SUNDA 6 - Boy Lonana

Man suuna kiɗisiya a njun u suu vovoɗta

¹ Fali ndaɗta ndum suu haɗina zul fok ŋgolo, suu Juif suu ɓak vun grekŋa yoo tasi eg suu Juif suu vo hu mbassasina. Kay ana asi ɓorow tlena maŋ boyogi suu donona wanni ka ɦal maŋ masisinaɗi.

² Suu vovoɗta suu doogo yam mbana tok suu haɗi suu hiŋŋa halaŋ halaŋ dasi ana, «Ami hin dira di Boy Lonana ki ta kay a ɓorow tlesuu tira ni ka jiviɗi.

³ Ni kay ndaɗta gorsenna, managi suu dukugi kiɗisiya suu ŋgul ka egesiɗina, suu hurusi oy u Musuk Lonara, suu neeyna, ni ami hin hinisi kay sun ndaɗta.

⁴ Ami hin hin tami ni kay dira di Boy Lonana kira, u cenda cen Lona may.»

⁵ Suu tokina halaŋ hurusi vi boy namma. Asi man Etiyen sa ma hurum oy u Musuk Lonara ma hurum tini kay Yesu ɦayna, u Filip, Prokor, Nikanor, Timon, Parmenas, u Nikolas, nammi sa ma Antiok ma tin hurum kay vira vi suu Juifna jewna.

⁶ Asi mbaarasi fok suu vovoɗta cen Lona, baa kosi kasiya.

⁷ Boy Lonana zul ha ki fok zuli na ɗow ɗow. Suu haɗina zul hu Yerusalem cocoo, suu li ɓivunna ŋgolo tin hurusi kay Yesu.

Vira suuna vi Etiyenda

⁸ Etiyen ni sa ma Lona paɗ vunum ki kamma. Nam oyra u saɓakŋa kay paɗvunna vi Lona, nam li dlara mbuɗta u takka ŋgolora duk suuna.

⁹ Duk suu sunda hu Zira Tokka suu ɦiw hurusi vam dlaamba kaɗi, asi ni suu li ay mbaɓura fi buɗta kina. Asi ni suu hum vun Juifna u Sirennana u Aleksandrina, suu Juif suu ha Silisina u suu Asina. Suu asina gijaŋ ciwayra ko tasi u Etiyen.

¹⁰ Asi ndak ka a su kam u boyɗi, kay nam ɓakŋi u nera Musuk Lonara ɦambara.

¹¹ Asi ɦal gursura maŋ suuna ana asi di ana asi fam nam ŋgul Moiz may, ŋgul Lona may.

¹² Asi njay hu suuna ki egem halaŋ, asi tok suu ŋgolona u suu wi magaara gaɗta halaŋ kamu. Asi mba vi Etiyen vini tuɗum fok suu ŋgolo suu kaɓakŋa.

¹³ Asi tok suu kaboyna kamma ay lay, suu asina di ana, «Sana wanni ka hin ŋgulla ŋgul zira teteɗta vi Lonara u gaɗta vi Moizza kiɗi.

¹⁴ Ami fam nam di ana Yesu ma Nazaretna hin ɓeŋ Ziŋ Lonara kiyo, hin mbuɗ dlara Moiz haɗaygira ki zeɗ lay.»

¹⁵ Suu toki hu zira vi suu ŋgolo suu kaɓakŋa halaŋŋi ŋgaras irisi kay Etiyen na ŋgaras, asi golom vokom ko vok sa sunda huulona na.