VUN ŊGOLNA 22 - Boy Lonana

¹ Sem ma tii jivina ni jivi su begera. Oora ni jivi su doonora u lorra.

² Sa ma ɦizina u ma ɦawra ni fun tasi dew. Yawe lasi jakŋi namu.

³ Sa ma ɗilina wi dla cora ay wa ni nam ŋgay tam kiyo. May sa laɓana tuɗ ha dukuɗ na ndaa ndaa, hin lam may.

⁴ Vuɗta vi hoŋ yamba gara ni ndaa ma lam u Yawena, ɦiza, ŋgara u iirira, ni warak mamma.

⁵ Tlesuu siina u dawna ka guni hu voɗta vi sa ma li dla cora. Sa ma gol iiri mambana tuɗ ki na day eg tle asina.

⁶ Haɗ dlara jivira ay maŋ goozoŋŋa u goo tam gaw. Lini nam mbuɗ maa lay ni ka viɗ ki oloɗi.

⁷ Sa ma ɦizina kak mulna kay sa ma hawra. Sa ma ka balna ki ni mbaɓu ma vi sa ma ɦam balna ay kamma.

⁸ Sa ma zaa dla cora hin feɗ ni dla cora may. Tokolo mamba li saɓakŋara kus ki wa.

⁹ Sa ma wi hahaw suuna hin fi paɗvunna, kay nam ɦal fuumma ki maŋ suu ɦawra.

¹⁰ Dik sa ma pan tara kiyo, ni ɦonira hin tuɗ ki may. Ci wayra ka hin a li oloɗi lay.

¹¹ Sa ma min sana u hurum ma haɓma njaɗ boy ma jivina ɦay mayna, mulna ni banamma.

¹² Yawe njun kay wira gasira. Suu dlasi cona nam bulumusi boy masina kiyo.

¹³ Suu zolomba di ana, «Dlona ka kiɗiki, ki coli hu voɗta, an tuɗ wa ni nam can kiyo.»

¹⁴ Vun cara gawlaŋŋa ni zul ŋgolla uɗ ka doɗira. Sa ma huu Yawe ɓeŋ egemma ndi huwa.

¹⁵ Kemba hurusi minni dlara ka u tafaɗiira. Njewɗekka waɗasira dikisi dla ndaɗta ha ki egesiya.

¹⁶ Lassa las sa ma hawra ɦizimmi ɦizi na ɗow. Ҥal tlena ha maŋ sa ma ɦizina ni gam ki ni hawra na ɗow.

VUN ŊGOL SA WI DLARARA Boy ma nera irim zeɗ zeɗ dok-hindi

¹⁷ Tin humuŋu hum boy ma nera. Tin saa maŋga kay yal manna.

¹⁸ Aŋ vam huruŋ wa ni aŋ hin furiya, boy manna hin li kawi funuŋŋi na tew tew.

¹⁹ Kay a saa maŋga li tinira ni kay Yawe doy hol. Cemi ni an min haɗaŋu.

²⁰ Gola an ɓiiriŋ tlena ka na zeɗ zeɗ dok-hindi, ni kay gaɗta u wi yal dlara.

²¹ Ni kay a aŋ wi boy ma gasina kiyo, a aŋ njaɗ boyna halaŋŋi u ɗegeera, maŋ suu sunuŋ hana.

²² Ɓaɗ vana ki ko sa ɦawra ana nam ɦawi naɗi. Balak ɓak ma vi sa ma sa ka kambina kiɗi.

²³ Kay Yawe ka njun ay kasiya. Nam hin vi iirira vi suu lasisina kiyo.

²⁴ Vi banara u sa ma hurum ɓeŋ ɦay ɦaynaɗi. Fuɗ taŋ ki ko sa ma min yara ɦayna.

²⁵ Kay ana ka aŋ tlam dlaambaɗi. Hin a iiri maŋga vi hu bay ndaɗtaɗi.

²⁶ Kal taŋ a sa ma vovoɗta vi saɗi. Gi taŋ duk bal ma kammaɗi.

²⁷ Kay ana lini va ma warakka ka fi koŋgi ni lay maŋ ma aŋ buu kamma lay asi tlam kiyo.

²⁸ Jak ki kay ii hakara somoyoŋ suu jewna ŋgaaɗ ka ki day dayraɗi.

²⁹ Aŋ wi sa ma li sun mamba jivi maa su? Sa namma ndak a tak tam ii mulina. Ka kak duk suu may suu ka duk ndufundanaɗi.