YOORA 4 - Boy Lonana

Duuna, mayra u daɓpa Yerusalem hin daɓ kira

¹ Ni nana lorra hin ka liɗi, kawi ma jivina hin ka liɗi, gogoyra teteɗta hin njay ki keŋ hu voɗta ni ge?

² Goryoŋ Siyon suu jivi cocona, suu gususi loɓma ko ndal lorra na na, ni nana asi hin ndumusi ki ko ndal doyogi luɓuna suu sa min doyogina minisi u komba na ni ge.

³ Bayakka lay ni ɦal pona maŋ goryoɗ lay, ɦasi tlesuu tira lay. Suu man suu jivina hin mbuɗ ki suu ci maɗna ko ndal ergetta hu fullara na ni nanage?

⁴ Sin gogoo ma koloɗina narak ha ki kolo u yirɗim ko laa yora. Gorkemba joɓ funa sa ka ɦasinaɗi.

⁵ Suu ti tlena godlomba miɗ ki hu voɗta, suu ŋgolo suu suuna ŋgaasi coco u baraw ma gus loɓma egesina gasi yam didiŋga ki a hal tina.

⁶ Dla cora vi suu man suu jivinara, ŋgolla ni sura vi Sodomba. Ndaɗ bulum ki kaŋga ni na gaw bay sa tin kom egeɗ lay.

⁷ Suu maɗ suu teteɗna ki teteɗ su dlammagina lay, ki haɓpa su mbiira lay, tasi ki warra su mbuuri suu duk mbo lum ma ŋgolna tasi tlumina na.

⁸ Tasi ki warra su boondina. Sa ka wasi hu voɗta oloɗi. Bakasi cene ki kaŋga kay sokosiya. Ndaɗ so ki ni ko ndal guna na.

⁹ Suu casi ki u ŋgewnana jivi su suu mayra casi kina, suu puk kaŋga saɓakasi kaɗi ko va ka li hu senena oloɗira.

¹⁰ Boyogi suu hurusi haɗ kay goryosina, zal goryosi ki u tasira. Asi mbuɗ ki irisi ni ko ndal jujugumma na, kay suu man suu jivina casi ki wa.

¹¹ Yawe tew ki fun yaamba wa, nam mba yaamba ŋgolla ay wa. Nam gi kura hu Siyon bowoɗ zigini maɗsina kiyo.

¹² Asi wi dla ndaɗta kaɗi, muli suu kay ndaŋgarana lay, duk suu hu duliyarana lay ni sa hum ka ana sa duuna, sa babalira hin mbay hu Yerusalemba kaɗi.

¹³ Ni kay dla cora vi suu maɗ suu jok vun Lona, ni kay dla cora vi muli maɗ suu li ɓivunna suu vo busu suu ɗegeena ki kaŋga huruɗna.

¹⁴ Asi talal hu voɗta, irisi ki dugiya, busuna mbuɗusi ki njenjera wa. Sa ka tin kom eg baraw masinaɗi.

¹⁵ Gol taŋ jiviya, sa cona suuna yasi ay kolo na. Gologi tagi jiviya, gologi tagi jiviya, tinigi kogi egesiɗi. Asi liŋa, asi talalla, na may njaf suuna jok tasi ana, Aygi ka ndak a vasi varaygi a koyogina oloɗi.

¹⁶ Yawe kal ay ki kiɗik njayasi kiyo. Nam ka min a wasi oloɗi. Sa ka hum vun muli suu li ɓivunna oloɗi. Sa ka gi yam kaŋga fok suu basina oloɗi.

¹⁷ Ami may ni irimi ka tinira a juɓ njunda may ndaɗ ka mbaɗi. Ami juɓ ta ta ana suuna mbay njunumiya may. Asi ni ka suu ndak a suɗuminaɗi.

¹⁸ Asi dikimi, ciɗimi balam semiya, ami ka ndak a hoŋ hu liimina oloɗi. Ami hin tok a daɓ kira, buu mamina njak ki fun tam wa, daɓ mamira mba wa.

¹⁹ Suu lasamina feɗta su ɓaraw ma pii kolo huulonana, kolo kay ɦinira asi ciɗimi umiya, ki hu fulla lay asi dleɓemiya.

²⁰ Semeɗ ma sel ay ki cinimina, sa suɗta vi Yawe, hinimi ki mbaɓura hu li ma asi maaram kina, ma aygi di kam ana, Aygi hin kak iirira duk njaf suuna ni u saɓak mammana.

²¹ Li furira ŋgol cocoo, Edom ta jivira kaki hu mbassa vi Ussa. Doli asi hin ɦak va ma ci namma lay, ndak hin guruɗ kiyo, hin hin tak ki siili lay.

²² Siyon ta jivira dla co makka daɓ ki wa. Nam hin ka tuɗuk ki mbaɓu oloɗi. Ndak Edom ta jivira nam hin gak daŋgayna kay dla co makka, nam ka ndum dla cora ndak laɗta kiyo.