VUN ŊGOLNA 27 - Boy Lonana

¹ Ŋga taŋ kay dlara hin li ha vindaɗi. Kay dlara li hu buu ma karamma lay ni aŋ ka waɗɗi.

² Sa daŋŋa ŋgaaŋ ay ni namu, aŋ ka ŋga taŋŋi aŋ tokgi. Sa ma gekŋa ŋgaaŋŋi namu, ka aŋ kay taŋgi.

³ Gogoyra nek cocoo, ŋgetlna nek ɦay lay. may huu sa ma laɓana ɓalak wa ni, nek su tle asina.

⁴ Ko ma ka viɗina ci maɗna, yara ni ko mbo lum ma ɓaɗ coco ɦayna na. may sa ma ndak a col fun gonokka ni gege?

⁵ Gaɗta gaɗ sana ki kiɗikka jivi su banara laɗ u sana ka wam hurumbira.

⁶ Waɗta banaŋŋa waɗaŋga ni ɗegee, furira babali maŋŋa furiyuŋ du'dura ni kaboyna ɦawaa.

⁷ Sa ma hoɓina ndak tay mbul yumma ki ga u semu, sa ma mayra camma tlesuu galaana lay, funummi jeɓeɗta.

⁸ Sa ma tuɗ ki koyra day hin ziim ka kina ni ko ndal layra tin yaɗ piira day hin ziiɗ kira na may.

⁹ Mbulna u mbul ma his jivina furi huuna cocoo. Sa fi bana ma jivi wa ni su kay gaɗta sana daŋga kolo ɦawara.

¹⁰ Noy banaŋŋa kiɗi, banaŋ buŋŋa lay aŋ hinim kiɗi. Hu li ma dlara faŋ wa ni aŋ tuɗ vi wayaŋŋaɗi, ndaraŋ vok zina ma ka egeŋ tokŋa ni mariyaɗ su wayaŋ ma ha ki egeŋ dayna.

¹¹ Goonna, li neeya, ni hurun hin furiya. An hin ndak a hoŋ dira maŋ sa ma pananna.

¹² Sa ma neeyna wi dla cora wa ni, nam ŋgay tam kiyo. Sa ma ka wi dlaɗina kal ha ni duk dlara na ndaa.

¹³ Lini sana kal tam wa a vovoɗta vi sa ma aŋ ka wambina, aŋ vam baraw mamma koŋ balna kay sa ma aŋ ka wambina.

¹⁴ Lini sana sawalla kolo ŋgarapi maɗii na feɗet ana, gi deɓ maŋ ndaram ma zina ni, gideɓ ndaɗta mbuɗ ni ko ndal givunna na.

¹⁵ Zira cuɗ yo lona kaŋ tew tewra, cara vunna coco ɦayra ni ko ndal zi ndaɗta na may.

¹⁶ Sa ma min a seŋeɗna ni ko ndal sana vi semeɗna ɗowba mbulna hu duk komba na.

¹⁷ Kawina mbuɗ ki jivira ni u kawina, sana mbuɗ ɗegee ni u taɓpa ko tam u ndarammara.

¹⁸ Sa ma gol gu tulum mamma jivina hin tam vuɗumu. Sa ma saa kay sa haɗamma jivina ni suuna ŋgaamu.

¹⁹ Ko ndal sana wi ŋgusum ha ki ga duk mbona, huu sana takam ki ni ko ndaɗta na may.

²⁰ Lina vi suu miɗina u li ma ba suuna ka oyɗi. Sana hurum ma min tlena cocona ka hoɓbi lay.

²¹ Li ma vek doonora ay huna kaa, li ma yoo lorra ka may. Sana sem tii ki ni u dlara nam laɗta may.

²² Lini aŋ du sa ma laɓana hu zuzura duk wana lay ni, laɓa mamba ka paɗ ki egembi lay.

²³ Gol timigii maŋsina jiviya, tin saa maŋga jivi kay yoori maŋsina.

²⁴ Kay ana begera ka li ha ni na din dinɗi. Jumba mulla ka li tini kay sa ma dewna ha na gak gakgi lay.

²⁵ Haɗna daɓ kiyo, usu ma wilina daya, suuna yow usuna ay kolo kay ɦinira.

²⁶ Tlimiɗ timigiina ni a cil barawna egeŋga, gamlagina ni aŋ a gus senena u asira may.

²⁷ Mbii ɦuginina ni a tiiŋŋa, a ti ma vi suu maŋsinana, a kakaŋ boyogi maŋ suu sunda iirira may.