VUN ŊGOLNA 21 - Boy Lonana

¹ Huu mulna hu duk ko Yawe ni ko ndal mbo ma ɓaɗna na, nam ndak a ɓaɗam aragelay u min mamba.

² Voɗta vi gegelay ni gol irimmi jiviya. May Yawe ni sa ma gol huu sana kurufuna.

³ Sa ma li dlara ɗegeera u jivira ni jivi ii Yawe su ɓivunna.

⁴ Ii mayra gol golla ŋga tara u huu ma ŋga tara ɦayna, saɓak ma vi sa ma dlam cona, halaŋ ca ni sulukŋa.

⁵ Sa ma saa dlara ki saa hin laɗ tuna hin mbuɗ vana. May sa ma li dlara bay saaraɗ uɗ ki layna, may ŋgolla hin ndi kamu.

⁶ Suu ɦiz tasi u begera faɗ ay u ganyambana cuk tasi ni hu miɗna ɦawaa.

⁷ Kormodlara vi suu dlasi cona tuɗusi ni hu li ma baasi kina, kay asi ka min a poy poyra ɗegeeraɗi.

⁸ Poyra vi sa ma ci maɗnara ni guniya. May sunda vi sa ma ɗilina tuɗ ni ɗegee u voɗoɗu.

⁹ Mariyaɗ ni buu u ŋgus zira kiɗikŋi jivi sura buu kalafi ko taŋ u cara vunna cocora.

¹⁰ Sa ma dlam cona min a li dla cora ni eg suuna halaŋ. Banamma lay ni nam ka hinimbi.

¹¹ Daŋgay ma vi sa ma ŋga tam ɦayna ni haɗ yalna maŋ sa ma laɓana. Sa ma wi dlara ndak a haɗ dlara coco u boy namma.

¹² Suu ɗegeena li tasi jivi coco ko zi ma vi suu dlasi cona. Asi zuɗ u suu cona ha duk dla cora.

¹³ Sa ma ŋgel humum ki eg tii ma vi suu maŋinana. Nam tamba hin yi kolo ni ka fi hoŋ diraɗi may.

¹⁴ Ŋgomba aŋ ŋgom sana ki ŋgayra heɓ yara kiyo. Siira sii vana kalam hu mbumbuna vi sana enda heɓ yara ŋgol cocora gaa.

¹⁵ Sunda ɗegeera furi huu sa ma ɗegeena cocoo. May ni ndaɗ mbuɗ sa ma li dla cora ndaari.

¹⁶ Sa ma viɗ voɗta gasira kina hin tuɗ koɗ tammi duk suu may suu ka duk ndufundana.

¹⁷ Sa ma min luuna ɦayna ka fi vaɗi. Sa ma min summa u ti ma jivina cocona ka ɦizɗi.

¹⁸ Sa ma dlam cona ni va ma buɗ sa ɗegeena ay kina. Dlara nam min a kal sa ma ɗegeena hura hin ndi hu ni nam tok.

¹⁹ Mayra kak ki ŋgoo bagi na wassa jivi su mayra ɗum cara vunna coco ta ɓeŋ huuna tew tewra.

²⁰ Ay ndak a fi tlesuu jivina toki kolo u sa ma wi dlara. May sa ma laɓana ti tlegeyem ki ni bel bel ka ɗok vaɗi.

²¹ Sa ma hal ɗilira u ɗegeerana hin fi iirira, ɗegeera u ŋgara.

²² Sa ma wi dlara ɦayna ndak a tli zi ma saɓak cocona kiyo. Nam ndak a toosi gulumun ma ŋguy kay ɦoŋziisinana ki gaa.

²³ Sa ma ŋgom vunum u sinim jivina suɗ tam ki ni ko dla cora.

²⁴ Sa ma tli yam kolona ma ŋga tam ɦayna semmi ana sa ma pan suuna. Nam li dlara halaŋŋi u ŋga taamba.

²⁵ Sa ma zolomba hurum ŋgiziɗ kay tlena vi suunana hin cam kiyo kay kom ka min a tin eg va ma liɗi.

²⁶ Maɗiira nam ɗik faɗta ni u hurum ma haɗ kay tlena vi suunana. May sa ma ɗegeena ɦal tlena ha ki ni ka ŋgay vaɗi.

²⁷ Ɓivun ma vi suu dlasi cona ka jiviɗi. Kay asi li ɓivun masina ni u mbambara.

²⁸ Sa ma di dlara kaboyna hin ba kiyo. May sa ma wi yal ma jeɓee dlara ki jivi tuna, hin wi dlara nam a daɗta may.

²⁹ Sa ma dlam cona so hurum kay dlaamba. Sa ma ɗegeena li dlaamba ki ni jivi u voɗoɗ ɗegee.

³⁰ Yal ma vi sa warnana, neemba u mbeleŋ mamma halaŋ ka ndak a col fok Yaweɗi.

³¹ Sana min tam ki u kulum mamma a juɓ buu ma yara, may a gasira saɓak ma ti ay fun duunana col ay ni ko Yawe.