ni dlara uɗ kaɗira. Suu joɓpa dlara tak taɗ irisira ni kaboyna. Asi gijaŋŋa ni u dlara kaboyna, heɓ huu suuna u ganyamba. Ni kay ndaɗta suuna tuɗ ha ki ko ndal mbutlina hu katlaŋgara na, hahaw coco lay kay sa golosi kaɗi.

Kalkira daŋga

³ Yaanda ni kay suu taa yoorina. An hin kaɓakŋa ni kay ŋgekgina. Gasi Yawe, ma Saɓakŋa Kom Belna, hin gol yoori mamsina, zi ma Yudana. Nam hin col kulum mamma duuna huwa.

⁴ Ҥinira tini keŋ zirara hin kal ay ki hu Yuda, gu ma pii hu mbutluɓmana, gu mburura duuna, mulina halaŋ hin kal ay ki egemu.

⁵ U tasi dew ko ndal muli suu duuna na, asi hin duura, hin tali luɓu ma hu voɗtana kaŋga u sesiya. Asi hin njogoɗ tasi u suuna. Yawe hin li u asiya. Suu duuna kolo kay kulumi masisina zolona hin casiya.

⁶ An hin ɦal saɓakŋa maŋ zi ma Yudana. An hin suɗ ziŋ Josefna kiyo. An hin hoŋosi kolo balamasiya kay ana hurun haɗ kasiya, ko ndal ana an noyosi ka ki gindira na, kay an ni Yawe Loosina. An hin humusiya.

⁷ Suu vi Efrayim ma hin mbuɗ saɓakŋa ko muli suu duuna na. Asi hin li furira ko suuna hoɓ u summa li furira na. Goryosi wasi na ni li furira may. Asi hin li furira coco kay Yawe.

⁸ Asi hin hum yira an hin yasi a tokosi eg tasira kay anni sa buɗusi ay kina. Asi hin zul coco ko ay fok jewra na.

⁹ An njayasi ki duk suuna lay ni ay ki day lay ni asi humusi hin gasi ay kanu. Asi hin vuɗ gorra, hin hoŋ aya.

¹⁰ An hin hoŋosi ay hu mbassa Egiptera. An hin tokosi hu mbassa Asirira. An hin tuɗusi hu mbassa Galaaɗta u Liban, na lay ni dla ndaɗta ndak ka tuɗi.

¹¹ Asi hin ɗiŋ mbo lumma ŋgolna Egiptena kiyo. Yawe hin waɗ bil mbona hu lum ma ŋgolna. Mbo lumma Nilna halaŋ hin so kiyo. Ŋga tara vi Asirira hin bulum kiyo. Mul ma Egiptena hin ɦuɗ kiyo.

¹² Asi hin hin saɓakasi ni kay Yawe. Asi hin tuɗ ni u semu. Yawe di na.