VUN ŊGOLNA 17 - Boy Lonana

¹ Mariyaɗ ni muɗ heɓelek fuuŋ ma eŋŋa u heɓpa ni sura funa oy egeŋ ɦik u vunna kam ɦur ɦurra.

² Mbaɓu ma ɗegeena su kay goo vuɗ ma li dlara zolona, nam hin fi jona duk gorsem suu daŋŋa may.

³ Zul mayra veg doonora kaa. Caf mayra yoo lorra ka may, may Yawe dew ni sa ma gol huu suuna.

⁴ Sa ma dlam cona jeɓee ni dla cora sak sak. Sa ma kaboyna hummi dlara ganyamba.

⁵ Sa ma pan sa ma hawra panammi malam ma lamma. Sa ma furi kay wihawra vi suunana ka suɗ ki fun ɓakŋaɗi.

⁶ Bibiŋilla vi suu maarina ni gor ŋgologi masisina. Kemba ni ɦeɗew ma njuni kel somoyosina.

⁷ Boy ma jivina ka kal huu sa ma laɓanaɗi. Su olo ni boy ma kaboyna vi mulna kaɗi.

⁸ Sa ma ɦal tlena suuna ɦawana gol ɦal mamba ni ko kumuna na. Nam saa ana nam tuɗ ni aragelay ni hin fi jivira huwa.

⁹ Sa ma min a baa cora vi banara kom zeɗ zeɗ. Sa ma ɓak cora ki tew tewna bus banara kiyo.

¹⁰ Dira di sa ma ɗegeena kay coombara lam jivi, su waɗta waɗ sa ma laɓana na kissa.

¹¹ Sa ma dlam cona hal ni dlara garak u suuna a yara. May sa vun sun ma dlam cona ka day ay kamu.

¹² Mariyaɗ ni ko aŋ ŋgaf ni u bosogo ma goryom ba kina. Jivi sura aŋ ŋgaf u sa ma laɓana u tafaɗi mambana.

¹³ Sa ma varak dla cora ki balam jivirana, yoora ka hinim ziim kiɗi a fafaɗta.

¹⁴ Gijaŋ a li honira ni ko ndal aŋ ka voɗ mbona ay ki a nam ɓaɗta na. Jew bay gijaŋ yara tu ni mariyaɗ ni hiniɗu.

¹⁵ Njun u sa ma li dla cora ɗowba kal sa ma ɗegeena hu cora, tle asina jakŋi Yawe ka minisiɗi.

¹⁶ Gursu ma ko sa ma laɓana hin li ni mege? Nam a hin gus u nammi yalna su? Doli ɗini nammi sa ma yam kaɗina.

¹⁷ Banaŋŋa miniŋŋi hu lina halaŋ. May wayaŋŋa ni kay a mbaa dlara ci wayra ay vora.

¹⁸ Sa ma kal tam a vovoɗta kay bal ma vi ndarammana ni sa ma laɓana.

¹⁹ Sa ma min honira ɦayna kal tammi hu sulukŋa. Sa ma min dlara ŋga tara kal tammi duk ɓalakka.

²⁰ Sa ma hurum co ɦayna ka fi jiviraɗi. Sa ma di dlara ganyamba kal ni hu yoora.

²¹ Sa ma vuɗ goo ma laɓana hurum ki ni ɓalakiya. Bu goo ma ki tafaɗina ka furiɗi.

²² Huu ma furira garaɗ sana ki ko tuguɗiira. Huu ma u yoora tew tewna so mbala ta sana kiyo.

²³ Sa ma kaɓak ma cona vi gursura ay ki ŋgayra ko sana a gun ɓak ma vi sa ma mamma jivina kira.

²⁴ Yalna ka ni njuni vok sa ma neeyna. May ii sa ma giniŋŋa gol ni tlesuu hu duliyara tanina.

²⁵ Goo ma laɓana huu bummi u yoora. Huu cara vuɗumba ni u hahawra tew tew.

²⁶ Gi sa ma ɗegeena daŋgayna ni ka jiviɗi. Poŋ sa ŋgol ma suuna ŋgaamma ci wayra ni u gasira.

²⁷ Sa ma vi vunum kay boyna ni sa ma wi dlara. Sa ma seŋii na en ka njaɗina ni sa ma di dlara jivira.

²⁸ Lini sa ma laɓana seŋ tam wa na enni suuna golommi ko sa ma wi dlara na. Hu li ma nam ka njaɗɗina suuna wammi a sa ma neeyna.