YOORA 1 - Boy Lonana

Yerusalemmi ko cara donora noyoɗ kira na

¹ Ni nana ndaɗ kak ha ki keŋ ge, ɦoŋzi ma suuna hurum cocona, nama mbuɗ ki ko cara donora na. Ndaɗ mayra li ndumuɗ ay duk njaf suuna a mulla hu ɦoŋzi ma gorinara. Ndaɗ jivira ni a mbaɓura.

² Ndaɗ tiira, tii duk njeŋgera. Simina kiriŋiɗ na buɗuɗ duk banayaɗna halaŋ lay ni, sa heɓeɗ huruɗ kaɗi. Suu banayaɗna halaŋ gaɗ uɗ kiyo. Asi mbuɗ ki suu babali maɗsina.

³ Ki mbuɗi zolona, ki hu lassa mbaɓura, Yuda tuɗ ki hu mbaɓura, ndaɗu, ndaɗ kak ki ni duk njaf suuna. Ndaɗ ka fi yal ma mbuɗ saɓakgi. Suu halaɗ dlaɗ a caɗ kina ɦeɓeɗ ki kolo wa.

⁴ Voɗta Siyonda mbuɗ ki hahawi. Sa ka mbay a li luuna huɗi. Vun zigini maɗsina ki ɓeŋŋi bel bel. Muli maɗ suu li ɓivunna ka yoo tasiya. Gorɓii maɗsina mbuɗ ki hahawra. Ni dla co me kasi na ɗaŋge?

⁵ Suu babali maɗsina su kaɗu. Suu babali maɗsina dla ka kasiɗi, kay ana Yawe mbuɗuɗ ki hahawra ni namu. Ni kay nek dla cooɗta, goryoɗ suu gorina tuɗ ki mbaɓura fok suu babali maɗsina.

⁶ Siyon mayra jivira jivi maɗta viɗ ki wa. Gola goryoŋ muli maɗsinana ko ndal goŋga ka fi haɗna a tiraɗi ni asi saɓakkasi kaɗi, tuɗ fok sa casi kina ni na.

⁷ Yerusalem humuɗ gaɗ kay buu maɗ ma poyra zolona, kay jiv maɗ ma ay jewna. Hu li ma suu maɗsina puk kaŋga fok suu babali masisina sa ka mbay a njun uɗɗina, suu babali maɗsina waɗu, san uɗ kay maŋi maɗta.

⁸ Yerusalem li ni dla cora. Gola ndaɗ mbuɗ ki ni didiŋga. Suu li humuɗ vunuɗna mbuɗ ka min oloɗi. Kay ana asi waɗ siili maɗta kiyo. Ndaɗ may ni yoo taɗu pereɗ ŋgoroɗu.

⁹ Zozoɗ maɗta ki eg baraw maɗna lay. Ndaɗ ka saa kay dlara mbay dagandaɗi. ɓeŋ maɗta ki ŋgol cocoo. Sa heɓeɗ huruɗ kaɗi. Gola Yawe ni zolo manna, babali manna wul ni wuliya.

¹⁰ Babali manna maɗ kom ki kay bege manda bel. Gasi hu voɗ maɗta ndaɗ wi njaf suu daŋŋa mbaya. Ni suu aŋ ka min a asi mbay duk suu maɗsinaɗina.

¹¹ Suu maɗsina u bolowosi halaŋ yoo tasiya. Asi hal ni funa. Asi ɦal bege masira ki kay tina a mbuɗ tasi saɓakŋa. Gola Yawe, aŋ golon an mbuɗ ki cora ni nana nage?

¹² Dla li ka day day egegi agi suu tuɗ hu voɗtanaɗi, gologiya, wagi tiitara ko tiitaanda lan coco wanda, ta kora vi Yawe hu buu mam ma yara na.

¹³ Ay kolo day nam sun kura ay duk sokonu. Nammi malanna, nam gunun bayra kaŋga u senu. Nam van ki kaŋga wa, nam mbuɗun ki ko cara hawra tew tew va koɗɗira na.

¹⁴ Gola ndaɗ ki ɗakiya. Coonda ni ko mbalna na. Ndaɗ ki ɗuɗira hu duk komu. Ndaɗ ki njunira delenu. Nam mbuɗun saɓak manna a li cora. Bu Suuna ɦan ki ni ko suu ko ndaɗta nana. An ka ndak a col kolo u senɗi.

¹⁵ Bu Suuna dik suu saɓak suu li ay varanna ki halaŋ. Nam ŋgaɓ buuna ki kay a can gorzoŋi mansina kiyo. Bu Suuna luɗ go tamara ki hu fuɗukŋa, Yuda ta jivi ɦayra.

¹⁶ An tii ni kay boy namma. Irin simina u dlaɗ jak kay ana sa heɓen hurunna ha ki egen day. Sa hin ɦan saɓakŋana. Gola goryon ki ciya kay sa babalira ni ma saɓak cocona.

¹⁷ Siyon tak koɗ koloo sa heɓeɗ huruɗ kaɗi. Yawe yow suu babalira ay kay Yakob. Yerusalem dukusi mbuɗ ki ni didiŋga.

¹⁸ Nam ɗegee, Yawe, ni kay ana an li ka u gaɗ mambaɗi. Humugi ha halaŋ halaŋ suu mansina. Gologi tiitaanda. Gorɓii mansina u gor njufii mansina tuɗ ki mbaɓura wa.

¹⁹ An yi suu banayanna, asi may ni ganan yanu. Muli man suu li ɓivunna u suu man suu basina miɗ ki hu ɦoŋzina, doli ɗini asi hal ni tiisina a fi saɓakŋa.

²⁰ Gola, Yawe, an ki ni hu li ma hahawra. Hurun haɗ hurun ɦay. Hurun ki kurufu hurun ɓeŋŋiya kay a suu vunna an suu vunna. Ŋgewna ki kiɗik wanni njafan hin ka li oloɗi, kurufu ni ko ndal vo vi maɗna na.

²¹ Asi humun an yoora, sa heɓen hurun kaɗi. Suu babali mansina hum dla cora li egenda, asi li furira, aŋ li dla ndaɗta ni aŋu. Aŋ mba buu ma aŋ ŋgaam kina ay wa. Ko asi may ni li ni ko an na.

²² Ko dla coosira halaŋ mbay fokoŋu, aŋ lasi ko aŋ landa na may kay dla coonda halaŋ. Kay ana yoo taanda bolow cocoo, an tan ki tuguɗi halaŋ.