VUN ŊGOLNA 16 - Boy Lonana

Yawe u dlara sana laɗ hu buuna tew tewra

¹ Suuna saa dlara a laɗta. May sa ma li dla ndaɗta kina ni Yawe.

² Dlara sana laɗta halaŋ gol irimmi jivi bel. Na may Yawe ni sa ma wi huuna ay kurufu dayna.

³ Tin dlaaŋga aŋ min a laɗta halaŋ fok Yawe, ni dlaaŋ ndaɗta hin li kiyo.

⁴ Yawe li dlaamba halaŋŋi u min mamba. Hu buu ma hahawra vi suu cona lay.

⁵ Suu ŋga tasina halaŋŋi ka ii Yawe jiviɗi. Hu buu ma daɓpa ni nam ka hin bay kaasi ɓakŋa kasiɗi.

⁶ Cora bulum ki ni u ɗegeera u jivira. Sana suɗ tam ki ko dla cora ni u ndaa ma lam u Yawenana.

⁷ Lini poyra vi sana ii Yawe jiviya ni nam heɓem duk hoŋom ki u suu babali mamsina lay.

⁸ Va ma aŋ fam koŋ ew u voɗom jivina, jivi su ma sana tok tlena ay u ɦarambana.

⁹ Huu sana ka saa voɗta nam a tuɗ hura, may Yawe gol sem sana ma tuɗ huna ni namu.

Boy ma kay mulinana

¹⁰ Mulna ɓakŋi boy ma ay fun Lonna. Hu li ma nam kaɓakŋa ni ka viɗɗi, nam ka ni ɓak ma gasina.

¹¹ Tlesuu ŋga nekka halaŋŋi ko Yawe. Nam min ana nek tlena halaŋ li fun tasi dew.

¹² Li dla cora ni co kay mulna, kay mulla kak eŋga ni u dlara ɗegeera.

¹³ Oora vi mulnara ka ni kay suu di dlara ɗegeera. Nam minni suu ɓak dlara u gasira.

¹⁴ Yara vi mulnara ndak a kal sana ki maɗna. May sa ma wi dlara ndak a heɓem yaam kaŋgaa.

¹⁵ Lini vok mulna ka gol ki jivi u sanda ni iirira gaw. Jivi mamba ni ko ndal mbo lo ma heɓ tara na.

Kak ma suuna lak taɓi ko tasina

¹⁶ Haɗta haɗ yalna jivi su lorra, Vi wira u nera jivi su gursuna ki na day.

¹⁷ Voɗta vi suu ɗegeena ka tli hu li ma conaɗi. Sa ma min a gol iiri mamba ni li tam jivi hu poy mamba.

¹⁸ Sana a ɓalak kira va ma fok jewna ni ŋga tara. Jew sana a daɓ semba ni va ma kal ay ki funumma ni ɓii tara.

¹⁹ Mariyaɗ ni kal taŋ duk suu ɦaw suu hoŋ yasi gana, sura poy ko taŋ u suu ŋga tasinara.

²⁰ Sa ma saa ki coco tu saa, hin li dlara tuna fi jivira. Sa ma ɦal tam ko Yawena furira ka kamu.

²¹ Sa ma kaɓakŋa u yalna ndak yammi a sa ma neeyna. Boy ma lalamma kal kay suuna jivi cocoo.

²² Yalna ni mbo goloŋga vi iirira kay sa ma lalamma. May gaɗta vi suu laɓana ni tafaɗina.

²³ Sa ma wi dlara a njaɗta ni nam saa ki tuwa. Kay ndaɗta mbuɗum a sa ma wi dlara dira ni na.

²⁴ Boy ma jivina ni ko mbul yumma na, nam fun sana jiviya, suɗ sana ki may.

²⁵ Aŋ saa ana voɗ maŋga ni ɗegee su? Kala ndaɗ li tuɗuŋŋi hu li ma maɗna kalage.

²⁶ Mayra zuɗ sa ma li sunda a sun coco ni ndaɗu. Vunum ma dora zuɗum ha ni namu.

²⁷ Sa ma dlam kaɗina njay kolo ni kaboyna ɦawaa. Vunum ŋgal tara ni ko ndal kura na.

²⁸ Sa ma ŋgeŋŋa ɦayna cukŋi dlara honira duk suuna. Sa ma yowmusna ɓorow duk sana u banamma kiyo.

²⁹ Sa ma ci maɗna ganyam suu daŋŋa tuɗusi ki hu voɗta cora.

³⁰ Sa ma dug irim ki kay dlara seŋ tam ki na yerek yerekŋa, hal ni dla mayra cora a lira. Nam faɗ wa ɗow.

³¹ Tlimiɗ yamba haɓpa ni jum ŋgalla kuluɓi kay sanara. Kay basara coco kay ndaŋgara ni warakŋa vi ɗegeera.

³² Sa ma hurum ka mbuɗ ya na zakgina ni jivi su sa ma saɓak cocona. Sa ma saɓak kay hurum doo tamma su bigawla ma ti yara ay tew tewna.

³³ Suuna tin garira a wi dlara hin li ha fokka. May Yawe dew ni sa ma hin hoŋ dira ay kina.