VUN ŊGOLNA 25 - Boy Lonana

VUN ŊGOL SALOMONDA A MBARA Vun ŋgol ma daŋŋa vi Salomon

¹ Gola ni vun ŋgolna vi Salomon suu vi Ezekiyas, mul ma Yudana taɓ yam vun ŋgol namma ca ni asiya.

² Aygi ŋga Lona ni kay dlara nam laɗ ki ŋgayra. Aygi ŋga mulina ni hu li ma asi ka vi u sun masira ki jivina.

³ Huulona ha hu liim ma kolo dayna, ndaŋgara ka tuɗi kaŋga na day may, ko ndaɗta na saara huu mulinara sa ka waɗɗi.

⁴ Lini aŋ yoo doonora kiyo ni, soɗoɗ yoo ki yoo ni, ndaɗ hin ki na teteɗ u taɗta.

⁵ Lini aŋ dik suu co suu ɓalak mulnana ki wa ni, nam hin ti mul mamba ni saɓak u ɗegeera may.

⁶ Fok mulna ni aŋ li taŋ ko ndal sa ŋgolna naɗi, gi taŋ ki duk suu ŋgolona gawɗi.

⁷ Jivira ni sana yaŋ ay ana, «Jok ay ki kolo tani na dow.» Suu mayra mbuɗuŋ ki zolona fok suu ŋgolonara.

⁸ Dlara aŋ waɗta dik u taŋ zak a tuɗuɗ fun ɓakŋa gawɗi. Lini sa ma aŋ sekemma boy mamma jiviya ni aŋ hin li taŋ ni nanage?

⁹ Njaɗ boy maŋŋa ki fun taŋ u sa ma babali maŋŋa, na may boy ma sa ma daŋŋa cuɗuŋŋa ay ki ŋgayna aŋ ka gam um kiɗi.

¹⁰ Lini aŋ li wa na ni, suuna mbuɗ ɓak co u seŋu. seŋ hin ni ka yi jivi duk suuna oloɗi.

¹¹ Boy ma dam jivina ni ko ndal tassa lorra ma tam ki ndali jivi cocona na.

¹² Gaɗta sa ma wi dlara daɗta jivi kay sa ma humuɗna, ni ko ndal kaɗumba kay kona u ɦeɗew lorra cuk kelnara na.

¹³ Duk faɗta hu li ma suuna a feɗ tlena vona, yo heɓma ni va ma koɗ tara jivi cocona. Ni na may vun sunda sana tuɗ cuɗuɗ jivi ɗegeera ɦeɓ huu malaɗ ma sunum hana ki jivi may.

¹⁴ Sa ma ŋga tam kay ɦalla ka u voɗoɗɗira ni ko ndal ɗugulla lira na, paɗ semeɗna, may ka si mboɗira na.

¹⁵ Juɓpa ɗilira ndak su kay sa ma kaɓakŋa. Boy ma jivina ndak a kus sokŋa kiyo.

¹⁶ Aŋ fi mbul yumma wa ni, ti u mayaŋ doy hol. Suum ki kaŋ wa ni, aŋ hin vinim ki ni kaŋgaa.

¹⁷ Lini aŋ kal poyra vi banaŋŋa cocoo ni loɓom tamu, aŋ hin mbuɗ ki irim bisna lay.

¹⁸ Sa ma di dlara kaboyna kay ndaramma ni ko ndal mbaɗagalla, ŋgew ma digina u mbuurura na.

¹⁹ Sa ma njun u sa li dla cora ni ko ndal sii ma tooyna u sem ma tuɗ dalira na.

²⁰ Yow baraw ma semeɗna ki hu til semeɗna, vo yo ma dlayna ii mbilna ni ko sana gi soolla furira eg sa ma ka hu yoorana na may.

²¹ Lini sa ma babali maŋŋa mayra camu ni ɦam funa nam tiya, lini laara ka camu ni, ɦam yona nam ciya.

²² Aŋ li ka li na ni aŋ yowom kammi murus kura. Yawe hin ɦaŋ warak maŋŋa ni namu.

²³ Semeɗ ma mbayawna mbaa mbo lona aya, ŋgeŋ ma mbuɗum duk kala kalana mbaa ɗeɗna duk suuna may.

²⁴ Kak hu zi cuɓ cuɓ ma goona ni jivi sura cuk hu zi ma ŋgolna ko taŋ u cara vunna cocora.

²⁵ Yo ma heɓi cocona vaŋ laara, boy jivi ma col ay ki kay yam mbassa dayra vaŋ laara ni na may.

²⁶ Yo ma cona u goloŋga ka law jiviɗira ni ko ndal sa ma ɗegee ma ganyam tam ki u boy ma vi sa ma dlam cona na may.

²⁷ Ka jivi a sana kal yumma hurum tira cocoraɗi. May haɗta haɗ u tlesuu ŋgolona ki jivira ni jivi coco may.

²⁸ Sa ma njaɗ dam dam ka ɗil irimbina ni ko ɦoŋzi ŋgol ma gulumun ka gii kambina na.