VUN ŊGOLNA 12 - Boy Lonana

¹ Sa ma min haɗta minni wira. Sa ma ka hum dlaŋ saɗina ni laɓaa.

² Sa ma li jivira yi ay ni oora vi Yawera kamu. Sa ma hal mbeleŋ ma cona, Yawe kaam ɓakŋa kamu.

³ Sana ka ndak a col eŋ u hurum ma co ma nam lammaɗi. May sari sa ma ɗegeena ma kali ki kaŋgana ka geŋeɗɗi.

⁴ Cara ɗili ɦayra ni jumba kuluɓi kay njufuɗna. May cara ɦay ɦayra ni mbil mbeŋ ma ka duk sok njufuɗna may.

⁵ Suu ɗegeena saa ha ni kay dlara jivira. Suu cona saa a li ni dla cora may.

⁶ Boy ma kal ay ki fun sa ma dlam cona ni daw ma guni gaa ci maɗnana. May vun suu ɗegeena suɗ sana kiyo.

⁷ Hu li ma suu dlasi cona daɓ ki wa ni, asi ka oloɗi. Suu ɗegeena hin coli eŋga gak gak.

⁸ Suuna ŋga ni sa ma li dlara jivira. Sa ma saaram ka ɗegeeɗina sa ka dam dlaamba jiviɗi.

⁹ Sa ma haw ma li sun mamba fi tiimmana su sa ma ŋga tam coco, va ma ti ka varambina.

¹⁰ Sa ma ɗegeena wi may yoori mamsina. May sa ma dlam cona ka wi hahaw vaɗi.

¹¹ Sa ma horok sene mamma kina, may ka cambi. Sa ma ba lina ki kay sunda daŋga ɦawana ni sa ma yam kaɗina.

¹² Sa ma ka wi Lonaɗina ŋgiziɗ tlesuu suu cona ɦurumusi ayna. May ɗilira vi suu ɗegeena fi tlena aya.

¹³ Sa ma dlam cona kaboy mam ma nam kaamma vam hu zewna wa. Sa ma ɗegeena hin suɗ ki kay lassa.

¹⁴ Sana hoɓ hoɓ ma jivina ni u boy mam ma nam damma. Gegelay fi ni warak sun mamba nam laɗ u bik komba.

¹⁵ Sa ma laɓana dlaamba nam laɗta irim jiviya. Sa ma hum gaɗta vi suunara ni sa ma yalna.

¹⁶ Sa ma laɓana tak yaamba ki ni na zak gaw. May sa ma wi dlara siɓ ŋgulla, ka mbuɗ ya zakgi.

¹⁷ Sa ma di dlara gasira tak ki ni sunda ɗegeera. Sa ma dikina ma bay gasina tak ki ni kaboyna.

¹⁸ Sa ma njaɗ cocona dlaamba dak tara ni ko ŋgewna na. May boy ma vi sa ma ɗegeena garaɗ sana kiyo.

¹⁹ Sa ma ɗegeena basa na din din kay ndaŋgara. Sa ma kaboyna buu mamma hu duliyara ni ko cemek iira ɦawa na.

²⁰ Suu saa saara cora oy hurusi ni kaboyna sak sak. May suu ka gaɗ ndarayasinana oy hurusi ni furira may.

²¹ Dlara co ka mba kay sa ma ɗegeena na zakgi. Suu dlasi cona dlara hahawra fasi cocoo.

²² Yawe ka min suu kaboynaɗi. Nam minni suu may suu li dlara gasira.

²³ Sa ma ɗegeena ka tak mbeleŋ mamma ki kiɗikgi. Suu laɓana bu dlaasira ki ni kolo ii suuna halaŋ.

²⁴ Sa ma li sunda cocona hin mbuɗ a mulna. Sa ma zolomba ni mbaɓu ma vi suunana.

²⁵ Huu ma haɗ kay tlena ɓalak sana kiyo. May boy ma jivina furi huu sana may.

²⁶ Sa ma ɗegeena tin ndaramma hu voɗta jivira. Voɗta vi sa ma dlam cona viɗim ki ni viɗiya.

²⁷ Sa ma zolomba ka fi tliw ma ŋgoo bagi a cufɗi. May sa ma li sunda ɦayna ci ay ni tliw ma jivina.

²⁸ Hu voɗta ɗegeera iirira ka huwa. Dla cora tuɗuŋŋi hu miɗna may.