VUN ŊGOLNA 23 - Boy Lonana

¹ Lini aŋ kak a ti funa wa u sa ŋgolna ni gol sa ma ay kaki fokoŋŋa jiviya.

² Lini aŋŋi sa ma kurfukka ni njun vunuŋ kolo jiviya.

³ Tin huruŋ kay tiim ma jivinaɗi. Kala asi tiniŋŋa fokoŋŋi a ganaŋ yaŋ u namba.

⁴ Loɓ taŋ coco kay a hal ɦizaɗi. Hin saa ndaɗta kiyo.

⁵ Aŋ tin saaraŋ wa kay begera ni ndaɗ u garaŋga uɗu, pii ko ndal bakŋa na tin iriɗ kolo huulona.

⁶ Ti funa u sa ma saaram conaɗi tin huruŋ kay tiim ma jivinaɗi.

⁷ Kay saa mamba hurumba tini ni kay tamba gaw. Nam daŋ ana, «Tiya, ciya» na may hurum ka dlaɓi u aŋ dewɗi.

⁸ Fu ma aŋ likim dewna aŋ hin vinim kiyo. Ni aŋ ɓeŋ boy maŋ ma jivina ki ni ɦawaa.

⁹ Di boy maŋŋa ki maŋ sa ma laɓanaɗi. Kay nam ka caa yam kay boy maŋŋaɗi.

¹⁰ Jak ki kay ii hakara somoyoŋ suu jewna ŋgaaɗ ka ki day dayraɗi. Kal ki hu sene ma vi goo ma kuyunaɗi.

¹¹ Kay sa ma njun kasina saɓak cocoo. Nammi sa ma hin a saasi sukulusina.

¹² Tin huruŋ jivi kay haɗta sana ka haɗaŋgara. Tin humuŋ jivi a hum boy ma nera.

¹³ Hin gogoona bay gaɗambi. Waɗta waɗam u njewɗekka ni ka cam ki ni ciiɗi.

¹⁴ Hu li ma aŋ ka waɗam nana, aŋ suɗum ki ko dlara hu duliyara ga tani wanda ni suɗi na ɗow.

Nera sana ne gorommara

¹⁵ Goonna, lini aŋ wul wa ɗiliya ni, an hurun hin furi uŋ coco may.

¹⁶ Hu li ma an ka hum aŋ di boy ma ɗegeena na ni tan lan furira cocoo.

¹⁷ Mbuɗ huruŋ a li dlara gi sulukŋaɗi, hu buuna halaŋ aŋ li ni ndaa Yawe na ɗow.

¹⁸ Aŋ li wa na ni, balamaŋ ka hin ki ɦawaɗi, saa maŋga ka mbuɗ maŋiɗi lay.

¹⁹ Goonna, aŋ hum ha jiviya, aŋ mba li ni a sa ma yalna. Aŋ tuɗ ni hu voɗta ɗegeera.

²⁰ Kal taŋ duk suu ci summa guruɗ tasi kinaɗi. Tuɗ u suu godlom tliw ma komba ɦaynaɗi lay.

²¹ Kay sa ma guruɗ tew tewna u sa ma kurfukka ndi ki ni hawra. Sa ma buu senna cocona cukŋi njooro baraw ma haarina.

²² Hum vun buŋu, nammi sa ma vuɗuŋŋa. Gol suŋ lalasɗi, kay ndaɗ mbuɗ ki ni maari.

²³ Haɗ taŋ a li ni gasira, gusuɗ kiɗi, na lay hal yalna, haɗta, u nera may.

²⁴ Bu goo ma ɗegeena ni furi cocoo. Sa ma vuɗ goo ma wi dlarana hin furiya.

²⁵ Hin gi buŋ u suŋ furi na may. Suŋga vuɗuŋ kira ni aŋ laɗ huruɗ furira.

²⁶ Goonna, ɦal huruŋ ki manu, ko dlara an laɗta mba li iriŋ jiviya.

²⁷ Na daŋ may, gawlaŋga ni zulla yaɗ derewra. Cara daŋga ni goloŋga uɗ kaŋga dayra.

²⁸ Ndaɗ gun taɗ ki fokoŋŋi ko bay ma vi suuna na. Ndaɗ ɓalak njufiina ki cocoo.

Dlaŋ suu guruɗ u summara

²⁹ Sa ma kaki hu yoorana ni gege? Sa ma ka hu ci wayra tew tewna ni gege? Sa ma suuna cam bay uɗna ni gege? Sa ma ka hu furirana ni gege? Sa ma ka yi kolo fun ɓakŋa ni gege? Sa ma irim gol golla cora ni gege?

³⁰ Ni suu ka guruɗ u summa tew tewna. Ni suu ka hal sum ma yara tew tewna.

³¹ Gol sum veŋŋa ana irim tlawra jivira ɦay naɗi. Nam gol jivi hu verra may ni, ɓaɗ ni na zak gaw.

³² Dlaamba daɓ ki ni ko ndal guy ma eɗ sana na. Yaŋ mbuɗ ko ndal magi eɗeŋ eɗi na.

³³ Iriŋ mbuɗ wi tlena na zeɗ zeɗ. Saa maŋga ka di dla mayra u voɗoɗta oloɗi lay.

³⁴ Aŋ mbuɗ ki ni ko sa ma ka buuri duk mbo lum ma ŋgolna na. Ni ko ndal sana buu ha ki kolo kay lum kawinara na.

³⁵ Hu li ma iriŋ ɗil ki wa ni, aŋ hin di ana, «Asi poŋonni an tan ka tanɗi lay, Asi waɗanni an ka wi kon dewɗi lay. An joɓ tan ana, na ni an hin dliɗ ki ni saɓage? An hin hoŋ joɓ kay summa olo.»