VUN ŊGOLNA 15 - Boy Lonana

¹ Hoŋ di mayra jivira heɓ yara kaŋgaa. May boy cona joo yara ay kolo ni joori na ɗow ɗow.

² Sa ma wi dlara ɓak boyna ni suuna humum boy mamma jivi cocoo. May sa ma tafaɗina njaɗ ni dlara uɗ kaɗira ɦawaa.

³ Ii Yawe ka ki hu lina halaŋ, wi suu cona u suu jivina halaŋ.

⁴ Boy ma so huuna ni guna vi iirira. Boy ma cona ɓalak huu sana kiyo.

⁵ Sa ma laɓana ka vi vun bumbi. Sa ma hum gaɗta jivina ni sa ma ɗilina.

⁶ Sa ma ɗegeena tlena kom vo huu ziim cocoo. May begera faɗ ay u li iira mbaaraŋ kaŋŋi dlara hahawra.

⁷ Boy ma vi suu wi dlara ka tak haɗta, may suu laɓana ni va ka kasi na dewɗi.

⁸ Ɓivun ma vi suu dlasi cona ka ii Yawe jiviɗi. Nam tin humummi kay cenda vi suu ɗegeena.

⁹ Poyra vi suu dlasi cona ka ii Yawe jiviɗi. Nam minni suu may suu hal a li dlara ɗegeera.

¹⁰ Gaɗta ŋgolla ka kay sa ma calaɗ voɗta kina. Sa ma ka hum u nera ka neembaɗina hin miɗ kiyo.

¹¹ Yawe wi dlara ka li ha hu lina vi suu miɗinara halaŋ. Nam wi saara ha kurufu huu sanara ki ni su olo.

¹² Suu ŋga tasina ka min hum u gaɗta vi saɗi. Asi ka tuɗ a joɓ dla eg suu wi dlaraɗi lay.

¹³ Huu ma ki jivina tak ki hu vok sana kiɗikki. Huu ma ɓalakina mbaa ay ni yoora hu ŋgus maŋga.

¹⁴ Huu ma ɗegeena hal ni yal ma wi dlara. Vun suu laɓana min ni dlara tafaɗira.

¹⁵ Buu ma vi sa ma yoora halaŋŋi coo. Iirira vi sa ma ka furi tew tewna ka ni u ayra.

¹⁶ Mariyaɗ ni hin taŋ hawra hum u Yawe, ni jivi su mayra aŋ ɦiz taŋ ki u begera ɦaramba.

¹⁷ Mariyaɗ ni ti mbala dlemma u minda jivira, su mayra ŋgaɗ bolo mbutl ma ɗorina u vunna hu cocora.

¹⁸ Sa ma mbuɗ yara ɦay ɦayna mbaa ɦonira duk suuna. Sa ma sip dlara heɓ huu suuna kaŋga may.

¹⁹ Voɗta vi suu zolomba tlesuu siina huruɗ cocoo. Voɗta vi sa ma ɗegeena ki toori jiviya.

²⁰ Goo ma wi dlara cocona furi huu somoyom cocoo, may ma laɓana ka ŋgaasiɗi.

²¹ Sa ma ka wi dlaɗina furi kay dlara tafaɗira. Sa ma neeyna tuɗ ni hu voɗ mamba na ɗegee.

²² Lini aŋ a li dlara ka joɓ saɗi ni, dla ndaɗta ka liɗi. Dlara li ki jivira ni u gaɗta suuna daŋ ay duk zeɗ zeɗta.

²³ Furira ka coco kay sa ma wi yal hoŋ dira ɦayna. Boy ma dam eg liim na ɗegeena jivi cocoo.

²⁴ Sa ma neeyna tuɗ ni hu voɗta tuɗum hu iirira. Nam hin voɗta tuɗum hu maɗnara kiyo.

²⁵ Yawe to zi ma vi suu ŋga tasina kiyo. May nam col zi ma vi cara donara eŋe.

²⁶ Yawe ka min mbeleŋ ma lam a li dla coranaɗi. Boy ma dam jivina irim jiviya.

²⁷ Sa ma godlom gursura cocona mbaa ni dla cora kay suu mamsina. Sa ma ka hin tam a sa gusum ki u bege ɦawaɗina hin furi may.

²⁸ Sa ma ɗegeena saa dlara ay ki saa hin hoŋ dira ni na tuwa. May sa ma dlam cona vin ha ki ni boy ma cona sak sak.

²⁹ Yawe col ha ki eg suu dlasi cona ni na day. Nam ka hum cenda vi suu ɗegeena.

³⁰ Golla gol u iira jivira furi huuna cocoo. Boy ma ayra ɦal saɓakŋa maŋ sana.

³¹ Sa ma tin humum jivi a hum nerana hin cuk ziimmi duk suu wi dlara.

³² Sa ma ka hum haɗta vi saɗina las ni tamu. Sa ma ka hum nera vi suunara ni sa ma hin fi saara jivirana.

³³ Ndaa ma lam u Yawena haɗ yalna maŋ suuna. Jew a fi bibiŋillara ni hoŋ yamba kaŋgara.