TITTA 2 - Boy Lonana

Gaɗta ɗegeera

¹ Aŋ may ni haɗ va ma ɗegee, ma tuɗ u haɗta gasira.

² Di suu maana asi ni suu li dlara u voɗoɗna, suuna hum u boy masina, ɗiliya, li coli eŋ hu tin huuna, u minda, u lalamba hurusi lay.

³ Di boyogi suu maana poy masira mba li ko suu teteɗna na. Asi mba nja kosi kaŋga u dlara ɦay ɦayra coraɗi, mbuɗ tasi mborɓiina vi summaɗi lay. Asi ɦal ni gaɗta jivira.

⁴ Haɗ boyogi suu gorina asi min njufuyusi u goryosiya.

⁵ Boy masina u dlaasira li tew tew u voɗosi pasiyak a asi mba li sunda hu ziisi jiviya, hum vun njufuyusiya, kay sa mba di va ma co kay Boy Lonanaɗi.

⁶ Di gorzoŋina asi mba li ɗili tew tew u voɗoɗu.

⁷ Aŋ taŋga mba li sunda jivira a suuna li ko aŋ na mayra. Col gasi ɗegee hu haɗ maŋga.

⁸ Dini boy ma ɗegeena kay sa mba tumuŋ uŋgi, ni suu babali maŋsina hin mbuɗ zolona, kay asi hin ka fi boy ma co egeyɗi.

⁹ Mborɓiina hum u maliyasina, asi mba li jivi hu tlena bel. Asi garak boy masina u asiɗi,

¹⁰ asi mbuɗ tlena vi maliyasina ki masisinaɗi. Na may asi tuɗ fok a tak tasi ki jivi ɗegee ni taki na ɗow ɗow, a geleɗ haɗta vi Lona ma suɗta mayna.

¹¹ Lona tak oo mamba kay a suɗ suuna halaŋ.

¹² Oo ndaɗta haɗay ana poyra cora u saara vi duliyara noyosi kiyo, kay ay hin poy u voɗoɗ hu ndaŋgara tani, mba fi iirira jivi ɗegee ɗili u Lona.

¹³ Ndaɗ haɗay kay ay mba kak iiri a juɓ u furira hu buu ma ay ka saa kamma. Ni hu buu ma bibiŋilla vi Lona ma ŋgolna, u Sa Suɗta Yesu Kristu hin mbana.

¹⁴ Nam ɦal tam ki ni kaygiya, a buɗuygi ki hu cora a suu mam suu pasiyakŋa mam nam dew a ay mba li ki feɗ tew tew kay li sunda jiviya.

¹⁵ Gola ni va ma aŋ haɗamma, col kam u saɓakŋa a haɗ suu ka humuŋ boy maŋŋana yalasiya. Hin sa dukusi a panaŋgi.