VUN ŊGOLNA 24 - Boy Lonana

Vun ŋgol ma daŋ ma zeɗ zeɗna

¹ Tin saa maŋga kayra vi suu li dla coraɗi. poy u asiɗi lay,

² kay hurusi ki tinni kay a li dla cora doy hol, vunusi njaɗ ni dla cora sak sak.

³ U wira wi dlara aŋ ndak a min zira. U wi ndaɗta aŋ ndak minni zira eŋga.

⁴ U wi ndaɗta huu zira hin oy ki u tlege suu jivina, suu gol jivi ɦayna.

⁵ Sa ma wi dlara ɦayna oyra u saɓakŋa cocoo. Sa ma wi dlara wul ni saɓak mamma kolo na ɗow ɗow.

⁶ Olo, aŋ ndak a li duuna ni, gol u dlara ki koŋ jiviya. Aŋ su ay kay suuna ni u gaɗta vi suuna zeɗ zeɗ suu ka neeŋŋa.

⁷ Sa ma laɓanaa ka ndak a vi yal kambi. Duk tokka lay ni, nam ka mal vunum ki a di boyɗi lay.

⁸ Sa ma ka u saara li dla cora tew tewna. Asi yam ana sa ma cuk suuna kel tasina.

⁹ Laɓara saa maɗta dew daŋŋi dla cora gaw. Sa ma pan suuna ɦayna ni babali ma vi suunana.

¹⁰ Lini aŋ ndi ki ndaana ko dlara faŋga ni, saɓak maŋŋa mbuɗ ki ni maŋira.

¹¹ So taŋ suɗ suu asi kaasi ɓakŋa kasi a casi kina kiyo, suu asi hal a casi kina aŋ suɗusi kiyo.

¹² Ka aŋ di ana, «Dla ndaɗta an ka waɗɗi.» Lona wi dla ndaɗta ni namu lini nam di ni gasira ɗowba kaboyna. Nam hin kaɓakŋa kay gegelay ni u dlaamba nam laɗta.

¹³ Goonna, aŋ ti mbul yumma kay nam jeɓet cocoo. Se yumma yam buurura funuŋ jeɓet cocoo.

¹⁴ Yalna mba li funuŋŋi na may. Lini aŋ fam wa ni, aŋ hin kak jiviya, saa maŋga ha fokka ka mbuɗ maŋiɗi.

¹⁵ Li yal ma a mbaa dla cora kay sa ma ɗegeenaɗi. Ɓalakam liim ma nam koɗ tam huna kiɗi.

¹⁶ Kay sa ma ɗegeena puk kaŋga ni yam na kiɗisiya lay ni, nam hin col koloo, na may sa ma dlam cona sem ndi ni hu dlara yoora.

¹⁷ Lini sa ma babali maŋŋa dlara ka lamu ni aŋ furi kambi, aŋ ka zaŋ lam sora um lii na ɗowɗi.

¹⁸ Kay ana Yawe waŋ li na ni, hurum ɓeŋ egeŋgi, nam hin mbuɗ ummi kaŋ gaw may.

¹⁹ Ɓeŋ huruŋ ki eg suu li dla coraɗi. Mbuɗ huruŋ a li dlara asi laɗtaɗi.

²⁰ Kay suu li dla cora, vaasi ma ha fok na ɗow kaɗi. Pindilla vi suu li dla cora hin tew kiyo.

²¹ Goonna, li ndaa Yawe. Li ndaa mulna may. Taɓ taŋ u suu li ɦoniraɗi. Li ɦoni u suu mba' asinaɗi.

²² Kay ana dlara hin ndi kay suu li ɦonira ni na zak. Dlara mbay ndaɗta sa ka wiɗi, mbaaraɗ ay ni mulna kala, Yawe kala ni sa wiɗi.

Nera daŋga a wi dlara VUN ŊGOL SA WI DLARARA A MBARA

²³ Gola, wanni yal ma daŋŋa olo. Hu li ma aŋ tuɗ fun ɓakŋa wa ni, col ki ŋgoo sa dewɗi.

²⁴ Sa ma njun u sa li dla cora ana, «Maŋŋa ni jiviyana» sa namma ni suuna halaŋ gam vunna, njaf suuna halaŋ ka ŋgaam dukusi oloɗi.

²⁵ Suu may suu gaɗ sa ma li dla corana, asina ni paɗvunna ka kasiya. Asi hin fi jivira may, suuna hin ŋgaasiya.

²⁶ Hoŋ di mayra gasi u voɗoɗ ɗegeera ni bana mayra gasira.

²⁷ Li sun maŋga ki bunsu ii suuna halaŋ, laɗ ki kiɗik hu sene maŋŋa, ŋgoo dagan aŋ hin ndak a min ziiŋŋa kiyo.

²⁸ Di dlara kay ndaraŋ ma vok zina bay waɗ uɗ ki koŋgi. Aŋ min a viɗ taŋ u boy ma aŋ damma su?

²⁹ Ka aŋ di anaba, «Nam lan na ni, an min lammi na may. An li sana ni u dlaamba nam laɗta naɗi.»

Dlaŋ sa ma zolomba

³⁰ An jak ay fun sene ma vi sa zolomba fun sene gutlu gutlu ma vi sa saɓakam kaɗina.

³¹ Huu sene mamma ki oyra ni u tlesuu siina, usuna hu sene mamma cocoo, gulumun ma ŋguy kay senenana bow ki kaŋga lay.

³² An golom ki jivi u hurun cocoo, hu gol ndaɗta ni an fi dlara haɗtanda ay huwa.

³³ Buu sen funun ew, koɗ tan ew. Maɗ u furun ki nde, ɗuɗ koŋ huruŋ na ɗuɗ.

³⁴ Poyra aŋ poy kolo ɦawa nara ni hawra mbay egeŋŋi ndaɗ gaw may. Mayra hin gaɓiira keleŋŋi ko ndal ɦeɗewna na.