SUNDA 5 - Boy Lonana

Ana nias u Safira

¹ Sana dew sem ana Ana nias sem caamba ana Safira, asi gus sene masina kiyo.

² Nam Ana nias yow gursu maa kom ɦiw tuɗ ɦam maŋ suu vovoɗta, ni caamba wi dla ndaɗta lay.

³ Piyer joɓom ana, «Ana nias aŋ hin Satanna a kal huruŋ a ganaŋ yaŋ a kaboyna eg Musuk Lonara ni nanage? Gursura aŋ gus senena ay kira aŋ hiniɗ ki koŋ amege?

⁴ Jew bay aŋ gusum ki ni senena ni ka maŋŋaɗi su? Aŋ gusum ki gusni gursura ni ka maŋga layɗi su? Aŋ hin saa a li dla ndaɗta na ni amege? Aŋ kaboyna ni ka eg saɗi ni eg Lona.»

⁵ Ana nias hum boy namma na ni ndi kaŋga miɗ gaw. Suu hum dla ndaɗta na mbuɗ ki ndaana na halaŋ halaŋ.

⁶ Gorzoŋina mbay ganam u barawna gan ni tlam pammi na gaw.

⁷ Ŋgoo dagan kaki va ma ler hindi ni caamba mbay may wi va ma li kaki fokoɗ jewna kaɗi.

⁸ Piyer joɓoɗ ana, «Dan aya, ni gursura agi gus sene magina ay kira su?» Ndaɗ hoŋom dira ana, «Ni ndaɗu.»

⁹ Piyer daɗ ana, «Agi vagi vunugi a tuk Musukka vi Bu Suuna na ni amege? Ndak huma suu may suu ay pak njufukŋa mba wa fun zira tok, asi hin pak ndak may.»

¹⁰ Vunum ndi kaŋga may ni ndaɗ ndi kaŋga fokom na ni miɗ gaw. Gorzoŋina cuk ay may ni mba faɗ miɗi gaw, asi tlaɗ tuɗ paɗ eg njufuɗu.

¹¹ Suu vina u suu hum boy namma halaŋŋi mbuɗ ndaana ɦay.

Njaf dlara mbuɗta zeɗ zeɗ

¹² Suu vovoɗta li dlara mbuɗta u takka duk suuna zeɗ zeɗ ŋgolo. Suu vina tok tasi halaŋ u mbutluɓma vi Salomon.

¹³ Sa ma daŋ ma ndak taɓ u asi kaɗi, na lay ni suuna geleɗesi ŋgolo.

¹⁴ Njufina u boyogina vi u Bu Suuna ŋgolo cuk duk suu jewna.

¹⁵ Suuna gijaŋ yow suu tuguɗira ay hu voɗta Piyer tli hura, asi cukusi kay layna u gi dlaɗta kay ana hu li ma Piyer hin mba jak huna ni ŋgusum hin mba kuluɓ kay suu dukusiya.

¹⁶ Ҥoŋzina ŋgolo ma ŋguy kay Yerusalemma lay halaŋ tok ay huwa. Asi yow suu tuguɗira suu fulina kasina lay, halaŋ mbuɗ ki jiviya.

Suuna las suu vovoɗta

¹⁷ Mul ŋgol ma li ɓivunna u suu mamma, u suu Sadusenna halaŋ li honira maŋ suu vovoɗta a yowosiya.

¹⁸ Asi yowosi yowni cukusi daŋgayna.

¹⁹ Duk njeŋgera wanni sa sunda huulona vi Bu Suuna mba mal vun zira daŋgayna ki malni cuk suu vovoɗta kiyo dasi ana,

²⁰ «Tuɗugi hu Ziŋ Lonara dagi boyna maŋ suuna kay iirira wilira.»

²¹ Suu vovoɗta hum boy namma hummi tuɗ maɗii feɗet hu Ziŋ Lonara a haɗ suuna. Mul ŋgol ma ɓivunna u suu mam suu Juifna tok tasi halaŋ a li tokka vi suu ŋgolo suu kaɓakŋana. Asi gi sunda ana yow suu vovoɗta ay hu daŋgayna.

²² Asgaa suu golosina tuɗ ha ni fasi ka hu zira daŋgaynaɗi, asi hoŋ ay eg suu ŋgolona mba cuɗusi boy namma.

²³ «Ami fami vun zira dugiya, asgaa suu golosina laki funuɗ ca may. Ami mal vun zira kiyo ni fi sa ka kalafi dewɗi.»

²⁴ Hu li ma sa ŋgolna vi asgaa suu gol vun zira, u sa ŋgolna vi muli suu li ɓivunna hum boy namma na ni, li ma suu vovoɗta cuk ki huna, saa ndaɗta viɗ ki irisiya, asi joɓ tasi ɗaŋŋi ana, boy namma hin lini ana mege?

²⁵ Asi gol irisiya ni sana dew mba dasi ana, «Suu agi cukusi daŋgayna na ha hu Ziŋ Lonara haɗ suuna.»

²⁶ Sa ŋgolna vi suu asgaana tuɗ u suu mamma yow suu vovoɗta aya. Asi tuɗ ay u asi ni u lalamba kay asi li ndaana ko suuna ana asi hin gikisi u gogoyra kalage.

²⁷ Asi mbay u asi mba ni gijaŋ joɓosi fok suu ŋgolo suu kaɓakŋana.

²⁸ Nam dasi ana, «Ami doorogi ana agi haɗ sa kay sem sa namma oloɗi naɗi su? Agi hin haɗ ndaa ndaa njay boy magina ki hu ɦoŋzi ma Yerusalemma na halaŋ halaŋ. Agi min a mbaa maɗ sa namma ki kami su?»

²⁹ Piyer u suu vovoɗta hoŋosi dira ana, «Lini nanagelay ami hum vun Lona ni su suuna.

³⁰ Yesu ma agi cam ki ɓalam ki hu gu garakŋa Lona vi somoyoygi colom ki kolo iiri ni namu.

³¹ Lona tlam kakam kay bikim ma njufna tinim a mulna, a Sa Suɗta a ɦal voɗta maŋ suu Israelna asi jok iiri masira ki zeɗ, a Lona hin bulumusi coosira kiyo.

³² Ami ni suu diki kay dla ndaɗta, ami may, Musuk Lonara nam haɗ maŋ suu may suu hum umma may.»

³³ Suu ŋgolona hum boy namma na ni hurusi ɓeŋ egesiya, hal a ci suu vovoɗta kiyo.

³⁴ Sa ma Farisenna ay dukusi dew sem ana Gamaliyel, nammi sa ŋgol ma haɗ gaɗta, ma suuna halaŋ hum umma. Nam col kolo duk suu ŋgolo suu kaɓaŋana dasi ana, asi cuk suu vovoɗta ki bunsu nde.

³⁵ Nam di suu tokina ana, «Agi suu Israelna, gologi tagi jivi kay va ma agi lam eg suuna wanni.

³⁶ Sana dew sem ana Tewdas dlaamba li ay ka ni dayɗi tuwa, nam tii sem tam ana nammi sa ŋgolna, suu vi u dlaambana kis kis fiɗi. Suuna hin cam ki ni ciya, suu vi umma halaŋ mbee kiyo, dlaam ndaɗta bulum ki ni na gaw may.

³⁷ Ŋgorom daganni hu falira ndum suuna ni Yudas ma Galilena yow suuna um ŋgol olo, suuna hin cam ki ni ci olo, suu umma halaŋ mbee kiyo.

³⁸ Cecemi an dagiya loɓogi tagi u suu asina oloɗi, hinisi tuɗa. Lini boy masina ni dlara vi suuna ɦawaa, nam hin daɓ ki ni ɦawaa.

³⁹ Lini sun masira mbay gasi ni vi Lona ni, agi ka ndak a ɓeŋeɗ kiɗi. Gologi tagi jiviya lagi ko agi ni suu duu u Lonna naɗi.» Suu tokina vi u boyna vi Gamaliyel.

⁴⁰ Asi yi suu vovoɗta ay yi ni poŋosi poŋ poŋŋi hinisi asi tuɗa, dasi ana tuɗ dagi boy kay sem Yesu oloɗi kama. Hinisi tani cuk tasi ni na gaw.

⁴¹ Suu vovoɗta cuk ki hin suu ŋgolo suu kaɓakŋana ka tani, tuɗ ni u furira kay Lona wasi asi ndaki a li lassa u ŋgulla kay sem Yesu.

⁴² Hu buuna halaŋ asi haɗ suuna hu Ziŋ Lonara voo hu ziisi lay. Asi di Boy ma Ayra maŋ suuna kay Yesu ni Sa Lona Fuurumma.