ZAKARI 1 - Boy Lonana

TLENNA TAK TASI MAŊ ZAKARI Yawe yi ana, hoŋogi ay egenu

¹ Hu til ma kalavandina, hu basara vi mulna Dariyus ta mbara, Yawe ɓak boy mamma ay maŋ sa jok vun Lona, Zakari, ma goŋ Berekiyana, goŋ Iddona.

² «Yawe ɓeŋ hurum ki coco eg somoyogiya.»

³ Dasi ana, «Yawe, ma Saɓakŋa Kom Belna di ana, hoŋogi ay egenu. Yawe, ma Saɓakŋa Kom Belna, di na, an hin hoŋ ay egegi may Yawe, ma Saɓakŋa Kom Belna, di na.

⁴ Lagi dlaŋ somoyogiraɗi, asi suu jok vun Lona ay jewna dasi ana, Yawe, ma Saɓakŋa Kom Belna, di ana, hoŋogi ay ɗaŋ, hinigi voɗ magira cora u dlagira cora kiyo, may asi hum kaɗi, tin saarasi ka kanɗi lay, Yawe di na.

⁵ Somoyogi ka ni arage? Suu jok vun Lona ka iiri tu may su?

⁶ Na ni boy manna u gaɗ manda suu an hinisi ka maŋ suu man suu sunda suu jok vun Lona tewegi somoyogi kaɗi su? Na daŋŋi asi hoŋ aya, di u vunusi ana, Yawe, ma Saɓakŋa Kom Belna, col a lasaygi ni kay voɗ maygira u tuɗ maygira cora, nam lasaygi ni na.»

Dlara tak taɗ jewra, kulumina

⁷ Hu buu ma dok mba yam fiɗina, hu til ma doogo yam dewna, til ma Sebatna, hu basara vi mulna Dariyus ta mbara Yawe ɓak boy mamma maŋ Zakari ma goona vi Berekiya, goona vi Iddo ana,

⁸ Tlena tak tasi ki irin njeŋgee, sana fuli kay kulumma tam tlaw tlawi, nam coli duk ɦoŋ ŋgusugina ha ki duk na day, kulumi suu tasi tlawina ay njari ŋgoromu, suu tlawasi haɓ haɓma u suu haɓagina.

⁹ An joɓom ana, «Asi varakŋi balam mege Bu Suuna?» Na ɗaŋŋi sa sunda vi Yawe ma ɓak u anna hoŋon dira ana, «An hin takaŋ va ma asi varakamma.»

¹⁰ Sa coli duk ɦoŋ ŋgusuginana hoŋ dira ana, ni suu Yawe cukusi ay ana asi poy kay ndaŋgarana.

¹¹ Na ɗaŋŋi asi suu asina hoŋ dira maŋ sa sunda vi Yawe ma coli duk ɦoŋ ŋgusuginana ana, «Ami poy ay kay ndaŋgara wa, ndaŋgara cecemi ka kaki en, ka koɗ taɗu.»

¹² Sa sunda vi Yawe hoŋ dira ana, «Yawe, ma saɓakŋa kom belna, aŋ hin juɓmi ara na ta ta a hin wi hahaw Yerusalem u ɦoŋzi ma Yudana suu huruŋ ɓeŋ ki egesi basara dok kiɗisiyana ni ge?»

¹³ Na ɗaŋŋi Yawe hoŋ dira maŋ sa sunda huulona ma ɓak u anna ni hoŋ dira so ura, hoŋ dira heɓ huna.

Yawe hin heɓ huu Siyon daŋgadla

¹⁴ Nam sa sunda huulona ma ɓak u anna dan ana, «Ɓak ha kiyo, Yawe, ma Saɓakŋa Kom Belna, di ana, Yowmusna ka hurun ŋgolla eg Yerusalem u Siyon.

¹⁵ Na may an hurun ki ɓeŋi coco eg mbas mayra ki mini jivira. An may ɗaŋŋi hurun gin ki ɓeŋira ni ew kay Israel, asi may ni mba cuk kay cooɗta ni cuk kiyo.

¹⁶ Kay ndaɗta Yawe ɓak ana, an hoŋ ay eg Yerusalem u jivi manda, ziinda hin min ki kolo may, Yawe, ma Saɓakŋa Kom Belna, di na, hin waɗ zewna ha kay Yerusalem.

¹⁷ Ɓak boy namma ha ki olo, Yawe, ma Saɓakŋa Kom Belna, di ana, jivira ka kay ɦoŋzi manna tuɗi. Na may Yawe hin heɓ hu Siyon daŋgadla, hin man Yerusalem.»