VUN ŊGOLNA 2 - Boy Lonana

Yalna ni bege ma ŋgayna

¹ Goonna, lini aŋ van boy manna, lini gaɗ manda iriŋŋi ko ndal begera na,

² lini aŋ tin humuŋ jivi a haɗ yalna, aŋ tin huruŋ kaŋga en a hum gasira,

³ na daŋ may, lini aŋ li dlara ɗilira lini aŋ cenni gasira,

⁴ lini aŋ halaɗ ko suuna hal gursuna na, lini aŋ vegeɗ ko ndal suuna veg doonora ay gara na,

⁵ na ni aŋ hin wi ndaa may ma lam u Yawena, aŋ hin fi wira vi Lonara may.

⁶ Kay Yawe ɦal yalna ay ni namu, yal ma wira u gasira cuk ay ki ni funumu.

⁷ Suu may suu ɗegeena nam ɗokosi fira ha ni masiya, ko ndal mbarina ii sa ma poy ɗegeena na.

⁸ Nam njun kay sa ma tuɗ hu voɗta ɗegeera. Nam ka ŋgom poyra vi suu mam suu ɗegeena.

⁹ Ni aŋ hin hum u dla mayra di ana, jivira, lalamba u ɗegeerara kiyo, u tlesuu tuɗ hu furirana halaŋ.

Yalna suɗ sana ko dla cora

¹⁰ Yalna hin kal huruŋu, wira ndaɗta hin laŋ huruŋ furira.

¹¹ Ɓorow mayra ɓorow ii dlara kira hin goloŋu. Gasira hinni vara a ŋgomoŋ gak gakka.

¹² Yalna suɗuŋ ay ki hu poyra cora ko suu a daŋ dla cora kaŋŋa halaŋ.

¹³ Maŋ suu may suu hin voɗta ɗegeera tani tuɗ ki hu voɗta ndufundana,

¹⁴ suu hurusi furi kay dla corana, mbeleŋ ma li dla cora furuyusi hurusi ni namu,

¹⁵ voɗta asi tuɗuɗta ki guniya, asi poy ni hu voɗta gunira.

¹⁶ Kay ndaɗta aŋ suɗ taŋ ki ko cara li dlara zoŋga ta ka ganaŋ yaŋ u boy ma jivinara.

¹⁷ Ndaɗ hin banaɗ ma ay u way taɗna kiyo. Humuɗ maa galamba asi vaɗ fok Lona hu ɗum masirara kiyo.

¹⁸ Voɗta tuɗ varaɗta ni voɗta vi miɗnara, sa ma tuɗ varaɗna kal tammi fun miɗna.

¹⁹ Sa ma tuɗ ha varaɗna ka hoŋ ay ki daganɗi, ka fi voɗta tuɗ hu iirira oloɗi lay.

²⁰ Poy maŋga mba li ni poyra vi suu gaaraŋŋa, aŋ gol ni poyra vi suu ɗegeena.

²¹ Suu ɗegeena hin hin kay yam ndaŋgara ni asiya. Suu ɗilina hin lak hu ni asi hol.

²² Suu dlasi cona hin yowosi ki kay yam ndaŋgara. Suu boyosi ka jiviɗina hin paɗasi ki ko ndal guna na.