VUN ŊGOLNA 10 - Boy Lonana

VUN ŊGOL SALOMONDA Vun ŋgolna kay poyra ɗegeera

¹ Vun ŋgolna vi Salomon. Goo ma wi dlara ɦayna furi huu bumu, goo ma laɓana sum huruɗ ɓalak ki cocoo may.

² Begera faɗ u li iira ka mbuɗuŋ vaɗi, may va ma fam u zamalaŋŋa mbuɗuŋ a kak iiri din din.

³ Yawe ka hin sa ma ɗegeena a mayra cambi, may sa ma dlam cona va ma nam minimma ni nam ka ɦammaɗi.

⁴ Sa ma zolomba ndi ki ni hawra may sa ma li sunda hin ɦiz may.

⁵ Sa ma tok tlena ay ki kolo egem ndolna ni sa ma wi dlara. Sa ma buu kalafi senna hu til ma feɗ tlena vona, ni ana suuna panamu.

⁶ Suu ɗegeena paɗ vunna ka kasi tew tew. Suu cona di dla ganyamba ay duk boy masi ma asi njaɗamma.

⁷ Sa ma ɗegeena hum suuna gasi kay sem tew tew, paɗ vunusi ki kamu. Sa ma cona hum suuna maa ki kay sem na zak gaw.

⁸ Sa ma ɗilina vi u gaɗta, may sa ma di dlara laɓara ba ki ni tamu.

⁹ Sa ma poy u ɗilira tuɗ ni u heɓpa may sa ma tli voɗta gunira hin kal ki ni daŋgayna.

¹⁰ Sa ma ɓak boyna u cemek iiri cukŋi suuna kay tasiya. Sa ma di dlara laɓara ba ki ni tamu.

¹¹ Vun sa ma ɗegeena ni mbo ma law iirira, may vun sa ma dlam cona di ni dla ci maɗna.

¹² Gonokka mbaa ay ni honira, may minda bulum cora ki halaŋ.

¹³ Wira wi dlara faɗ ni fun sa ma ɗilina, may sa ma giniŋŋa tokolora ka waɗ kay ceremu.

¹⁴ Suu wi dlara bege masira tokoɗ kolora ni yal wira, may boy ma vi suu laɓana mbaa dla cora ay ni na cem cem.

¹⁵ Begera vi suu ɦizina gi kasi ni ko gulumunna na, hahawra vi suu va ka kosiɗina baasi kiyo.

¹⁶ Warak ma vi suu ɗegeena tuɗusi hu iirira, warak ma vi suu cona ni sulukŋa may.

¹⁷ Sa ma hum u gaɗtana tuɗ ni hu voɗta vi iirira, may sa ma ka vi vun saɗina viɗ ki ni tamu.

¹⁸ Sa ma ŋgay gonokka hurumma ɓak dlara u ganyamba. Sa ma di dlara ŋgeŋŋa duk suuna ni sa ma laɓanna.

¹⁹ Sa ma kal njaɗta cocona hin bay kal ta co duk huɗi. may sa ma vi vunum min njaɗ cocoɗina ni sa ma ɗilina.

²⁰ Boy ma sa wi dlara damma jivi su doonora, may saara vi sa ma dlam cona ka li va ŋgolɗi.

²¹ Boy ma vi sa ma ɗegeena ɗoɓ suuna bolow cocoo, may sa ma laɓana giniŋ mamba cami ndaɗu.

²² Paɗvun ma vi Yawena ndak ɦiz sana, lassa sana lassa ka fam va ay na ndeɗi.

²³ Sa ma laɓana furi ni kay sunda cora, sa ma ɗilina saa ni kay a wi yal dlara may.

²⁴ Va ma sa ma cona lam ndaaramma, va namma hin mbay kammi namu, va ma sa ma ɗegeena halamma ni hin ɦamma may.

²⁵ Babaana mba wa ni sa ma dlam cona jak ki umu. Sa ma ɗegeena ni u zira ŋgaari ga ka geŋeɗɗira.

²⁶ Ko ndal cinda dlay siina na, ko ndoosna cuk ii tara na may, sa ma zolomba sa ma nam sunumma gol irimmi ko ndal tle asina na.

²⁷ Ndaa ma lam u Yawena ɦuɗuŋ buuruŋ foko, may basara vi suu dlasi cona ka fiyekgi.

²⁸ Juɓpa vi suu ɗegeena ni furira. Saara vi suu dlasi cona viɗ ki ni ɦawaa.

²⁹ Voɗta vi Yawera ni li ma ŋgayra vi suu ɗegeena, may kay suu li dla cora ni ɓalakka may.

³⁰ Sa ma ɗegeena coli eŋga ni na gak gak, ka geŋeɗɗi. May suu li dla cora ka hin a cuk kay yam ndaŋgaraɗi.

³¹ Vun sa ma ɗegeena di ni dlara yalna, may vun suu di dlara bay uɗta hin seŋ kiyo.

³² Vun sa ma ɗegeena di ni dlara furira, vun sa ma dlam cona di ni dla cora sak sak.