VUN ŊGOLNA 8 - Boy Lonana

Yira u nera kay a wi dlara

¹ Yalna ka yi ay koloo, nera ka sawalla kolo u deleɗta eŋga, agi ka humbi su?

² Ndaɗ col ki kolo kay ɦinira fiyekka hu li ma voɗta jak huna, col ki hu garak voɗta may.

³ Hu voɗta tuɗ hu ɦoŋzi ma ŋgolnara may, keŋ vun grek ma ɦoŋzinana may, yalna ka di ana,

⁴ «An yagi ni agi suu warna, an ɓak ha ni maŋ suuna halaŋ.

⁵ Agi suu giniŋŋa haɗagi yal dlara kiyo, agi suu laɓana, neegi tagi kiyo.

⁶ Humugi dlara an daɗta, dlaɗ ŋgol cocoo, an min dagi ki na ɗal ɗal, ka ŋgay vaɗi.

⁷ Vunun di ha ki ni gasira, boy ma kaboyna an ka minimbi.

⁸ An di ni boy ma eg liimma. Ma kaboy ka huɗi lay, ma ganyambi lay.

⁹ Sa ma neeyna wammi u boy ma gasina, suu ki haɗina wam ana ni boy ma u voɗomma daŋ may.

¹⁰ Hinigi dlara hal gursura tani, halangi ni haɗ manda. Wira ni jivi su lorra jivi ɦayra.»

¹¹ Kay ana wira ni jivi su ɦeɗew mayra suuna miniɗ cocora. Va ma jivi ko ndal wira na kaɗi.

Yalna ka tak taɗ kiyo

¹² An yalna, saara wi dlara ka ni egenu. An wi yal ma li dlaanda u jivira.

¹³ Li ndaa Yawe ni aŋ noy ki ni dla cora gaw. Vun ma ŋga tara u kaboyna an ka minimbi, sunda cora halaŋ an ka miniɗɗi.

¹⁴ Anni cara gaɗ suuna, neesi ki kay dlara ha fokka. Gola ni sun manda, anni nera taɗta gaw, an ɦal saɓakŋa ay ni anu.

¹⁵ Muli suu ŋgolona ti mulla ni unu, suu ŋgolo suu kaɓakŋa ka ɓak ma ɗegeena ni unu.

¹⁶ Muli u suu kaɓakŋa vi mulinana halaŋ ka ni unu.

¹⁷ Suu mininna an minisi may. Suu halanna wi ki gasi ana asi hin fan may.

¹⁸ Ҥiza u bibiŋilla ka laki ni egenu, begera u basara kay ndaŋgara ŋgolla u fira fi tlena halaŋ ka ni egenu.

¹⁹ Ҥal manda jivi su lorra, su lor mayra ki yoorira. Tlesuu an lasina jivi su doonora suuna miniɗ ɦayra.

²⁰ An tuɗ ni hu voɗ mayra ɗegeera ni hu voɗta suuna li huruɗ u ɗigillara.

²¹ Hu li namma an li jivira kay suu mininna, an oyosi zanduk masira ki u begera.

²² Yawe vuɗunni namu, anni vuɗ sun mamba jewra. Ni sun mamba nam laɗ ay ki fok jew day dayra.

²³ An ay ki tinira ni fok jew day, ni jew bay duliyara li tu day day.

²⁴ Hu li ma an vuɗna ni, mbo lum ma ŋgolona bay li tu wa, li ma mbona a ɓaɗ ay hurum ka tuɗi lay.

²⁵ Jew ɦinira bay li tura, jew mayra lii kolo mbuyna kaɗi layra ni an vuɗiya.

²⁶ Ni Yawe bay li ndaŋgara u huulona tuwa, tlesuu a min duliyara u asina bay taa tu lay.

²⁷ Hu li ma nam li huulona u yam gura ndulla kolo kay mbo lum ŋgolona na ni an kaa.

²⁸ Nam li ɗugulla kolo huulona, mbo ma ay ga hu gaalinana tak saɓakam kiyo.

²⁹ Nam ŋga ii li ma mbo lum ma ŋgolna do huna kiyo, nam ŋgaa u ndaŋgara kaŋgaa.

³⁰ Hu li namma ni an ka njunum u sunda ko sa wi yalna na. Buuna u buuna ni an li ni dlara furiyum hurumba, an ka luu fokom tew tew.

³¹ Kay ndaŋgara hu duliyara nam laɗta col ay na day ni furi manda ka duk suu warna tew tew.

Furira ka kay sa ma hum u wira yalnana

³² Cemi ni agi, goroyonu, humugi haa, lini agi hum u gaɗ manda ni furira ka kagiya.

³³ Hinigi nera an neegi wanda kiɗi, saaragi kaɗ tew tew agi hin mbuɗ suu wi dlara.

³⁴ Furira ka kay suu humun vununna, suu ka coli vun grek manna hu buuna tew tewna, suu ka juɓ a cuk kalaf vo varanna.

³⁵ Sa ma fanna fi ni iirira, Yawe hin li oo mamba kamu.

³⁶ Sa ma li cora egenna, li hawra ni maŋ tamba na ɗow. Sa ma ka mininɗina ŋgaɓmi miɗna.