VUN ŊGOLNA 4 - Boy Lonana

Wi yal dlara ni va ma jivi ɦayna

¹ Goryonu, hum haɗta vi bugira haa, so tagi a li ki ni suu ma neeyna.

² Na daŋ may an dagi ha ni gaɗta jivira ka agi hinin haɗ manda kiɗi.

³ An lay ay vo vi bunni a goo ma jivina, sun minin coco ko goo dewna na.

⁴ Bun haɗan ay ni ko ndal wanda na, mal huruŋ ki a van boy manna. Hum u gaɗ manda aŋ hin kak iiriya.

⁵ Haɗ wi dlara, haɗ nera may. Humuŋ maa dlara an daŋgara kiɗi, ɦal ŋgoroŋ maɗɗi.

⁶ Noy yalna wi dlara kiɗi, nam hin goloŋŋi namu, minimu nam hin njun kaŋu.

⁷ A fi yalna wi yal dlara ni so taŋ a haɗam ki jiviya, noy tlesuu koŋŋa ki bel a fi nera.

⁸ Vi taŋ eg wira tok ndaɗ hin ɦuɗuŋ koloo, ndaɗ hin tlaŋ yaŋ kolo lini aŋ vaɗ koŋ jiviya.

⁹ Ndaɗ hin kuluɓuŋ jumba oora kaŋu. Ndaɗ hin ɦaŋ zew ŋgol ma tii semma keleŋu.

Hin poyra vi suu cona kiyo

¹⁰ Goonna, hum haa, van boy manna kaŋu, basa maŋga kay ndaŋgara hin zul ha fokŋi zuli na ɗow ɗow.

¹¹ An tuɗuŋŋi hu voɗ yalna, an tuɗuŋŋi hu voɗta ɗegeera.

¹² Va ka hin laŋ hu tuɗ maŋ ndaɗtaɗi, lini aŋ liŋ lay ni va ma daɓaŋ seŋ kaɗi.

¹³ Col seŋ eŋ kay haɗ maŋga, noyoɗ kiɗi, ŋgomoɗ jiviya, ndaɗ ni iiri maŋga.

¹⁴ Tuɗ taŋ hu voɗta vi suu conaɗi, dlaɓ taŋ u suu li dla coraɗi lay.

¹⁵ Hin voɗ ndaɗta, tuɗ huɗi, wak ki keŋeɗu, tli huruɗɗi.

¹⁶ Asi ka buu sen kaŋga bay li dla co ay kiɗi, bay asi a ndi sa ki ga na ba ni asi ka buu senɗi.

¹⁷ Asi ti ni fu ma kulum ay kulina, sum ma asi camma ni ma ɓaɗam ay fun dla corana.

¹⁸ May voɗta vi suu ɗegeena ni kiɗikka fo lina, kiɗik ndaɗta tuɗ ha fok gak gak ɓo lina kiyo.

¹⁹ Voɗta vi suu conara ni ndufunda, asi ka wi tlesuu daɓasi sesinaɗi lay.

Col eŋ hu poy maŋga

²⁰ Goonna, kak jivi humun boy manna haa, tin humuŋ ha hum dlara an daŋgara.

²¹ Hin boy namma a viɗ ki iriŋgi, aŋ ŋgom boy namma ni huruŋ kurufuwa.

²² Boy namma ni iirira kay sa ma li umma, ni a tara fanira kay sa namma lay.

²³ Saa jivi kay dlara aŋ humuɗta, kay ii hakara vi iiri maŋgara ka ni kay boy namma.

²⁴ Hin vunuŋ a di dlara kaboyɗi, ɦuɗ dlara tum ura ha ki egeŋ na day.

²⁵ Gol iriŋ ha ni fok na ɗow, hin a dlara aŋ laɗta tuɗ ha ni duk na ɗegee.

²⁶ Wi dlara aŋ laɗta ki jiviya kay a sun maŋga halaŋ li ni jiviya.

²⁷ Ka aŋ viɗ voɗ maŋga tuɗ bik njuf may, gulu mayɗi. Ҥuɗ dla cora ha ki egeŋ na day.