VUN ŊGOLNA 19 - Boy Lonana

¹ Sa ma hawra ma di dlara jivira ni jivi su sa ma ɦizi ma njaɗ dlara kaboyna.

² Dla mayra laɗ bay saara ka jivi kay sanaɗi. Sa ma dik u tam kay dlara ɦayna hin bay fi coraɗi.

³ Hu li ma laɓara vi sa ma giniŋŋa ɓalakam voɗ mamba ki wa ni, nam mbuɗ ki yara eg Yawe.

⁴ Begera zul ndum banara bolow cocoo. Sa ma hawra banam ma kom dewna hal a busum ki lay.

⁵ Sa ma di dlara kaboyna ka puruɗ ki ko daŋgaynaɗi. Sa ma ka li zolo dlaɗina ka suɗ kiɗi lay.

⁶ Suu saa vunusi vi mulnana bolow cocoo. Sa ma ɦal tlena suuna cocona suuna halaŋŋi banayamma.

⁷ Gorseŋ sa ma hawra halaŋ ka wam iiɗi. Banayamma ni su suura, asi njay ki egem bel bel. Nam hal a njaɗ u asi lay ni sa ka dew oloɗi.

⁸ Sa ma hal dlara ɗegeera minni tamu. Sa ma min gasira tew tewna hin kak jiviya.

⁹ Sa ma di dlara kaboyna ka puruɗ ki ko daŋgaynaɗi. Sa ma di dlara kaboyna ba ki ni tamba.

¹⁰ Sa ma laɓana ka ndak a ɦizɗi. Mbaɓuna ka ndak a gaɗ goŋ mulnaɗi may.

¹¹ Sa ma neeyna ka tak yaamba kiɗi. Nam tin ŋgol mamba ki fok dlara a ɓalakam hurumba.

¹² Yara vi mulnara ni ko ndal dlona gi ŋgoɓpara na. May oo mamba ni ko ndal mbaɗagira gi hum usunara na.

¹³ Goo ma laɓana ni hahawra ka kay bumba. Cara vunna cocora ni ko doy ma irim cooy, cuɗ yona ki gak gakŋa na.

¹⁴ Sana ndak a tli zi ma vi bumma, yowom bege mamba may, cara ɗili ɦayra ni ɦalla vi Yawera.

¹⁵ Zolomba kal sana hu yoora. Sa ma zolomba mayra cam tew tew.

¹⁶ Sa ma hum u gaɗta vi Lonara suɗ ni iiri mamba. Sa ma dla ka tam tambina ba ki ni tamu.

¹⁷ Sa ma wi hahaw suu maŋina ka ni balna kay Yawe. Nam hin hoŋomma kiyo.

¹⁸ Gaɗ goroŋŋa hu li ma nam mbuɗ ki a wi dlarana. Lini aŋ ka gaɗambi ni nam ba tam ki ni ɦawaa.

¹⁹ Sa ma li yara ɦayna nam mba warak kay coom ndaɗta. Hinim wa ɦawaa ni nam joo ha fokŋi joori na ɗow ɗow.

²⁰ Hum u dlara suuna daŋgara, vi gaɗta kaŋu, aŋ hin mbuɗ ni sa ma wi dlara.

²¹ Dlara suuna min a laɗta hurusi oy bolow cocoo, may minda vi Yawe col ay wa ni hin li ni na tuwa.

²² Va ma minim ko sa warnana ni ɗegeera. Olo ni sa ma hawra ni jivi mariyaɗ su sa ma kaboyna.

²³ Ndaa ma lam u Yawena tuɗuŋ hu iirira. Aŋ jak njeŋgera ki ni dlara hahaw ka kal ay hu ziiŋgi.

²⁴ Sa ma zolomba kal kom hu ŋgalna ni ka hoŋ kom ay kolo funumbi.

²⁵ Lini aŋ poŋ sa ma ŋga tamma, sa ma laɓana hin ne tam may. Lini aŋ gaɗ sa ma wi dlara ni yal mamma ɦuɗ ha ni fok na ɗow.

²⁶ Goo ma las bum may, dik sum ki mayna, ni goo ma zolona caŋ um cocona ma ka ŋga saɗina.

²⁷ Goonna, lini aŋ ka min a hum nera suuna neeŋga oloɗi ni wiiŋga aŋ waɗ ginda hin viɗ ki iriŋu.

²⁸ Sa ma di ki ma ka wi vaɗina panni ɓakŋa. Vun sa ma dlam cona di ni dla cora.

²⁹ Gaɗta tiniɗ ni kay suu pan ndarayasinana. Poŋga ni kay cee suu laɓana may.