VUN ŊGOLNA 13 - Boy Lonana

¹ Goo ma yalna hum gaɗta vi bumba, may goo ma hurum ki sooy eŋ ndiŋ ndiŋŋa ka hum gaɗta vi saɗi.

² Gegelay fi tiimma ni u boy ma kal ay ki funumma, may iirira vi suu buu suuna voɗna, masira ni ɓaɗta.

³ Sa ma vi vunum jivina suɗ ni iiri mamba. Sa ma vunum ki ŋgooy na ɦoŋŋa ɓalakŋi tamu.

⁴ Sa ma zolomba ŋgiziɗ tlena, ka fiɗi lay. Sa ma li sunda ɦayna hoɓi u tlena may.

⁵ Sa ma ɗegeena ka min kaboynaɗi. Sa ma dlam cona li ni dlara zolona.

⁶ Ko ɗegeera ka njun kay sa ma ɗilina na ni, dla cora ka viɗ sa ma sulukŋa hurum hayna ki may.

⁷ Sa ma min suuna golom ko sa ma ɦizina nana va ka kom na dewɗi. Sa ma min suuna golom ko sa ma hawra nana ni sa ma tlena ka kom cocona.

⁸ Sa ma ɦizina suɗ tammi u bege mamba. May sa ma hawra va ma ŋgenem kaɗi.

⁹ Kiɗikka vi sa ma ɗegeena ka ɗilina ki tew tew. May pindilla vi sa ma dlam cona tew kiyo.

¹⁰ Ŋga tara mba ay ni honira u ciwayra ɦawaa. Yalna kakŋi u suu hum u gaɗtana.

¹¹ Ҥizza sana faɗ kolo na pokolla, ka kak ta taɗi. Begera sana faɗ ha na nde ndera, ɦiz ndaɗta ka daɓbi.

¹² Saara jok ha fokŋa ɗow ɗowra ɓalak huuna kiyo. Vok dlara ha tli fokoŋ dewra ni gu ma vi iirirana.

¹³ Sa ma ka vi vun saɗina ba ki ni ɦawaa. Sa ma hum u gaɗtana hin fi warakŋa.

¹⁴ Haɗta vi sa ma wi dlara ni ɦizza vi iirira, a suɗuŋ ki ko bayra vi maɗnara.

¹⁵ Sa ma ɗilina suuna ŋgaam cocoo. May sa ma alam alamma tuɗ hu voɗta ba kira.

¹⁶ Suu wi dlara li dlaasira halaŋŋi u voɗoɗu. Sa ma laɓana tak ki ni laɓa mamba.

¹⁷ Sa ma vun sun ma cona puk kaŋga hu dlara yoora. Sa ma vun sun ma ɗegeena ni kumu ma garaɗ tuguɗiira kina.

¹⁸ Sa ma ka hum dlaŋ saɗina hin ndi ki hawra, suuna san um cocoo. Sa ma hum gaɗta suuna dambara ni sa ma suuna hin ŋgaam ɦayna.

¹⁹ A jivira ni dlara aŋ tin huruŋ kaɗ a laɗta daɓaɗ kiyo. Kay ndaɗta suu laɓana li ndaana a hin voɗ masira cora kira.

²⁰ Sa ma poy ko tam u sa ma wi dlara hin mbuɗ sa ma wi dlara. Sa poy u sa ma laɓana hin kal hu cora.

²¹ Cora ka dik u suu sulukŋa. Jivira ka warak suu ɗegeena may.

²² Sa ma ɗegeena hin joom ka maŋ gor ŋgologi mamsina. Begera vi suu dlasi cona ka tinira ni maŋ suu ɗegeena.

²³ Sene ma vi sa ma hawra day tlena jivi cocoo. May nam hin ɓalak ki ni ko suu cona.

²⁴ Sa ma ka min gorombina ka poŋombi. Sa ma min gooromma ni nam poŋomu.

²⁵ Sa ma ɗegeena tiya, hoɓ lay. May sa ma dlam cona buu ni u mayra.