SUNDA 8 - Boy Lonana

¹ Sol vi kam a ci Etiyen kiyo. Hu buu namma ni lassa ŋgola ndi kay suu vi Kristuna hu Yerusalem. Suu vina halaŋŋi njay kiyo, hinni suu vovoɗta doy hol, asi njay ki ni hu ndaŋgara Yudera u Samari.

Sol las suu vina

² Suu vina pi Etiyen tii kam cocoo.

³ Sol so tam ana nam bulum vira vi suu vi Kristuna kiyo. Nam tuɗ ki vi suuna na dew dew halaŋ a halasira. Njufi suu vina u boyogi suu vina nam yowosi cukusi daŋgayna.

Filip di Boy ma Ayra maŋ suu samarina

⁴ Suu njay ki dew dewna di Boy ma Ayra ki ɦoŋzina zeɗ zeɗ.

⁵ Filip tuɗ hu ɦoŋzi ma ŋgolna hu Samarina di ki kay Sa Lona Fuurumma maŋ suu hu ɦoŋzi nammana.

⁶ Suu tokina halaŋ humusi tini ni kay a hum va ma Filip damma dew daŋ. Kay wi dlara mbuɗta nam ka laɗta.

⁷ Na may Filip dik fulina ki kay suu tuguɗira cocoo, fuli suu ɦiw mbuɗ sawalla ha kolo eŋga, suu gugufuna u suu dalina mbuɗ ki jiviya.

⁸ Hu ɦoŋzi ŋgol namma suuna li furira cocoo.

⁹ Sana dew sem ana Simon ka hu ɦoŋzi namma. Nammi sa li komona, mbuɗ suu samarina ndaa cocoo. Nam min ana suuna wam ana nammi sa ŋgolna,

¹⁰ Hu li namma ni gorzoŋina u suu ŋgolona halaŋ humummi boy mamma, asi di kam ana sa namma u saɓakŋa vi Lona egemu, ni ma asi yam ana saɓak may ma ŋgolnana.

¹¹ Asi hum um jew ni kay nam li dlara mbuɗta u guguni mamma ŋgolo.

¹² Asi vi u Boy ma Ayra ma Filip damma kay mulla vi Lonara ŋgolo. Suu njufina u boyogina lay fi batemma kay asi vi u sem Yesu Kristu.

¹³ Nam Simon lay ni viya fi batemma lay, nam kaki eg Filip wi dlara mbuɗta u takka Filip laɗta na ni boy namma su ki kamu.

¹⁴ Suu vovoɗta suu ha Yerusalemma hum ana suu Samarina vi u Boy ma Ayra vi Lona ni, asi cuk gi Piyer u Jaŋ egesiya.

¹⁵ Hu li ma asi mba Samarina ni asi cen Lona kay suu vina kay Musuk Lonara hin mba kasiya.

¹⁶ Kayme, Musuk Lonara bay mba kay sa dukusi tuwa, asi mbusi batemma kay sem Bu Suuna Yesu doy hol.

¹⁷ Piyer u Jaŋ baa kosi ha kasi na ni, Musuk Lonara mba kasi gaw.

¹⁸ Simon wi ana Musuk Lonara mba kay suuna u baara suu vovoɗta baa kosi kasira ni, nam ɦal gursura maŋ Piyer u Jaŋ.

¹⁹ Nam dasi ana, «Ҥangi saɓak namma an baa kon kay sawa ni sa namma fi Musuk Lonara may.»

²⁰ Piyer hoŋom dira ana, «Gursu maŋga may, aŋ taŋga may mba ba ki jak. Kay aŋ saa a gus ɦala vi Lonara u gursura.

²¹ Va ma ndoloŋ dukŋa ni mege? Boy maŋŋa ka huɗi, kay huruŋ ka tini ɗegee fok Lonaɗi.

²² Tii taŋ fok Lona kay saa maŋga co ndaɗta, cen Bu Suuna kay nam mba bulumuŋga kiyo.

²³ An waŋu huruŋ oy u cora galara. Aŋŋi mbaɓu corana.»

²⁴ Simon di Piyer u Jaŋ ana, «Cenegi Bu Suuna ay kanu, kay a boy ma agi dam wanna mba li hurun oloɗi.»

²⁵ Hu li ma asi di ki kay dlaasira dini, dasi Boy ma Ayra vi Bu Suuna suu vovoɗta suu mba' asina hoŋ Yerusalem. Ha hu voɗta wanni asi di Boy ma Ayra ki hu ɦoŋzi ma daŋŋa daŋŋa hu ndaŋgara Samari cocoo.

Filip ŋgaf u sa ŋgol ma Etiyopina

²⁶ Sa sunda vi Bu Suuna di Filip ana, «Tuɗ hu voɗta ii mbayaw tana, hu voɗta col ay Yerusalem a mbay kaŋga Gaza, voɗ ndaɗta ki ni hu fulla.»

²⁷ Filip col kolo gi tam hu voɗta wanni ŋgaf u sa ma Etiyopina hu voɗta kay tam dew, sa namma ni sa ma huɗum ki paɗina, nammi sa ma ŋgol ma gol begera vi cara mulla Etiyopira, nam ay Yerusalem a cen Lona.

²⁸ Nam hoŋ ay vora wanni ful hu pupus mamma na ni ndum magara vi sa ma jok vun Lona Ezayi.

²⁹ Musuk Lonara di Filip ana, «Ҥuɗ taŋ ha eg pupusna hu tok.»

³⁰ Filip ɦuɗ tam ha eg pupusna zakŋi, nam huma ni sa ma Etiyopina ka ndum magaara vi sa ma jok vun Lona Ezayi, Filip joɓom ana, «Na ni aŋ hum u boy ma aŋ ndumumma wan su?»

³¹ Sa namma hoŋ dira ana, «Sa haɗanna kaɗi may ni, an hin humummi nanage?» Sa namma yi Filip ana nam ful ay egem kolo hu pupusna.

³² Boy ma nam ndumum hu Boy ma Ɓiiri namma wanni namu, «Nammi ko goo timii ma sana tuɗum hu li ma ŋgaɗta na, nammi ko goo timii ma malamma cawam belesem ma tamma kira na, nam mal vunum ka kiɗi.

³³ Nam ay ɗili cocoo, sa di ka kam ana nammi sa ma ɗegeenaɗi ni. Sa ma hin di kay njafamma ni ge ologe? Kay asi daɓam iiri mamba ki hu duliyara tani.»

³⁴ Sa ŋgolna joɓ Filip ana, «Dan ay gige, sa ma jok vun Lona ɓakŋi kay gege? Kay tamba ɗowba kay sa daŋ su?»

³⁵ Filip gijaŋ ɓakŋa kay boy ma ɓiiri hu magaara namma, nam dam Boy ma Ayra ma ɓii ay kay Yesuna.

³⁶ Asi tuɗ voɗ na ni fi mbona fokosi fini sa ŋgolna di ana, «Mbona wanni, va ma dooron ana an mbus ki batemmaɗina ni me ologe?» [

³⁷ Filip dam ana, «Lini aŋ vi u huruŋ gasi ni aŋ ndak fi batemma.» Sana hoŋ dira ana, «An viya, an vi ana Yesu Kristu ni Goŋ Lonna.»]

³⁸ Nam col pupusna na gawni, asi cuk ki kaŋga ca ni, Filip mbusum batemma.

³⁹ Asi sel ay ki kolo doŋ mbona selni, Musuk Lonara tli Filip kiyo, sa ŋgolna wam ka oloɗi, nam tli voɗ mamba ay kom u furira.

⁴⁰ Filip tew ki hu mbassa Azotta, poy hu ɦoŋzi ma ŋgolona, di Boy ma Ayra gak gak nam tuɗ tew ki hu Sesare.