VUN ŊGOLNA 7 - Boy Lonana

Yira kay nera

¹ Goonna, aŋ van boy manna koŋ jiviya, ŋgayan gaɗ manda huruŋ kurufu ko ndal begera na lay.

² Lini aŋ min a kak iiriya ni li u gaɗ manda, golon haɗ manda ni ko wal wal iriŋga dukka na.

³ Njunuɗ ki kay gogor koŋu, ɓiiriɗ ki hu huruŋ ma kurufuna.

⁴ Ɓak taŋ u wi dlara ana, «Ndakŋi wayanda.» Joɓ nera, ndaɗ li somora u aŋu.

⁵ Ni hin suɗuŋ ki ko caŋ ndaraŋŋara, u cara koyra ta vunuɗ njaɗ jivi cocora.

Cara dalamba ɓalak goozoŋŋa kiyo

⁶ Buu maa dew ni an ay coli kalafi hu ziinda, an gol ay kiɗik ii zira na,

⁷ an wi gorzoŋŋii suu ka wi dla tuɗina, an wi goozoŋ maa dukusi dew ni ka wi va na ndeɗi.

⁸ Nam ka tuɗ hu voɗta jak eg ziŋ carana na tok, nam tli kommi voɗta tuɗ varaɗta,

⁹ ni faɗta hin tok a ɗikka may, hu li ma njeŋgera mbana, lin mbuɗ ki ndufunda may.

¹⁰ Gola ni cara kal ay ki ŋgafam vogom may, cuk barawna ko ndal gawlaŋga na, mbeleŋŋa huruɗ cocoo,

¹¹ ndaɗ ni cara ɦay ɦayra, ka kak ga hu ziiɗ na enɗi lay, tuɗ ki ni na cow cow.

¹² Poy hu voɗta, tuɗ ni u sukŋa, ndaɗ hal ni li ma koyra na dew.

¹³ Gola ni ndaɗ ŋgafam wa, vam u furira u ŋgaf vunna, njaɗam u della jivira ana,

¹⁴ «An vi vunun u Lona ana an min a lam ɓivun ma gi deɓpa. Cemi ni an li ɓivun namma may.

¹⁵ Kay ndaɗta an kal ay ki a ŋgafaŋ vogoŋŋi na, an min a waŋu, cemi an faŋ wa.

¹⁶ An min layna ha ki baaram baraw ma tam ndali kolo kolona ha ki kamu, baraw dlemba col ay Egipte dayra,

¹⁷ an yamam mir mbul ma his jivina ha ki kam lay, alowe u gi kanella.

¹⁸ Mbaya furuyuy u zoŋ mayra ta ta madiya, lay zoŋ mayra ko huruy minda na.

¹⁹ Njufun ka voɗi, nam tuɗ ni koyra dayra,

²⁰ nam yow gursura kam cocoo, hin mbay vo ni tilna col ki duk haɓpa tuwa.»

²¹ Hu boy maɗ ma ganyamba namma ndaɗ vi goozoŋŋa wa, ndaɗ ɗuɗum u boy ma jivi namma.

²² Nam gi tam uɗ ni na zak gaw, ko ndal mbutl ma suuna vam a tuɗum hu li ma ŋgaɗta ɦawa na. Nam kal tam duk poŋga ii laɓara, sem u kom njuni halaŋ.

²³ Ta ta nam fi mbilina egem cocoo, ko ndal layagi suu tuɗ vi ki hu baynara na. Nam ka wi ana iiri mamba ni tok fun maɗnaraɗi lay.

²⁴ Cemi ni aŋ, goonna, humun vunun haa, tin saa maŋga ni kay boy manna.

²⁵ Hin taŋ a cara ko ndaɗta na ganaŋ yaŋgi, hin voɗ maŋga jivira ki a tuɗ uɗɗi.

²⁶ Kay ndaɗ dak suuna, ɓalakasi ki cocoo, suu saɓak cocona lay puk ki ga uɗu.

²⁷ Tuɗ varaɗ ni ko ndal aŋ tuɗ ni vi suu miɗinara na. Kalaŋŋi hu li ma ndufunna hu lina vi suu miɗina.