VUN ŊGOLNA 20 - Boy Lonana

¹ Sum veŋŋa ni va ma pan suuna. Ergena mbuɗuŋ sa ma hoo vunna. Sa ma hin tam a guruɗ u tle asinana ka wi dlaɗi.

² Ndaa mulna li suuna ni ko ndal ndaa dlona hu li ma nam gi ŋgoɓpara na. Sa ma ɓeŋ huu mulnana hal a ba ki ni iiri mamba.

³ Sa ma ka taɓ tam duk dlara ci wayraɗina ni sa ma suuna ŋgaamma. May sa laɓana tuɗ kal tammi dukka gayara.

⁴ Sa ma zolomba ma ndol ni nam ka min a horokgina. Hu li ma suuna feɗ tlena vona ni nam ka fi vaɗi may.

⁵ Saara kurufu huu suunara ni mbo goloŋga kaŋga dayra, sa ma ɗili ma wi dlara hin gooɗ ni namu.

⁶ Suuna bolowo ka ŋga tasi kay ɗegee masira, may a fi gasi sa ma ki na ɗegeena ni loɓ cocoo.

⁷ Sa ma ɗegeena tuɗ ni hu voɗ mamba na ɗegee may. Furira ka kay goryom suu hin ka ŋgorom daganna.

⁸ Mulna hu li ma nam kak kay dlamba mulla wa ni ɓorow ii dla cora nam waɗta ki halaŋ.

⁹ Sa ma ndak di ana, «An mbus coonda ki wa, suluk ka kan oloɗina» ni gege?

¹⁰ Kelew ma ŋga nekka u voɗombina u tassa ma mbuɗum zeɗ zeɗna, tle asina jakŋi ka ii Yawe jiviɗi.

¹¹ Wi goozoŋa ni eg sun mamba nam laɗta, lini nam li sunda ki jivi ɗegee.

¹² Humba ni a hum boyna, iira ni a wira. Asi jakŋi Yawe lasi ni namu.

¹³ Buu senna a gi taŋ ki hawraɗi. Col kolo mal iriŋ kiyo lini aŋ min fi fu ma ti funuŋŋa.

¹⁴ Sa ma gus vana di ana, «Ka jiviɗi, ka jiviɗi.» Hu li ma nam gus va namma ha wa ni nam hin furiya.

¹⁵ Lorra kaa, ɦeɗew ma jivina ka lay. Va ma jivi su tlena belna ni boy jivi ma kal ay ki fun sa ma wi dlara.

¹⁶ Fokom baraw mamma kay nam kal tam a vovoɗta vi sa ma koyna. Vam balna kay nam vi kam a warak ki kay sa namma.

¹⁷ Ti ma fam ay u ɦaramba ii sana jiviya. May hu li ma nam gam ha funumma ni vunum oy ki ni u jeremma.

¹⁸ Dlara aŋ a laɗta saaraɗ ki jiviya. Ni aŋ hin ndak kaɗu. A tuɗ duuna ni aŋ ndum suu maŋsina u tlena ki jiviya.

¹⁹ Sa ma gi u dlara ŋgayra kina ni sa ma ŋgeŋŋa. Vi galamba u sa ma njaɗ coconaɗi.

²⁰ Sa ma ŋgul bum u summa iiri mamba hin tew ki ni ko ndal pindilla tew ki duk njeŋgera ŋgollara na.

²¹ Ҥiz mayra faɗ kolo na pokolla ka kak ta taɗi.

²² Di ana, «An min hoŋ cora sana landa egenda ki may naɗi.» Tin huruŋŋi kay Yawe nam hin suɗuŋ kiyo.

²³ Yawe ka min ŋga tlesuu ka ŋgaasi u voɗosiɗinaɗi. Kelew ma ŋga nekka ki keŋ dewna ni ka jiviɗi.

²⁴ Sem sana tuɗ jivira ni u Yawe. Sana ndak a wi ana nam ka tuɗ ni arage?

²⁵ Sana a di na zak ana vana wanni teteɗ ni ka jiviɗi. Ŋgoo dagan aŋ wi ana suura aŋ suu taŋga ni coo.

²⁶ Mul ma wi dlara ni ba suu dlasi cona kiyo, nam tuɗusi pupus ma to wana ki kasiya.

²⁷ Musukka vi sa warnara ni a pindilla vi Yawera. Ndaɗ wi dlara ka huu sana kurufura ki halaŋ.

²⁸ Ɗegeera u jivira ka gol yam mulna ni asiya. Dlam mamba mulla tini eŋga ni u ɗegeera.

²⁹ Bibiŋil gorzoŋiinara ni saɓak masina. Suu maarina fi ŋgara ni u tlimiɗ yasira haɓpa may.

³⁰ Mbil balafna ni a kumu ma vi corana. Poŋga poŋ sana tuɗ ta ta eg iiri mamba.