VUN ŊGOLNA 1 - Boy Lonana

MAGAARA JEWRA Sok boy ma ɓii magaa ndaɗta kamma

¹ Vun ŋgolna vi Salomon, goŋ Davidna, mul ma Israelna.

² Ɓiirimmi a wi yalna, haɗta u nera, u wi dlara ŋgay gaa hu vun ŋgolna cocona.

³ Kay a haɗ yal ma ki kiɗik na ɗal ɗalna, kaɓakŋa, lalamba u ɗegeera.

⁴ Kay a ne suu giniŋŋa kiyo, haɗ wira u ɓorowra ɓorow ii dlara kira maŋ gorzoŋina.

⁵ Ko suu wi dlara huma, zul u wiisira foko, sa ma neeyna haɗ yal ma tuɗ fok suuna may.

⁶ Ɓiirimmi a haɗ mbeleŋŋa, vun ŋgolna u ndal boyna, boy ma vi suu wi dlara u mbeleŋ masina halaŋ.

⁷ Ndaa ma lam u Yawena ni sok wira ŋgolla gaw. Yalna u haɗta, suu laɓana san u dla ndaɗta ni asi hol.

Nera kay goozoŋ ma dlam cona

⁸ Goonna, hum u gaɗta buŋ ka daŋgara, noy haɗta suŋ haɗaŋgara kiɗi may.

⁹ Haɗ ndaɗta hin mbuɗ ni ko ndal jumba mulla kuluɓi kaŋga na, ko ndal ɦeɗewra cuki keleŋga na.

¹⁰ Goonna, lini gor njufii suu dlasi cona hal a ganaŋ yaŋu ni aŋ minɗi.

¹¹ Lini asi daŋ ana, «Mbay umiya, buuruygi voɗ caygi suuna, aygi tuɗ nduguygi sa ma li va kaɗina.

¹² Aygi likim ki u iiri tam ko ndal maɗna ka cira na. Ay gam ki ga hu zulla ko aygi ni maɗ ma ci suunana na.

¹³ Aygi hin fi tlesuu jivina cocoo, aygi hin oyoygi ziiygi ki u tlesuu vi suunana.

¹⁴ Aŋ hin tli tiliŋŋi u ami dew, warak maygina hin col ay ni ko tam dew.»

¹⁵ Ҥawaa, goonna, tuɗ ko taŋ u asiɗi, ɦuɗ taŋ ki eg voɗta asi tuɗ huruɗta na day.

¹⁶ Kay sesi liŋŋi kay a li dla cora sak sak, asi ɓaɗ tasi ni a vo busuna kira.

¹⁷ Na daŋ may, lini layra wi bay ma sa ma ndoonda gunumma ki wa ni, sa ma ndoonda gunummi loɓ tam ki ni ɦawaa.

¹⁸ Na may asi buu suuna kaŋga ni buu ni tasira tok. Asi ba ki ni iiri masira taɗta tok.

¹⁹ Ni ko ndaɗta na suu kulla ka kul iirira vi suuna, na may asi ba iiri masi tasirara kiyo.

Yira u nera kay wi dlara

²⁰ Yalna ka yi kolo hu voɗ bulna, nam ka oo um kolo eŋga yiya.

²¹ Kolo hu garak voɗta ndaɗ ka yiya. vun grek ma kay ɦoŋzi ŋgolnana ndaɗ ka paɗ bolla ana,

²² «Agi suu giniŋŋa hin hinigi giniŋ magira ki ni saɓage? Suu pan suuna hin hin panda pananda ki ni saɓage? Suu laɓana hin hin noyra noy yalna ki ni saɓage?

²³ Mbaagi ay humungi gaɗ manda. Gola an min kalagi saa manda ha hurugiya, an min takagi boy manna.

²⁴ Kay an yagiya, agi humun kaɗi, an feɗegegi ha lay ni, sa ma caa yam a golon kon kaɗi.

²⁵ Kay agi van gaɗ manda kaɗi. Agi ka min a humun boy mannaɗi.

²⁶ An may ni hin san u hahawra mba kagira ni saniya. Hu li ma dlara ndaana mba kagira an hin panagi ni paniya.

²⁷ Hu li ma dlara ndaana mba ndugugi ko babaa ma ŋgolna na, hu li ma hahawra si ay kagi ko kura nana, hu li ma yoora u lassa hin mba kagina...

²⁸ Asi hin yan lay ni an ka humusiɗi, asi hin halan lay ni, ka fanɗi lay.

²⁹ «Kay ana asi noy wira kiyo. Asi man ndaa ma lam u Yawena kaɗi.

³⁰ Asi min ka a hum u gaɗ mandaɗi. Dlara an daɗta halaŋ asi goloɗ ki ni ɦawaa.

³¹ Na ni asi hin ti ni vuɗ poy masira may, dlaasira cora asi laɗta hin hoɓosi ni ndaɗ may.

³² Wira ka min a wi vaɗira ci suu giniŋŋa kiyo. Tara ka tuɗuŋ ko dlaɗira ɓalak suu giniŋŋa kiyo.

³³ Sa ma humun vununna hin koɗ tamu, va ka lambi, nam ka li ndaa dla cora mbaraɗi.»