VUN ŊGOLNA 3 - Boy Lonana

Gaɗta kay a hum u Lona

¹ Goonna, humuŋ maa ki kay haɗ mandaɗi, hin huruŋ saa kay gaɗ manda tew tew.

² Ndaɗ hin ɦuɗuŋ buuruŋ fok kay ndaŋgara, aŋ hin fi ni heɓpa ŋgolla.

³ Ɗegeera u gasira ka tuɗ ki egeŋ dayɗi, njunusi keleŋ na tok, ɓiirisi ni kay magaara huruŋ kurufura.

⁴ Aŋ hin fi oora, seŋ hin yi jivi coco fok Lona may, fok suuna lay.

⁵ Hum u Yawe u huruŋ halaŋ. Col kay neeŋ taŋgara ɦawaɗi.

⁶ Hu poy maŋga halaŋŋi humuŋ mba gaŋ kamu, nam hin takaŋ dlara aŋ laɗta halaŋ.

⁷ Ŋga taŋ ko aŋ sa ma wi dla naɗi. Li ni ndaa Yawe na ɗow, ɦal ŋgoroŋ maŋ dla cora.

⁸ Ni hin li a kumu ma kay tliw taŋŋa gaw, ni va ma hin ɦeɓeŋ mbalataŋ jivina.

⁹ Ŋga Yawe u tlesuu ka koŋŋa, u yam tlegeyeŋ suu ne ki fok jewna,

¹⁰ vee maŋŋa hin oy ki u waleerena, sum veŋŋa hin oy ki hu vaaŋ ma em summa na kus.

¹¹ Goonna, noy haɗta vi Yawera kiɗi, huruŋ ɓeŋ kay gaɗta nam ka gaɗaŋgaɗi.

¹² Kay Yawe gaɗ ni sa ma nam minimma, ko ndal buna gaɗ gorom ma nam minim ɦayna na may.

Furira vi sa ma wi dlara

¹³ Furira ka kay sa ma fi yal kina u sa ma di gasira tew tewna.

¹⁴ Kay fira fi gursura ŋgolla u gi lorra ka ndak a li furi sana ko ndaɗta naɗi.

¹⁵ Wira jivi su ɦeɗew mayra jivi ta suuna miniɗ ɦayra. Tlesuu jivi su suuna halasi ɦayna ma nja fun tam u wira kaɗi.

¹⁶ Buu ma ɦu duliyara cocona ka hu kok ma njufna, begera cocora ka hu kok ma ŋgulna lay.

¹⁷ Ndaɗ tuɗummi hu voɗta jivira, ni voɗta heɓpa ka hura.

¹⁸ Ndaɗ ni guna vi iirira kay suu vaɗ ki kosina, furira ka kay suu vaɗ kosina.

¹⁹ Yawe min ndaŋgara ni u yalna, nam vi huulona kolo eŋga ni u gasira may.

²⁰ Wiimba yal ndaɗta nam li zul ŋgolla uɗ ka doɗira, li ɗugulla a ndaɗ si mbo lona ay kaŋgara may.

Yawe njun kay sa ma wi dlara

²¹ Goonna, hin nera u saara jivira a tuɗ ki iriŋ dayɗi, li usi jiviya.

²² Asi hin li ni a iirira vi ŋgus maŋga a oora njuni keleŋga.

²³ Ni aŋ hin tuɗ hu voɗ maŋga ni va ma ŋgeneŋ kaɗi, gu ka daɓaŋ seŋgi lay.

²⁴ Lini aŋ a buu gaa ni va ma laŋ taŋ ndaa kaɗi, aŋ buu ga wa ni sen maŋŋa aŋ buurummi u jivira.

²⁵ Li ndaa ko dlara kafaŋ ay kolo na zakkaɗi, ko ɓalakka mba kay suu conara aŋ laɗ ndaaraɗi lay.

²⁶ Kay Yawe hin li ni a sa ma njunuŋŋa, nam goloŋ seŋ ko daw ma ka guni fokoŋŋa.

Yawe paɗ vunum ki kay sa ma min ndaram ma vok zina

²⁷ Lini tlena ka koŋu ni hin bay a li jivira maŋ suu va ka kosiɗinaɗi.

²⁸ Dik ndaraŋ ma vok zina ana «Tuɗa, aŋ hin hoŋ ay vini an hin ɦaŋ va namma tu wara,» ɗi, doli va namma ka koŋ may ni, aŋ li naɗi.

²⁹ Tin huruŋ ki a li dla cora eg banaŋŋaɗi, nam ka kaki egeŋŋi saa mamba ay tini ni kaŋu.

³⁰ Yal u sa ɦawa na gor bay u dlaraɗi, hu li ma sa namma laŋ va ma co ka egeŋgi lay naɗi.

³¹ Ɓeŋ huruŋ eg sa ma li yara tew tewnaɗi, may tin saa maŋga a li ko nam naɗi kama.

³² Kay suu li dla cora ki ni co ii Yawe da, nam vi galam mamba ni u suu ɗegeena.

³³ Givun ma vi Yawena ka ni kay ziŋ suu li dla cora, may nam paɗ vunum ki kay ziŋ suu ɗegeena.

³⁴ Lini nam ka pan suu may suu pan suuna ni, nam li oora kay suu hoŋ yasi gana may.

³⁵ Suu wi dlara hin fi bibiŋilla. Suu laɓana hin fi ni zolona may.