TITTA 3 - Boy Lonana

Poyra vi suu vina

¹ Gasi humusi kay asi mba hoŋ yasi kaŋga a hum u suu ŋgolona u mulina, asi mba hum usiya min tasi a li sunda jivira bel.

² Kay asi di boy co maŋ saɗi, kak u heɓpa u jivira, asi tuɗ fok a tak lalam masira eg suuna halaŋ.

³ Aygi lay ni li ay jew ni na, ka li zolo saɗi, ka hum vun saɗi, lagi ni hu cora. Aygi li ay ni mborɓiina vi saara cora u min maygira ɦawaa. Aygi li ay u huu ma cona kay ŋgiziɗ tlena vi suuna, lay cora egesiya, asi layra egey may.

⁴ Hu li ma Lona Sa Suɗta tak jivi mamba u min mamba ki eg suuna halaŋ,

⁵ nam suɗuygi ki ka ana aygi li sunda ɗegeera ka naɗi, ni kay nam waygi hahawaygiya. Nam suɗuygi ni u mbussa vi Musuk Lonara, ndaɗ ɦaygi vuɗta wilira u iirira wilira.

⁶ Lona njay Musuk mamba ki kaŋga kaygi ŋgolo u Yesu Kristu Saaygi ma Suɗta.

⁷ Kay u oo mamba aygi mbuɗ ɗegee fok Lona, ni aygi hin fi iirira ka daɓ kiɗira, aygi ka juɓuɗ u huruygi tini kaɗta.

⁸ Gola ni boy ma gasina. An min ana aŋ col kay boy namma, kay suu tin hurusi kay Lona mba li dlara ɗegeera u sunda jivira. Gola ni dlara jivira ki ndaki kay suuna halaŋga.

⁹ Hin ciwayra bay uɗta kiyo u sem somo suu day dayna, honira u duu ma duu tara kay gaɗta, tle asina hinisi kiyo. Asi ni ɦawaa, dlaasira kaɗi.

¹⁰ Sa ma mbaa ka ira duk suunana aŋ gaɗam yaŋ goy mba', hin hinim kiyo.

¹¹ Aŋ wi ana sana ko wanni na hin voɗta ɗegeera kiyo, coomba tak ana nam ki ni viɗiya.

Gaɗta ŋgoo daganda

¹² Hu li ma an sunuŋ Artemis kala, Tisik kala ha wa ni, aŋ so taŋ a ŋgafan hu Nikapolis ni li ma an min a li vun semeɗna huna.

¹³ Zenas ma kaɓakŋa u Apollos aŋ tli va ma aŋ a njun usi hu poy masira ay koŋu, li a asi mba kaɗak ki dukgi.

¹⁴ Kay suu mayna mba haɗ tasi a li sunda ɗegeera ura jivira, kay a hin ndak a li sun mayra garaŋga, kay asi mba mbay u dlara ɦawaraɗi.

¹⁵ Suu ka egen tanna halaŋ gaŋ deɓpa. Gi deɓ maŋ banayaygi suu tin hurusi kay Lonana. Ko oora kak u agi halaŋ.