VUN ŊGOLNA 9 - Boy Lonana

Yalna ka yi ay koloo

¹ Yalna min ziiɗta wa, nam li garak ma dukŋa na kiɗisiya.

² Nam ŋgaɗ yoorina, nam li sum veŋŋa, min tlena ki kay tabulla halaŋ.

³ Nam sun suu maɗ suu li sunda, nam yi kolo eŋga hu ɦoŋzi ma ŋgolna di ana,

⁴ «Agi gegelay ma ka wi dlaɗina mbay tani.» Nam ka yi ni suu giniŋŋa.

⁵ «Mbaagi aya tagi kay tabul manda, cagi sum veŋ ma an lamma may.

⁶ Hinigi suu ka wi vaɗina ha kiyo, ni agi hin lak iiriya. Tlagi voɗ mayra nera ka tuɗ huruɗta.»

Sa ma wi dlara u sa ma ŋga tamma

⁷ Sa ma gaɗ sa ŋga tam kay coombana ni nam tinim irim kiyo. Sa ma gaɗ sa hurum cona ni fi ŋgulla cocoo.

⁸ Di sa ma ŋga tamma kay coombaɗi nam tiniŋ iriŋ kiyo. May gaɗ sa ma wi dlara nam hin miniŋŋi min ii na ɗow.

⁹ Va ma aŋ dam maŋ sa wi dlara ɦuɗummi wiimba fok na ɗow. Nera aŋ daɗ maŋ sa ma yalnara jokom wiimba ha ni fok na ɗow.

¹⁰ Ndaa ma lam u Yawena ni gijaŋŋa vi yalna gaw. Nera ni haɗta ŋgolla vi suu teteɗna.

¹¹ An wira ɦuɗuŋ buu maŋ ma kay ndaŋgarana foko. Basara aŋ a basa kay ndaŋgarara zul ha fokŋi zuli na ɗow ɗow.

¹² Lini aŋŋi sa ma wi dlara ni, jivi ndaɗta ni maŋ aŋu. Lini aŋŋi sa ma ŋga tamma ni, aŋ hin fi warak ŋga taaŋ ndaɗta ni aŋ may.

Laɓara ka yi ay koloo

¹³ Laɓara ni ko cara ɗeɗ cocora na, ka wi vaɗi lay, zolo ka iriɗɗi layra na.

¹⁴ Ndaɗ ka kaki kay guuɗ ma kakŋa fun ziiɗna na nje kolo hu ɦoŋzi ma ŋgolna

¹⁵ kay a yi suu jak tuɗtana. Suu may suu ka tuɗ hu voɗta ɗegeerana.

¹⁶ «Agiya sa ma laɓa ma hoŋ irim ay egen tani kaɗi su?» Ndaɗ yi ni suu may suu ka wi dlaɗina.

¹⁷ «Yo ma kulum ay kulina jebet cocoo, fu ma tam ki ŋgay gumunna jivi ɦay.»

¹⁸ Suu tuɗ ha u yiiɗ ndaɗtana ka wi ana ŋgus suu miɗina ka hu waraɗi. Sa ma kal ha vo varaɗna kal ni hu lina vi suu miɗina.