VUN ŊGOLNA 26 - Boy Lonana

Dlara kay suu laɓana

¹ Ko ndal dlammagi ma gi hu til zamalla na, ko lo ma paɗ hu til ma feɗ tlena vona na may, ŋgolla vi sa ma laɓana ka ni ko ndaɗta na.

² Ko ndal layɦiira u dlemerekka pii ka kak kaŋgaɗira na, givun ma sana gam bay umma jak ki ni ko ndaɗta na may.

³ Njewɗekka laɗ ni kay korra, njamara ni kay kulumina may, tokolora ni a waɗ sa ma laɓana may.

⁴ Hoŋ dira maŋ sa ma laɓana kay laɓa mambaɗi, kay ka aŋ hin mbuɗ ki ko nam na mayɗira.

⁵ Hoŋ dira maŋ sa ma laɓana ni u laɓa mamba, kay ka nam gol tam ko sa ma wi dlara naɗi.

⁶ Sa ma gi sa ma laɓana vun sundana ni ko ndal nam ka sem ki u tambara na. Nam mbaa kammi vunna ɦawaa.

⁷ Sem sa ma dalira ka tuɗ kaŋga jiviɗi. Boy ma kal ay ki fun sa ma laɓana tuɗ ki cora ni ko ndaɗta na may.

⁸ Sa ma ŋga sa laɓana ni ko ndal sa ma njun gogoyra ki kaŋga hu gewrek gewrekkana na.

⁹ Ko gu ma siina ay ko sa ma gurɗi u summana na. Vun ŋgol ma kal ay ki fun sa ma laɓana ni na may.

¹⁰ Sa ma mun mbuurura ndaɗ vi ni gegelay ma ndaɗ minna. Sa ma vi sa ma laɓana ɗowba sa ma jak voɗ tuɗta ɦawana ni ko ndaɗtana may.

¹¹ Ko ndal dina hoŋ ti vinim ta nam viniɗ kira na, sa ma laɓana hoŋ hu laɓa mamba ni na may.

¹² Aŋ wi sa ma so hurum kay wiimba doy hol ka vi dlaŋ saɗina, sa namma sa ma laɓana ni mariyaɗ suumu.

Boyna kay sa ma zolomba

¹³ Sa ma zolomba di ana, «Vabakŋa ka bunsuwa, dlona ka ki buuri hu voɗta.»

¹⁴ Cokoromma mal ni hu li ma nam gii huna na gaga, sa ma zolomba mbusuk kay lay mamma ni na may.

¹⁵ Sa ma zolomba kal kom hu ŋgoɗta a mbuluk funa, may a mbaaram ay kolo funumba ni loɓ cocoo.

¹⁶ Sa ma zolomba gol tammi ana nam wi dla cocoo su suu may suu wi dlara goy kiɗisiyana.

Vun ŋgol ma daŋŋa

¹⁷ Sa ma tli tam hu dla mayra ndolom kaɗira ni ko ndal sana vi dina u humumba na.

¹⁸ Ni ko ndal sa ma laɓana ŋguf kura ay kamu, mun mbuurura, fi maɗna,

¹⁹ sa ma ganyam ndaram zina hin di ana, «An mbaɗaŋŋi mbaɗi ɦawana» ni ko ndaɗta na may.

²⁰ Hu li ma gu ka oloɗina kura tew kiyo. Hu li ma sa ma ŋgeŋŋa ka oloɗina ni ɦonira seŋ kaŋga may.

²¹ Kimilna ŋgitlik kura, guna vi kura ki kolo may, sa ma ŋgeŋŋa tum yara kolo ni ko ndaɗta na may.

²² Boy ma vi sa ma ŋgeŋŋa ni ko ti ma jivina na, nam tuɗ ni ta ta kaŋga u digiriŋu.

²³ Ko kawina ka taɓ ko tam u luɓunaɗi, boy cona u dlara ti huuna ni na may.

²⁴ Sa ma gonokka jiv tam ki u vunumu, hurum kurufu ni dlara ganyamba may.

²⁵ Lini nam ka di dlara jivira lay ni, caa yaŋ kaɗi, saara cora ŋgay ga u cocoo.

²⁶ Yaamba ndak a baa ki ga duk boy ma nam damma. May duk suuna hu tokka ni ndaɗ hin tak ki kiɗiki.

²⁷ Sa ma vek zulla hoŋ ndi hu zul ndaɗta tok, sa ma lagaɗ ɦinira, ɦini ndaɗta hoŋ ndi ay ni kam tok.

²⁸ Ɓeŋ huu sana u boy cona ni ka wam iiɗira, di boy ma ganyamba ni ɓalakka mba ni ndaɗu.