YOORA 5 - Boy Lonana

Hoŋomi ay egeŋu, Bu Suuna

¹ Tin humuŋ ay kay dlara ka lamira, Yawe. Golla aŋ wi ŋgulla asi ka ŋgulumira gige.

² Joomina mbuɗ ki maŋ koyogina wa, zigini mamisina mbuɗ ki maŋ suu ami ka wasiɗina wa.

³ Golla, ami mbuɗ ki kuyura bay bura wa, somoyomi suu boyogina mbuɗ ki ni donora lay.

⁴ Yo mami ma ami camma gusummi u gursura. Njun guumina a kal vora ni ami warakŋi warakiya.

⁵ Asi ni kay duk ceremiya, ami ki lasiya. Ami ki loɓiya, koɗ tara ka kamiɗi.

⁶ Ay hu Egipte ami maɗ komi koloo ay hu Asiri lay a hoɓ hayami u funa.

⁷ Somoyomi li dla cora. Asi ka oloɗi. Ami varak balamasi kay dla co masira ni amiya.

⁸ Mborɓiina lasami ni asiya, sa ka a ɓaɗami ay ki kosiɗi lay.

⁹ A kalami fu mamina ay voora ni ami gus tami ki gusiya, ni ko suu kul suu hu fullana.

¹⁰ ɓakami yoroŋŋi ko ami gi ni duk kura na, ni ko dla co mayra lamira egemira.

¹¹ Asi buu u boyogi suu vi ndarayasinana hu Siyon. Asi ɓeŋ gorɓiina ki hu ɦoŋzi ma Yudana.

¹² Asi ɓal goryoŋ mulinana ki kolo fun guna u kosiya. Suu basina sa ka ŋgaasi oloɗi.

¹³ Gorzoŋŋina tli ɦinira luɗna kasiya, gor njufiina puk kaŋga ko nek guna.

¹⁴ Suu basina seŋ tasi ka tuɗ hu li ma tokka gaɗta oloɗi. Gorzoŋŋina ka gi sool masira oloɗi.

¹⁵ Furira hurumira seŋ ki wa. Njoŋ ma ami luurumma mbuɗ ki ni yoo tara.

¹⁶ Bella kay yamira ndi ki kaŋga wa, ɦii dla cora fami wa, kay ana ami li dla cora wa.

¹⁷ Gola ni kay ndaɗta mbalatami halaŋ ki tuguɗira. Gola ni kay ndaɗta irimi dug ki wa.

¹⁸ Ni kay ana ɦinira Siyonda bulum ki wa, bayakŋa mbuɗ poy ki kaɗu.

¹⁹ Aŋ Yawe kakira ni a fafaɗta. Mul maŋga tuɗ ha kay njaf suuna fokŋa ɗow ɗow.

²⁰ Ni kay me aŋ hin maarami ki a fafaɗta ni ge, aŋ hin noyomi ki na ta ta daɓ buuna ki u ndaɗta su?

²¹ Hoŋomi ay egeŋu, Yawe. Ami hin hoŋ aya. Hoŋomi buu mamina balamam wilira ko buu ma basi ma jak kina na.

²² Na ni aŋ hin noyomi ki ni a fafaɗta su? Huruŋ mbuɗ yara ki egemi ŋgol coco ɦay.