VUN ŊGOLNA 18 - Boy Lonana

¹ Sa ma godlomba li ni u min mamba na dew. Lini sa a gaɗamu ni nam mbuɗ yara gaw.

² Sa ma laɓana ka hum dlaŋ saɗi. Nam tak ki ni dlara ay hurumba.

³ Sa ma cona mba wa ni gonokka mba ni ndaɗ gaw may. Sunda cora mbay ni zolona.

⁴ Boy ma kal ay ki fun sa warna ni mbo ma um zul cocona, nammi sari nera u yalna, ni mbo ma law cocona.

⁵ Col ki ŋgoo sa ma dlaamba cona, mbuɗ boy ma vi sa ma ɗegeena ki cora ni ka jiviɗi.

⁶ Boy ma vi sa ma laɓana mbaa duk suuna ni ci wayra. Boy ma nam damma mbuɗ ni honira.

⁷ Vun sa ma laɓana kalammi hu ba kira. Vunummi a daw ma ka guni fokomma tok.

⁸ Sa ma ŋgeŋŋa boy mamma ni ko ti ma jivina na, nam tuɗ ta ta ga u digiriŋu.

⁹ Sa ma li zolomba kay sun mambana ni wayaŋ sa ma ka ɓalak tlena kina.

¹⁰ Sem Yawe ni zi mayra mini eŋ coco ta ŋgayra. Suu ɗegeena ŋgay tasi huwa ni suɗ kiyo.

¹¹ Begera vi sa ma ɦizina ni a ɦoŋziim ma saɓak cocona, u saa mamba nam goloɗ ni a gulumun ma ka to ki ko saɗina.

¹² Jew sana bay ndi ga tu ni, nam ŋga tam cocoo. Jew sana a fi bibiŋilla ni nam hoŋ yam ga may.

¹³ Sa ma hoŋ dira zak bay jeɓee u dlara kina ni sa ma laɓana, zolona hin vamu.

¹⁴ Huu sana ma ana nam min kak iiriyana dorom tuguɗiira ki kamu. May sa ma may kak ma iirina ka kambina sa ma hin colom kolona ni gege?

¹⁵ Huu ma jivina hin fi yalna may. Hum sa ma wi dlara ka hal ni yalna.

¹⁶ Tlesuu sana ɦasi maŋ suunana malam voɗta ha ki fokomu, tuɗ tewem ki fok suu ŋgolona.

¹⁷ Sa ma gijaŋ a ɓak kay dlara jewna gol ana boy mamma ni ɗegee, may sa ma babalira varak ay wa ni hin mbuɗum boy mamma ki cora may.

¹⁸ Suura ɓorow duk suu li yara ki zak. Ndaɗ daɓ ci wayra duk suu gaaraŋŋara kiyo.

¹⁹ Wayay ma hurum ɓeŋŋa dlam loɓ a su ɦoŋzi ma saɓak ma ka dik ko saɗina. Honira ni ko erje ma dug vun grekŋa na.

²⁰ Sana hin hoɓ hayammi u boy mam ma nam damma. Boy mamma hin ɦam va ma nam a tamma ni namu.

²¹ Miɗna u kak ma kak iirina halaŋ col ay ni eg boy ma aŋ damma. Va ma aŋ lamma aŋ hin tammi vuɗum may.

²² Sa ma fi carana fi ni jivira. Nam fi ni oora vi Yawera.

²³ Sa ma hawra ɓak dlara ni u cenda, may sa ma ɦizina hoŋ dira ni u bayra.

²⁴ Banara zuluɗ cocora viɗiŋ kiyo. May banaŋ ma kosokosona su waya sura.