SUNDA 7 - Boy Lonana

Etiyen paɗ bolla

¹ Mul ŋgol ma li ɓivunna joɓ Etiyen ana, «Gasi su?»

² Etiyen hoŋ dira ana, «Gorsenna u somoyonu humugi haa, Lona ma ŋgolna tak tam ii buygi Abraham ay hu Mesopotami ni bay nam tuɗ kak hu Haran tuwa.

³ Nam dam ana hin ndaŋga maŋga u suu maŋŋa halaŋ tuɗ kak hu ndaŋgara an min takaŋ kaɗta.

⁴ Abraham hin ndaŋga mamba, Kalde, ki tani tuɗ kak hu Haran gaw, ŋgoo dagan bu Abraham hin miɗ ki miɗni Lona hin jokom ki hu ndaŋgara agi ka huruɗ cecemi wanda.

⁵ Hu li namma ni Lona ɦam va ka tuɗi, li maa na ew lay ni ɦam kaɗi. Lona vi vunum u nam ana nam hin ɦam ndaŋgara maŋ goryomu, asi hin kak ka kaɗ ŋgorom dagan lay, hu li namma ni Abraham bay vuɗ goo tu lay.

⁶ Gologiya ni va ma Lona dammana ana, Goryoŋ hin mba li ki ŋgayagina duk suuna hu ndaŋgara daŋga, asi hin mbuɗ mborɓiina, suuna hin lasasi basara kis kis fiɗi.

⁷ Lona di ana an hin kaɓakŋa kay suu asi li mbaɓura ay varasina. Asi hin cuk ki tuɗ geleɗen hu li namma.

⁸ Lona vi galamba u Abraham ɦam takka caw ɗiwra, ni kay ndaɗta Abraham vuɗ goromma. Isaak vuɗni li buuna kalavandi ni nam cawam ɗiwimu, Isaak hin caw ɗiw Yakob ni na may, Yakob hin caw ɗiw goryom suu doogo yam mbana ni na may. Ni somoyoygi aygi suu cecemmi wanna.

⁹ «Somoyoygi suu asina li honira eg Yosef, gusum ki mbaɓuna ko suu Egiptena ni Lona ka u namu.

¹⁰ Lona buɗum ay ki hu dlara loɓomba halaŋ. Nam ɦal nera maŋ Yosef mbuɗum jivi fok Faraw, mul ma Egiptena, nam kakam a mulna kay suu Egiptena, golom hu ziim halaŋŋi nam lay.

¹¹ Mayra ŋgolla ndi kay ndaŋgara Egiptera u ndaŋgara Kanaanda halaŋ. Wihawra ŋgolla ndi kay somoyoygi halaŋ, sa ka fi va ma tiɗi.

¹² Hu li na Yakob hum ana wana ka hu Egipte ni nam sun somoyoygi ha jew wanni.

¹³ Asi hoŋ haa a mbara wanni Yosef takasi ki maŋ Faraw ana ni gorsemma, nam Faraw humusi dlasi ki ana ni gorsemma daŋ may.

¹⁴ Ni Yosef hin gi sunda ha ana yowom bum Yakob ay u suu mamsina halaŋ, asi halaŋ dok kiɗisiya yam vadl.

¹⁵ Yakob tuɗ Egipte miɗ ha ni huwa, somoyoygi lay ni daɓ miɗna ha ni huwa.

¹⁶ Asi yowosi maɗasi ha hu Sekem tuɗ pasi hu zulla Abraham gusuɗ ko goryoŋ Hemornara, ni hu Sekem.

¹⁷ «Hu li ma lina ndak ndakŋi Lona a li u va ma nam vi vunum kam u Abrahamma may ni, asi suuna zul cocoo mbuɗ ŋgol hu Egipte.

¹⁸ Ŋgoo dagan mul ma ka wi Yosefɗina kak mulla kay suu Egiptena.

¹⁹ Mul namma ganyam suu maygisina lasasiya, ɦeɓesi kay a casi goryosi suu gorina kiyo.

²⁰ Hu basa ndaɗta wanni Moiz vuɗa, nammi goo ma jivi ii Lona ɦayna. Asi golom ay hu zina vi bum tilna hindi.

²¹ Hu li ma asi gam kina ni goora vi Farawra tlam tani wulum ko goroɗna na.

²² Ni Moiz haɗ wira u yalna vi suu Egiptena halaŋ, nam fi saɓakŋa hu boyna u sunda lay.»

²³ «Moiz basaɗam ndak ki dok fiɗi ni tuɗ gol gorsem suu Israelna.

²⁴ Nam fi sa ma Egiptena ka lasam wayam ma Israelna, nam njun kamu ci ma Egiptena kiyo.

²⁵ Nam saa hurum ana suu Israelna hin wi ana Lona hin buɗusi ki ni u namu, na may ni asi wi ka naɗi.

²⁶ Vinda ni suu Israelna mba' ka li tasi yara, Moiz min a vasi kiyo, nam dasi ana banayanna agi ni waya tagiɗi su? Lagi tagi na amege?

²⁷ Sa ma ka las ndarammana hoŋom dira ana sa ma kakaŋ a mulna a kaami ɓakŋa kamina ni gege?

²⁸ Aŋ min can ki ko aŋ ci ma Egiptena ki kaara na may su?

²⁹ Hu li ma Moiz hum boy namma na ni nam pii ki tuɗ hu ndaŋgara Madiyanda. Ay hu li namma nam vuɗ gor njufina mba'.

³⁰ «Ŋgoo dagan basara dok fiɗi nam kal ki ŋgoo bagi tok eg ɦinira Sinayra. Sa sunda huulona tak tam ki irim duk kura ŋgal hum guna.

³¹ Moiz wi va ma tak tam irim namma na ni nam viɗ ki na viɗ. Nam ɦuɗ tam ha eg va namma tok a golomba may ni nam huma ni del Bu Suuna dam ay anaba,

³² Anni Lona vi somoyoŋu, Lona vi Abraham, Lona vi Isaak, Lona vi Yakob. Moiz mbuɗ dlak ko ndaana, ka a gol irim ki oloɗi.

³³ Bu Suuna dam ana fok tuɓuru ma seŋŋa kiyo, li ma aŋ coli huna ni ndaŋga mayra teteɗta.

³⁴ An wi lassa vi suu manna hu Egiptera wa, an humusi yoo masira wa, an mba ni kay a buɗusi kiyo. Mbaya an min sunuŋ ha Egipte.

³⁵ «Ni nam Moiz ma suu Israelna noyom ay kina ana, sa ma kakaŋ kami a mulna a kaami ɓakŋa kamina ni gegena. Lona hin sunum a mul ma buɗusi kina ni namu. U saɓakŋa vi sa sunda huulona ma tak tam irim duk kurana.

³⁶ Moiz cuk suu Israelna ay ki hu Egipte ni namu. U lira nam li dlara mbuɗta u takka hu ndaŋga ndaɗta, duk mbo Lum ma Cerewna, ŋgoo bagi basara dok fiɗi.

³⁷ Moiz di maŋ suu Israelna olo ana, Lona hin sunugi sa ma jokom vunumma ko an na aya, sa namma hin lini sa ma hu njafagina.

³⁸ Nammi sa ma duk suu Israelna ay toki ŋgoo bagina. Nammi sa ma ay ko tam u somoyoygi lay, ay ko tam u sa sunda huulona ɓakam kay ɦinira Sinayra lay. Nam fi boy ma iirina ay fun Lona ni maygi aygi a jokom kira may.

³⁹ «Somoyoygi min ka humum boy mammaɗi, noyom ha kiyo min ana asi hoŋ hu Egipte.

⁴⁰ Asi di Aaron ana minimi lo ma poy fokomiya, ami ka wi li ma Moiz cukumi ay ki Egipte hin kal hunaɗi.

⁴¹ Asi min mbutlna gijaŋ li ɓivunna fokommi na gaw. Asi furi kay va ma asi minim u tasirana lay.

⁴² Lona pereɗ irim ki egesi hinisi tani, asi gijaŋ goɓ kaŋga fok tlesuu kolo huulona, ko boy ma ɓiiri hu magaara vi suu jok vun Lona. Agi suu Israelna agi ŋgaɗagi yoorina, u tlesuu ɓivun suu daŋŋa hu basara dok fiɗi ay ŋgoo bagi ni man su?

⁴³ Ҥawaa ka manɗi agi ziirigi gu mbutluɓma vi loogina Molokŋa, u va ma tli tam ko ciciwra nana vi loogina Refanna, Ca ni tlesuu agi lasi a goɓ kaŋga fokosina. Ni kay ndaɗta an hin tuɗugi ha na day su Babilon.

⁴⁴ «Ŋgoo bagi ni somoyoygi min mbutluɓma kay magaara gaɗta, ɓiiri kay ɦinira nam mini ko Lona di maŋ Moizza na may, nam di Moiz ana nam zul u ma daŋ ha ko ma nam wamma na.

⁴⁵ Mbutluɓ namma jok ha vi somoyoygi suu ay ŋgoo daganna ni namu. Hu li ma Josuwe varak fok suunana Lona dik suu daŋŋa ki kay ndaŋga masira, asi jok usi ni u mbutluɓma usiya. Nam tuɗ na gak gak tew hu cokira David varaka.

⁴⁶ Nam David fi jivira fok Lona fi ni, joɓom ana nam ɦam voɗta nam min zina kay Lona vi Yakob.

⁴⁷ Nam joɓ mam na lay ni, Salomon hin min zi ndaɗta ni namu.

⁴⁸ «Lona ma kolo dayna ka kak hu zi ma suuna minim u kosinaɗi, ko sa ma jok vun Lona dira na.

⁴⁹ Bu Suuna di ana li ma kolo huulona ni dlam manda kakŋa, ndaŋgara ni va ma an tin sen kamma. Zi ma agi min a mininna kanna ni mege? Li ma an ndak a koɗ tan huna ni arage?

⁵⁰ An li tlena halaŋŋi ka anɗi su?

⁵¹ «Agi suu yagi kaɗina, njun hurugiya, ŋgel humugi ki kay yira vi Lona. Tew tew ni agi ka hum vun Musuk Lonaraɗi, ko somoyogi na may.

⁵² Suu jok vun Lona suu somoyogi lasasi kaɗina ni suurage? Asi ci suu di ki kay mbara vi sa ma Ɗegeena kiyo, Cecemi nam ma agi di kolokŋa kam cam kina,

⁵³ agi ni suu fi gaɗta vi Lona ay fun suu sunda huulona, ni agi hum ka u gaɗ ndaɗtaɗi lay.»

Miɗ ma Etiyen miɗna

⁵⁴ Suu ŋgolona hum boy namma na ni hurusi ɓeŋ ki cocoo gijaŋ muɗ siisi na ŋgirit ŋgirit u yara eg Etiyen.

⁵⁵ Nam hurum oyra u Musuk Lonara gol irim kolo huulona wi ŋgolla vi Lonara u Yesu coli bik ko Lona ma njufna.

⁵⁶ Nam di ana, «Humugiya, an wi huulona ki maliya, Goŋ Sanna coli kay bik ko Lona ma njufna.»

⁵⁷ Asi tum soora na ŋguk ŋguk ŋgel humusi ki kay boy namma, asi ɓaɗ tasi ha kam na zak zak u dlaasira halaŋ halaŋga.

⁵⁸ Asi taɗam ha ki butuɗ butuɗ tuɗum ha ki doŋ kaana, gikim u gogoyra a cam kira. Suu laki wi dla ndaɗta u irisina hin baraw masina ka ko goozoŋŋa dew sem ana Sol.

⁵⁹ Asi gikim u gogoyra na ni Etiyen cen Lona ana, «Bu Suuna Yesu van ŋgus manda ha koŋu.»

⁶⁰ Nam goɓ kaŋga u vun givim sawalla kolo eŋga ana, «Bu Suuna ŋgaasi co ndaɗta kasiɗi,» vunum ndi kaŋga may ni miɗ ni na gaw.