VUN ŊGOLNA 30 - Boy Lonana

VUN ŊGOL AGURRA Vun ŋgolna vi Agur

¹ Gola ni boy ma Agur, ma goŋ Yakena, damma, nam di boy namma ni maŋ Itiyel, maŋ Itiyel u Ukal.

² Na daŋ may, puluɗ manda ki sura vi suunara, yal man ma sa war kaɗi.

³ An haɗ yal kaɗi, an ka wi yal ma vi suu teteɗnaɗi.

⁴ Sa ma tuɗ ay kolo huulonana ni gege? Sa ma mbay ga col ay kolo huulonana ni gege? Sa ma vi semeɗna kolo hu duk komma ni gege? Sa ma vo yona hu baraw mamma ɦoyna ni gege? Sa namma sem ana mege? Sem goromma ni ana me mayge? Lini aŋ wiya ni dan aya.

⁵ Boy ma Lona damma halaŋŋi ma gasina. Suu ŋgay tasi irimma nammi a mbari masina.

⁶ Cuk va kay boy mammaɗi, kay nam hin vaŋ ki a aŋ hin mbuɗ ki sa ma kaboynaɗi.

⁷ An joɓoŋ tlena ha koŋ na mba. Aŋ hin bay ɦan tle asina ki jew miɗ mannaɗi.

⁸ Ҥuɗun ŋga tara u kaboyna ha ki egen na day. Hinin a an ndi ki haw cocoɗi, kalan ɦiza kanɗi may. Ҥanni tiin ma an a tam fununna doy hol.

⁹ Kay ana hu li ma an hoɓi hoɓmi, tin vunun kaŋgi, hin di ana Yawe Lona ni gege naɗi. Dowba hu li ma an ki haw cocona kal ki a kulla, Suuna hin ŋgulun sem Loonnaɗi may.

¹⁰ Tum u sa sunda eg malam ma nam li sunda varammaɗi, kay a nam hin yaŋ tlena kaŋ aŋ ba kiɗi may.

¹¹ Suu daŋŋa kaa ni ŋgul somoyosi suu njufiina, ka min a gi deɓ maŋ somoyosi suu tamaginaɗi lay.

¹² Suu daŋŋa kaa ni gol tasi ni ana asi ki ni teteɗ, doli ɗini zozoɗta egesira ka ki mbusiɗi.

¹³ Suu daŋŋa kaa ni gol tasi ki ni kolo kay ndarayasina halaŋ, suuna halaŋŋi usi kaŋgaa.

¹⁴ Suu daŋŋa kaa ni siisi funusi ni ko ndal ŋgewina na, giŋ siisi ni ko ŋgew ma digiina na. Asi ni na tok a kom suu hawra kira. Suu ki haw coco duk suunana asi komosi kiyo.

VUN ŊGOL SUU NDUMIYA Vun ŋgol ma daŋŋa olo

¹⁵ Ndaali ndaalira goryoɗ suu tamagina ka na mba' di ana, «Ҥaniya, ɦaniya.» Tlena ka na hindi ni asi ka hoɓbi, fiɗi ɗow ka di ana ndak waraɗi.

¹⁶ Lina vi suu miɗina, cara ta bay vuɗtara, ndaŋgara mbo ka ndakaɗɗira, u kura ka di ana, «Ndak wa na ga.» ɗira.

¹⁷ Ii mayra pan bura, ka min a hum u suŋ ɗira, gagaw ma doŋ lummana hin cooɗ kiyo, u bakŋa hin komoɗ kiyo.

¹⁸ Gola tlesuu su ki kanna ka na hindi, fiɗi ɗow suu an ka wasi usiɗina.

¹⁹ Voɗta vi bakŋa ta kolo huulonara, balam guyna ma tuɗ kolo kay ɦinirana, voɗ lum kawina ta duk mbo lum ma ŋgolnara, u minda sa njufna min duk tam u gootamara.

²⁰ Poyra vi cara li zoŋga ni ko ndaɗta na may. Ndaɗ ti vana ay ti ni kuuɗ vunuɗ ki mbaɗ gaw hin di ana, «An li va ma co kaɗi.»

²¹ Gola tlesuu hindina ndak a geŋeɗ ndaŋgara kiyo, ma fiɗina ni ndaɗ ka ndak oloɗi.

²² Ni goo mbaɓu ma mbuɗ mulnana, sa ma laɓana ɦiz kina.

²³ Cara jiv cora lini sana ɗumuɗu, goo mbaɓura varak ki hu li ma vi malaɗtana.

²⁴ Tlesuu iiri suu gori cocona ka kay ndaŋgara na fiɗi, may ni asi yal coco duk suu wi yalna ɦayna.

²⁵ Mayɦurmura bolow cocoo saɓakaɗ kaɗi, ndaɗ wi yal ma tok tiiɗna ki uɗ kolo hu til ma suuna feɗ tlena ay vona.

²⁶ Vabak ma yam ana daman na ni saɓakam kaɗi. May nam vek zulummi duk ɦinira.

²⁷ Baa jeena mul masi kaɗi may Asi a cuk kira ni tuɗ u tasi bolow cocoo.

²⁸ Ҥoɗogolna sana ndak a vam u kom lay, may nam buu ni hu ziŋ mulnara mbee.

²⁹ Tlena ka na hindi ni gol jivi cocoo. Asi ni fiɗi tuɗ masira jivi ɦay.

³⁰ Dlo ma sem tii coco duk mburinana, nam ka hoŋ ki dagan fun dlaɗi lay.

³¹ Tlek golokŋa tuɗ duk dogonira ni va ma ŋgenem kaɗi. Ŋgekŋa tuɗ u dogoni ɦugunina, mulna fok suu mam suu duuna ni na may.

³² Lini aŋ hal a tli yam taŋ kolo ni kay taŋu, humuŋ gaŋ wa ni, seŋ taŋu, dug koŋ funuŋu.

³³ Waɗ mbiira u gura ni ndak a fi mbulla may. Cira ci kay cinna ni mun busuna ki may. Di dlara ɦonira duk suuna ni, mba ni ci wayra gaw may.