VUN ŊGOLNA 5 - Boy Lonana

Gol taŋ jivi ko cara gawlaŋga

¹ Goonna, jeɓeren yal manna jiviya, tin humuŋ hum gasira an daɗta.

² A aŋ li ni sa ma ɗilina, vunuŋ di ni dlara jivira yalna.

³ Na daŋ may boy ma ay fun cara gawlaŋgana ni ko ndal mbul yumma na. Dlara ndaɗ daɗta jivi ko mbulna na,

⁴ may ŋgoo daganda ni ndaɗ ki galaara ko ndal jarakka na, ki siina ko ndal ŋgew ma siim guuri luh luhna na.

⁵ Seɗ tuɗ ni hu voɗta vi miɗnara, ndaɗ tuɗ ni ga hu lina vi suu miɗina.

⁶ Ndaɗ ka saa kay voɗta vi iiriraɗi lay, voɗ maɗta viɗ ki iriɗ ni ndaɗ ka wi li ma ndaɗ a tuɗ hunaɗi lay.

⁷ Cemi ni agi, goryonu, humun vunun haa, ɦal ŋgorogi maŋ dlara an dagi wandaraɗi.

⁸ Ҥuɗ taŋ ki eg ca ndaɗta na day. Tin taŋ ay eg ziiɗna tokgi.

⁹ Kay ka ndaɗ ɦaŋ jivi maŋga ki maŋ sa ma daŋgi. Jogoŋ basa maŋga kay ndaŋgarara ki maŋ sa ma ka wi hahaw saɗinaɗi.

¹⁰ Ka a suu koyogina hoɓ ki u saɓakaŋgi, ka tlesuu aŋ lasi u saɓakaŋŋa a tuɗ ki maŋ sa ma aŋ ka wambinaɗi.

¹¹ Ŋgoo daganda aŋ hin daɓ ki ni ɦawana, tliwiŋ ka a hin egeŋ oloɗi lay.

¹² Aŋ hin mbuɗ ɓak taŋ ana, «An hum ka u haɗtaɗi ni kay mege? Hurun vi dla mayra dandara kaɗi ni kay mege?

¹³ An hum haɗta vi suu haɗanna kaɗi ni kay mege? An min ka a tin humun kay dlara asi daɗtaɗi ni amege?

¹⁴ Hin na ew a an kal ki hu wihawra duk suu tokina, dee suu taɓi kel tasi dewna, asi a dikin kira.»

Min caaŋga aŋ vaɗ u zoŋ taŋga

¹⁵ Ci ni mbo ma hu goloŋ maŋgana, nam law ay ni hu goloŋ maŋga daŋ may.

¹⁶ Hin mbo goloŋ maŋga a ɓaɗ ha ki ga hu voɗtaɗi, hinim a ɓaɗ ki hu li ma suuna tuɗ hu belnaɗi.

¹⁷ Ko goloŋ maŋga li ni maŋ na hol, ɓorowoɗ ha ki maŋ suu daŋŋaɗi.

¹⁸ Ko goloŋ maŋga paɗ vunna li kaɗu, furi u caaŋga aŋ vaɗ u zoŋ taŋga.

¹⁹ Caaŋga li iriŋ jivira ko ndal dukka na, pooɗ li cuki kaŋ na tew tew, zoŋ maɗta furuyuŋ huruŋ na gak gak.

²⁰ Goonna, aŋ viɗ taŋ ki u cara daŋga ni kay mege? Aŋ lam po cara aŋ ka waɗɗira ni amege?

²¹ Kay ii Yawe ka wi voɗta vi suunara halaŋ, nam ka golosi voɗta asi tuɗ huruɗta halaŋ.

²² Sa ma dlam cona dla coomba vammi ndaɗ tok, nam hin vi ni hu bayna vi dla coomba tok.

²³ Sa ma ka doo tambina ba tam ki ni kay tamu, laɓa mamba tuɗum hu miɗna ni ndaɗu.