VUN ŊGOLNA 14 - Boy Lonana

¹ Cara wi dlara min ziiɗ koloo. Cara tafaɗira bowom ki kaŋgaa.

² Sa ma poy poyra ɗegeera li ni ndaa Yawe. Sa ma poy poyra cora panni Yawe may.

³ Sa ma laɓana di ni boy ma ŋga tara sak sak. May boy ma vi sa ma wi dlara njun kamu.

⁴ Sa ma mbutl ma zum ka kombina, vee mamma ni va ka huɗi. Mbutli suu li sunda coco ɦayna mba tlena ay vo cocoo.

⁵ Sa ma diki ma gasina ka kaboyɗi. Sa ma diki ma cona njaɗ ni dlara kaboyna sak sak.

⁶ Sa panna hal yalna ni ka fambi. Sa ma saa dlara ki jivi tuna fi yalna ni na zak may.

⁷ Poy ko taŋ u sa ma laɓanaɗi, kay aŋ ka ndak a hum dlara haɗ ay funumbi.

⁸ Sa yalna fuɗ tam hu poy mamba kay nam sa ma wi dlara. Sa ma laɓana viɗ tam ki u giniŋ mamba.

⁹ Sa ma laɓana ka caa yam a ɗoɓ coombaɗi. May suu ɗegeena jivira ka kasi tew tew.

¹⁰ Huu sana wi dlara ka tam tamba ni namu. Sa ma daŋ ka ndak a kal furi mamba ha hurumbi.

¹¹ Zi ma vi suu dlasi cona hin hawaɗ kiyo. May mbutluɓ ma vi suu ɗegeena hin weleɗ na gak gak.

¹² Sana gol tam ana poy mamba ni jiviya, doli ɗini poy ndaɗta tuɗummi fun miɗna.

¹³ Sana vunum san may, hurum kurufu oy u yoora, furira tuɗ daɓ taɗ ki ni u yoora.

¹⁴ Sa ma ɦay ɦayra hin fi warak ɦay ɦay mamba. May dlara vi sa ma ɗegeenara ni jiviya.

¹⁵ Sa ma giniŋŋa vi dlara suuna daɗta halaŋ. May sa ma neeyna li dlaamba ni u saara tuwa.

¹⁶ Sa ma wi dlara li ndaa cora fuɗ tam ki koɗu. Sa ma laɓana taɓa ha kay dlara halaŋ, gol ana va ma lam ka huɗi.

¹⁷ Sa ma mbuɗ yara na ɦay ɦayna ni sa ma laɓana. Sa ma mbuɗ duk u ŋgeŋŋa cow cowna, sa ka yam sem jiviɗi.

¹⁸ Suu ka wi dlaɗina, vaasi ma asi famma ni laɓara gaw. May suu ɗilina joosina ni wira yalna.

¹⁹ Suu cona hin hom yasi ga fok suu ɗegeena. Suu dlasi cona hin lakŋi vun grekŋa vi suu ɗegeena.

²⁰ Sa ma hawra ndarayam suu zina lay, sa ma wam ii kaɗi. Sa ma ɦizina banayamma ka ndumbi.

²¹ Sa ma pan ndarayam suu vok zina li ni sulukŋa. Sa ma wi hahaw suu hawrana, furira ka kamu.

²² Suu saa saara cora viɗ tasi ki ni viɗiya. May ɗegeera u jivira ka ni kay suu may suu li dlara jivira.

²³ Sunda halaŋŋi, fiiɗna kaa. May ɦay ɦayra, vaaɗ kaɗi.

²⁴ Suu wi dlara warak masina ni begera asi faɗta. Suu laɓana ka ndak a hin giniŋ masira kiɗi lay.

²⁵ Sa ma diki ma gasina suɗ iirira vi suuna bolowo. May sa ma kaboyna viɗ suuna kiyo.

²⁶ Saɓak ma ŋgol cocona ka hu ndaa ma lam u Yawena. Kay goryommi nammi li ma ŋgayra.

²⁷ Ndaa ma lam u Yawena ni mbo ma iirina, Nam suɗ suuna ki hu bayra vi maɗnara.

²⁸ Mul ma suu mamsina bolow cocona suuna ŋgaamu. Ma suu mamsina ka ŋgolɗina ni mul mamba hin bulum kiyo.

²⁹ Sa ma ka mbuɗ ya na zakgina ni sa ma suuna humumma. May ma mbuɗ yara zak zakŋa tak ki ni laɓa mamba.

³⁰ Huu ma haɓma ni iirira vi mbalata sanara. May yowmusna ni mbil mbeŋ ma ay duk sokŋa dayna.

³¹ Sa ma las suu maŋina las ni malam ma lamma. Sa ma wi hahaw suu hawrana ŋga ni malasi ma lasina may.

³² Cora vi sa ma dlam cona vam ga ni ndaɗ tok. Hu buu ma miɗna lay, Sa ma ɗegeena, ɗegee mamba suɗumu.

³³ Yalna buu ni huu sa ma neeyna. Na ni duk suu ka laɓana ni ndak fam dukusi na lay su?

³⁴ Ɗegeera wul suuna foko. Dla cora ni zolona kay njaf suuna halaŋ.

³⁵ Mulna ŋga ni sa ma li sun mamba ɗegeena. Nam tak yaamba ki ni eg sa ma mbaa dlara zolona kay suuna.