VUN ŊGOLNA 29 - Boy Lonana

¹ Sa ma so yam ki na so ka hum gaɗta vi saɗina, hin pukŋi cemcem, ka col oloɗi lay.

² Hu li ma suu ɗegeena ka hu ŋgolla ni asina, ni suuna halaŋ furiya. Na may lini sa ma dlam cona a ŋgolla ni namu ni, suuna halaŋ yoora.

³ Sa ma min yalna ɦayna ni bum furiya, may sa ma poy vi gawlaŋiina dewna ba ki ni tlegeyemu.

⁴ U dla mayra ɗegeera laɗ hu zinara ni mulna wul mbassa koloo. May sa ma tin taara kay suuna u saɓakŋana ɓalak mbassa ki may.

⁵ Sa ma ganyam ndaram ma vok zina, gunni bayna fokom tamba tok.

⁶ Suluk ma suu dlasi cona lamma dawna ka guni huwa. Na may sa ma ɗegeena oy ni u furira.

⁷ Sa ma ɗegeena wi dlara ka li suu maŋinara. Sa ma dlam cona ka u yal ma waɗɗi.

⁸ Suu vunusi pan tara mbaa ɦonira vo hu ɦoŋzina. Suu wi dlara heɓ yara ga may.

⁹ Lini sa ma wi dlara a tuɗ fun ɓakŋa u sa ma laɓana ni, nam mbuɗ ni ya lay, li sanni sani lay ni, koɗ taamba kaɗi.

¹⁰ Suu ci maɗna ka wi ii sa ma ɗegeenaɗi, may suu ɗegeena halam um ay gak gak.

¹¹ Sa ma laɓana tak yaamba ki kiɗikŋi halaŋ gaw. Sa ma wi dlara vi tamu, heɓ yaamba kaŋgaa.

¹² Lini mulna vi kaboy ma suuna mba dammana ni, suu mam suu varamma mbuɗ ki ni suu cona bel bel.

¹³ Sa ma hawra u sa ɦizina yasi taɓ kay dlara, Yawe Lona hin gi u dlara ki ii gegelay ni namu.

¹⁴ Mul ma kaɓak ma vi suu maŋina u voɗom ɗegeena mul mamba hin kakŋi na din din.

¹⁵ Tokolora u gaɗta takaŋ yalna, goozoŋ ma hin tam kay saa mamba sak sakŋa mbuɗ sum ki ni zolona.

¹⁶ Hu li ma suu dlasi cona ti mulla wa ni, dla cora zul cocoo. May suu ɗegeena hin wasi hu li ma asi puk ki gana ni asiya.

¹⁷ Gaɗ goroŋŋa aŋ hin kak jiviya. Nam hin oyoŋ huruŋ ki u furira dagan may.

¹⁸ Lini sa ma gi hum suuna kay dlara hin li ha fokka kaɗi ni suuna halaŋ ɓeŋ kiyo, may sa ma li u gaɗtana hin furiya.

¹⁹ Aŋ ka gaɗ sa ma li sunda vo varaŋŋa u boyna ɦawaɗi, kay nam hum boy namma lay ni ka hin li umbi.

²⁰ Aŋ wi sa ma ɓak boyna coco ka saaɗinaɗi su? Sa ma laɓana ni jivi su sa namma.

²¹ Sa ma ɓalak saam ma sunda ay ki u goo tam ka dambina, nam hin mbuɗ ki ni sa kulna ka hum vun saɗina.

²² Sa ma li yara ɦay ɦayna ni tum ɦonira koloo. Sa ma mbuɗ yara zak zakŋa ni li dla cora cocoo.

²³ Sa ma ŋga tam cocona hin hoŋ ki dagani, may sa ma hoŋ yam kaŋgana suuna ŋgaam cocoo.

²⁴ Sa ma li banara u suu kullana tin ii tam ki ni nam kay tamu. Nam hum dla cora suuna daɗ kay suu kulna lay ni nam ka dikiɗi.

²⁵ Ndaa ma lam ko sa warnana gun fokoŋŋi dawna. Sa ma hin tam ko Yawena kaki ni u heɓpa.

²⁶ Suuna bolow coco hal a jiv tasi fok mulina. May ɗegeera col ay ni ko Yawe nam dew, gol gegelay ni u min mamba.

²⁷ Suu ɗegeena pan suu li dla cora. Suu li dla cora pan suu ɗegeena may.