VUN ŊGOLNA 6 - Boy Lonana

Zul bal ma vi suunana kaŋ cocoɗi

¹ Goonna, lini aŋ kal taŋ a sa ma vovoɗta vi sana wa, lini aŋ gi taŋ duk bal ma ndaraŋŋa wa ni,

² lini aŋ vi taŋ hu bayna wa u boy ma kal ay ki funuŋŋa, lini aŋ gun dawna fokoŋ u boy ma kal ay ki funuŋŋa ni,

³ goonna, hal ni voɗ mayra buɗ taŋ kira. Kay ana ɓak ma vi ndaraŋ ma vok zina vaŋ wa, tuɗ fokomu, cenemu.

⁴ Buu sen kay boy nammaɗi, hin iriŋ a cemek kay dla ndaɗtaɗi.

⁵ Buɗ taŋ ki ko ndal dukka vi hu bayna fok taɗ kolora na, ko lay mayra kak hu daɓaŋga hin suɗ kira na.

Sa zolomba u telella

⁶ Aŋ sa ma zolomba, tuɗ fun telella, gol dlara ndaɗ laɗta, aŋ hin fi yalna.

⁷ Ndaɗ li sunda ni sa ma goloɗ uɗ kaɗi, sa ma fokosi a ŋgolla kaɗi lay, sa ma ci way maŋ ndaram kaɗi lay.

⁸ Hu ndolla ni ndaɗ ɗok tiiɗna ki egeɗu, hu li ma suuna feɗ wana vona, ni ndaɗ tok waaɗna ki egeɗ gaw.

⁹ Aŋ sa ma zolomba buuri ga na gak gak hin col ki kolo ni saɓage? Aŋ hin garaɗ iriŋga senna ki ni saɓage?

¹⁰ Aŋ buu senna, koɗ taŋu seŋ sekeɗiira kay layna na sekeɗ u koŋ ɗuɗi huruŋ ɦawa na.

¹¹ Hu li namma hawra kuɗukuŋ ay ni ko ndal sa ma kulla na, lassa hin ki egeŋŋi ko ndal sa ma mbay ɦurum zina kina na.

Dlara li eg sa ma li iira

¹² Sa ma ka wi vaɗina tuɗ ni u boy ma kaboyna funum na kay.

¹³ Nam cemek irim may, fedek u sem may, hin fedek u kom lay.

¹⁴ Hurum ma cona ka saa ni dla cora sak sak, nam ka hal ay tew tew ni dla cora. Nam cuk dlara ɦonira duk suuna.

¹⁵ Kay ndaɗta ɓalakka hin mba kammi na zak, nam hin kus ki ni kussa ka jak oloɗira.

Dlara Lona ka miniɗɗira

¹⁶ Tlena ka na karkiya suu Yawe ka minisiɗina, ndak a li kiɗisiya suu ka gol irim jiviɗina.

¹⁷ Gol ii mayra ŋga tara u sinda kaboyna. Ko ma vo busu sa ma ɓalak va kaɗina kina.

¹⁸ Huu ma saa dla mayra cora. Sem ma ɓaɗ a tuɗ li dla cora.

¹⁹ Sa kaboy ma di dlara kaboyna kay suuna, u sa ma cuk suuna kel tasina.

Gaɗta kay dla zoŋga

²⁰ Goonna, hum gaɗta vi buŋga jiviya, hin gaɗta suŋ daŋgara kiɗi may.

²¹ Vi gaɗ ndaɗta huruŋ jiviya, njunuɗ ki keleŋ ko ndal ɦeɗewna na.

²² Hu tuɗ maŋga aŋ tuɗta u hoŋ maŋga ay vora ni ndaɗ hin goloŋu. Kay lay maŋ ma buuna lay ni, ndaɗ hin juɓuŋ uŋu. Hu li ma aŋ dliɗ ki kolona ni ndaɗ hin njaɗ u aŋu.

²³ Kay gaɗta, ndaɗ ni ko ndal pindilla na. Haɗta ni kiɗikka ni voɗta vi iirira, ni haɗta kay wi yal ma jivina.

²⁴ Ndaɗ ndak a suɗuŋ ko ca mayra poy cora, ko cara daŋga ta ganaŋ yaŋ u boy ma jivina may.

²⁵ Tin huruŋ kay ca ndaɗta u jiviɗ ɦawaɗi, caa yaŋ kay boy jivi ma ndaɗ damma u iiriɗ ta gol jiviraɗi.

²⁶ Cara gawlaŋga hal ni va ma ew ma gus tina funuɗna ɦawaa. May cara ki u njufuɗta hal a baaŋ ki ni iiri maŋga.

²⁷ Sa ma tli kura kolo kay yam ta, baraw ma tamma hin bay ŋgal ki ka su?

²⁸ Ɗowba nam tin sem duk murus kura, sem hin bay ŋgal ki ka su?

²⁹ Sa ma buu u caŋ ndarammara ni ko ndal ndaɗta na may, sa ma ŋgen carana ka hin bay dak li egembi.

³⁰ Sa ma kul va ma tira a ti hurum ko mayrana, sa ka panam cocoɗi.

³¹ Hu li ma um gi ki wa ni, nam warak ko ndaɗta na ga ga sem kiɗisiya. Nam hin ɦal tlegeyem suu vo hu ziimma ki ni halaŋ halaŋ.

³² Sa ma buu u caŋ sanara ni sa ma yam ka kambina. Nam hal a ba tam ki ni kay tamu.

³³ Asi hin poŋomu, nam hin mbuɗ ki zolona. Zolo mamma ka daɓbi.

³⁴ Kay huu njuf cara ɓeŋ ki egem cocoo. Hu buu mari ni nam ndak a sa sukulumu, ka wam hahawambi lay.

³⁵ Nam ka min warakgi lay. lini aŋ a ɦam tlena ni ko menagelay ni nam ka viɗi.