YOORA 2 - Boy Lonana

Bu Suuna sa babali ma vi Yerusalemma

¹ Ni nanage, Bu Suuna, u yaamba min a mbuɗ Siyon ta jivira ki zolonage. Nam gik jivira vi Israella ay kolo huulonara ki kaŋga kay ndaŋgara. Nam humum ka gam kay li ma tin semma hu buu mamma yaraɗi.

² Bu Suuna bulum mbassa vi Yakobpa ki halaŋ halaŋ. Nam hawaɗ li ma saɓak ma vi Yudana ki kaŋga u yaamba. Nam gi mulla u muli maɗsina ki kaŋgaa.

³ U saɓak yaamba ŋgol cocora nam bulum saɓak ma Israelna ki halaŋ halaŋ. Nam ka col kay bikim ma njufna fok saam ma babaliraɗi. Nam ŋgal kura vo vi Yakob ko kura ŋgal lina ay keŋga na.

⁴ Nam tli gu mbuuru mamba kom ko ndal sa babalira na, coli kay bikim ma njufna min tam ko sa duuna na. Nam ci suu gol jivina ki halaŋ. Kolo kay mbutluɓ ma vi Siyon ta jivira nam vo yara ay ko ndal kura na.

⁵ Bu Suuna mbuɗ tam ki ni ko sa babalira na, nam lik Israel kiyo. Nam bulum zigini maɗsina kiyo, nam tooɗ liiɗ ma saɓakŋa kiyo. Nam zul yoo tara u yoo tara hu ɦoŋzi ma jivi ma Yudana.

⁶ Nam ɓeŋ senena u li ma asi ŋgaf vok tasi huna kiyo. Nam ɓeŋ li ma asi li luuna huna kiyo. Yawe maa ki kay luu mamma u buu ma Sabbatna. Nam mbuɗ suu mulina u muli suu li ɓivunna ki zolona u yaamba.

⁷ Bu Suuna noy givin ma togolla kiyo. Nam noy liim ma teteɗna kiyo. Nam ɦal gulumun ma kay zigini suu hu ɦoŋzina na maŋ suu babalira. Suuna yi ay kolo u delesi eŋga hu zira vi Yawera ko hu buu ma luuna na.

⁸ Yawe saa hurum ana nam ɓeŋ gulumun ma vi Siyon ta jivira na kiyo. Nam hin balas lina kiyo. Nam hin ka hoŋ kom ay ki bay ɓeŋ vaɗi. Nam mbuɗ ŋgoo gulumunna u gulumunna ki hahawra, asi loɗ ki ko tasi bel.

⁹ Vun grek ma vi Siyonna ŋgaa ki kaŋgaa duk ndaŋgara. Nam ɓeŋ tlena, to vun ziginina kiyo. Mul maɗna u goryom ki duk suuna, gaɗ ka kasi oloɗi. Suu may suu jok vun Lona lay ni ka fi dlara col ay ko Yaweraɗi.

¹⁰ Kaki kaŋga duk ndaŋgara seŋira na selewen, suu basi suu vi Siyon ta jivirana ko ndaŋgara kay yasiya. Asi cuk baraw bolla egesiya. Gorɓii suu Yerusalemma cok yasi kaŋga ta ta kay ndaŋgara.

¹¹ Irin cim ki ko simina wa. Hurun haɗ hurun cocoo. Saɓakan ɦoɗ ki wa. Nam ki gii kaŋga duk ndaŋgara. Suu man suu jivi asina ki ciiya. Hu li ma goryosi suu fun ponana ka daw hu li ma hu ɦoŋzinana.

¹² Asi joɓ susi ana, Wana u sum veŋŋa arage? Hu li ma asi puk kaŋga ko ndal suu fi dagka ay hu li ma hu ɦoŋzinana na, hu li ma iiri masira seed ki ko somoyosina na.

¹³ Dlara hin a ɓakaɗ kakka ni tarage? Sa an hin ŋgaam u ndakŋa ni ge ɗaŋge Yerusalem ta jivira? Sa an hin ŋgaam u ndak a heɓek hurukŋa ni ge goo wayra, Siyon ta jivira? Kay ana tora took kira ŋgolla ni ko lum ma ŋgolna na. Sa hin suɗuk kina ni gege?

¹⁴ Suu mak suu jok vun Lona ka wi tlena ay maku, ni kaboyna u ganyamba. Asi ka gak u dla cookka kiɗi, ni dlara hoŋok ki daganda. Asi wak tlena ay ni maku, di ni dlara kaboyna viɗ suuna kira.

¹⁵ Asi ko kosi uku, suu jak hu voɗtana halaŋ. Asi feɗ vunusi may kizik yasi may u Yerusalemba jivira. Wanni ɦoŋzi ma agi hin di gin kam ana ni jivira fafaɗtana, furi mayra kay ndaŋgara halaŋgaɗi su?

¹⁶ Asi ŋgo vunusi kolo uku, suu babali maksina. Asi feɗ vunusiya muɗ siisiya. Asi di ana, Aygi ki likiya. Na ɗaŋ, gola buu ma aygi juɓumma mba wa. Aygi fam wa, aygi wam wa.

¹⁷ Yawe li ni dlara nam daɗ kira. Nam faɗ ki ni vun dlara nam daɗ ay ki hu buu ma ki fok jew daynara. Nam hawaɗ tlena ki ni ka saaɗi. Nam cukuk suu babalira ay kaku. Nam mbuɗ suu babali maksina saɓak suuku.

¹⁸ Hurusi ka tii eg Bu Suuna. Gulumun ma vi Siyon ta jivirana, hin simi ma irikŋa cuɗ ki ko mbo lum ma ɓaɗna na, faali lay, njeŋge lay. Koɗ tak dukgi, ko tlimiɗ irik so ki u siminaɗi.

¹⁹ Col koloo tii duk njeŋgera, hu li ma ndak col kolo a gol u tlena halaŋ, tin huruk ki fok Bu Suuna ko ndal yona na. Yow kok kolo fokom kay iirira vi goryok suu gori suu miɗ ki ko mayra keŋ lina halaŋ hu voɗtana.

²⁰ Gola, Yawe, sa ma aŋ lam dla cora egem ko wanda nana ni gege? Lini boyogina kom goryosi, suu ndi ki jivina wa may. Lini suu jok vun Lona casi kiwa hu givin ma togolla vi Bu Suunana wa may ni.

²¹ Ki kaŋga duk ndaŋgara hu voɗta suu maana u gorzoŋŋina casi kiyo. Gorɓii mansina u gorzoŋŋii mansina casi ki u ŋgewna. Aŋ cim suuna ki hu buu ma yaaŋga. Aŋ ŋgaɗ suuna ki ka saa kasiɗi.

²² Aŋ hin yi suuna ko ndal hu buu ma luuna na. Suu ŋguy kan mbuɗun ndaanana, hu buu ma yara vi Yawena sa hin ka hin iiriɗi, ka suɗɗi lay. Suu an haɗasina, wulusina, sa babali manna daɓasi kiyo.