TITTA 1 - Boy Lonana

Gi deɓpa

¹ Ni an Pol ma sun Lona, sa vovoɗta vi Yesu Kristuna. Lona yan kay a mbaa suu nam manasi kina hu vira, kay a takasi gasi mayra viiygira haɗata,

² kay asi mba lak juɓ u hurusi tini kay iirira ka daɓ kiɗira. Lona ma bay kaboyna, vi vunum ki fok jew kay iiri ndaɗta bay lina ndak tuwa.

³ Hu li ma nam ŋgaamma ni nam tak ki u boy mamma, ni u boy mam ma nam ɦannana an mba di ki ni u min mam nam Lonara Saay ma Suɗta.

⁴ An ɓiiriŋ magaara ni maŋ aŋ Tit goron ma gasina hu tin huu ma dukuygi dewna. Ko Lona Buna u Yesu Kristu, Saay ma Suɗta ɦaŋ oora u heɓpa.

Sunda Tit ka laɗ hu Krettara

⁵ An hiniŋ hu Kret a aŋ daɓ tlesuu hiŋŋa ki u voɗosiya, aŋ tin suu neeyna fok suu vina hu ɦoŋzi ŋgolona halaŋ. Humuŋ maa kay haɗta an haɗaŋgaɗi.

⁶ Sa ma gol suu vi Kristuna nam sa ma ŋgul ka egembina, nam lini sa ma ɗum cara um dewna, goryom lini suu vina, suu hum vunna, dlara co li egesiɗi.

⁷ Sa ma fok suu vina, sun mamba ni kay li tlena vi Lona, lini nanagelay sa mba fam ŋgul egembi, nam lini sa ma bay ŋga tamma, mbuɗ ya zakgi lay, lini sa ɦal tam ki kay summaɗi, sa honiraɗi lay, ka sa ma fi gursura u ganyambaɗi lay.

⁸ Nam li sa ma min suu mba varamma jiviya, min dlara jivira lay. Lini sa ma ɗilina, sa ma ɗegeena, teteɗna, sa ma doo tamma.

⁹ Nam li ni sa ma col kay boy ma gasina, ma taɓi u haɗtana. Nam ndak a gaɗ suu hiŋŋa kay haɗta gasira, a tak cora vi suu ciwayra.

¹⁰ Suuna ka bolowo ni duk suu Juifna suu vina, col duuna ganyam suuna u boy masi ma giniŋŋa.

¹¹ Lini nanagelay ni casi vunusiya, kay asi ɓeŋ suuna ki u deeresi halaŋ, haɗasi dla mayra cora kay fi gursura u ganyamba.

¹² Sa ma Kretna u tamba saasi ma jok vun Lona di ana, «Suu Kretna tew tew ni suu kaboyna, ni suu hurusi cona ko vabakgina na, asi ni suu zolomba, saa ni kay tina doy hol.»

¹³ Va ma nam damma ni gasi. Ni kay ndaɗta yalasi eŋe kay asi mba kak u tin huu ma ɗegeena.

¹⁴ Kay asi mba njun tasi u njun njunda vi suu Juifna oloɗi, tuɗ u gaɗta vi suu hin gasira kinaɗi lay.

¹⁵ Tlesuu pasiyakŋa ni maŋ suu pasiyakŋa may, va ma ki pasiyakŋa ka li maŋ suu bay pasiyak u suu bay vinaɗi, yal masina u wiisira ki ŋgaay ana ni njenjee.

¹⁶ Asi di ana asi ni suu wi Lona, sun masira ka tak naɗi gaw may. Asi ni suu cona, duu u gasira, ndak ka a li sunda jiviɗi.