VUN ŊGOLNA 28 - Boy Lonana

¹ Suu dlasi cona yow piira, bay sa dikisi usi ha lay. Na may sa ma ɗegeena buuri ni ko goo dlona na, va ma ŋgenem kaɗi.

² Hu li ma mbassa honira ka hu wa ni mulina zul cocoo. Mbassa kak jivira ni u gaɗta vi sa ma neey ma wi dlara.

³ Mul ma hawra va ka kombina tini zamal suu maŋiina. Nammi ko ndal lo ma paɗ baŋaana coco, ɓalak tlena kina na, gi suuna ki mayra.

⁴ Suu ka min a li u gaɗtaɗina ŋga ni suu li dla cora. Suu min hum u gaɗtana duurusi may.

⁵ Suu dlasi cona ka wi u dlara ɗegeeraɗi. Suu hal Yawe gasina waɗ uɗ ki halaŋ.

⁶ Sa haw ma poy ɗegeena ni jivi su sa ma ɦizi ma poy mamba ka jiviɗina.

⁷ Sa ma hum u gaɗta ni goo ma neeyna. Sa ma poy poyra cora mbaa ni zolona kay bumu.

⁸ Sa ma ɦiz tam u tlesuu kaasi kay suunana, bege mam ndaɗta hin tuɗ ki ni vi sa ma wi hahaw suu maŋinana.

⁹ Sa ma ŋgel humum ki ka min a hum gaɗta vi Lonaraɗina, cen mamba lay ka ii Lona jiviɗi.

¹⁰ Sa ma viɗ suu ɗegeena ki hu voɗta corana, hin ndi ni hu zul mamba nam vegeɗta tok. May suu ɗegeena hin fi jivira a joosina.

¹¹ Sa ma ɦizina gol tammi ana nam neey cocoo. May sa ma haw ma neeyna ndak a tukumu.

¹² Sa ma ɗegeena ti wa ni suuna ŋgaam cocoo. Sa ma dlam cona col ay kolo wa ni, gegelay ni ŋgay tam kiyo.

¹³ Sa ma baa coomba kaŋgana ka fi vadi. Sa ma di coomba, hiniɗ ki gasi mayna, hin fi oora vi Lonara may.

¹⁴ Furira ka kay sa ma fuɗ tam ki ko dla corana. Sa ma hurum co ɦayna dlara yoora hin mba kam may.

¹⁵ Ko dlona u bosogoona bay a vi tlena na, suu dlasi cona kaki kay suu hawra ni na may.

¹⁶ Mul ma ka neeyɗina las suuna cocoo. Sa ma ka min a vi warak ma kul ko saɗina ni buu mamma kay ndaŋgarana hin ɦuɗ foko.

¹⁷ Sa ma ci maɗ ma ka u busuna kamma, pii liŋŋa ta ta tuɗ tew zulumu. Sa ma vam duk kaɗi.

¹⁸ Sa ma hoŋ tam kaŋga hu poy mambana hin suɗ kiyo. May sa ma yow dlara kom mba mbana hin puk ki kaŋga hu taa dew.

¹⁹ Sa ma horok sene mammana hin fi tiimma. May sa ma hoŋ irim ki eg dlara ɦawarana hin ndi ki hawra.

²⁰ Sa ma ɗegeena paɗvunna ka kam cocoo. Sa ma min a ɦiz tam na zak gawna ka hin bay kal daŋgayɗi.

²¹ Ɓorow ii suuna ni ka jiviɗi. Sana ndak a kal hu dla cora kay fu ma mbuluk vunna dewna.

²² Sa ma liŋ ki dagan begera babana gol ni u iira cora. Nam ka wi ana may ŋgolla ndi kammi ndaɗuraɗi.

²³ Sa gaɗ ndaramma hu dlarana hin fi oora su sa ma di dlara ganyamba.

²⁴ Sa ma kul gi bum u sum di ana, «Ni ka li vaɗina.» ni ko ndal suu kul suu buu suuna ki voɗna na tok.

²⁵ Sa ma mayam ŋgol coco ka hoɓbina ni sa ma tum yara kolona. Sa ma hin tam ko Yawena hin fi tlena halaŋ.

²⁶ Sa ma hin tam kay saa mamba sak sakŋa ni sa ma laɓana. May sa ma poy u yalna sa namma hin suɗa.

²⁷ Sa ma ɦal tlena maŋ sa ma wi hawra, sa namma haw va ka cambi. Ma ka min a gol ii sa wi hawɗina hin gam vunna.

²⁸ Hu li ma suu li dla cora yow ki kolona ni gegelay ŋgay tamu. Hu li ma asi ba ki wa ni suu ɗegeena varak, zul may.