SUNDA 4 - Boy Lonana

Piyer u Jaŋ fok suu ŋgolo suu kaɓakŋa

¹ Piyer u Jaŋ ɓak suuna wanni, muli suu li ɓivunna suu ŋgolo suu hu Ziŋ Lonara u suu Sadusenna mba fasiya.

² Hu li ma asi hum suu vovoɗta ka haɗ suuna ana Yesu paɗ ki kolo iiriya ni, di ana suu miɗina paɗ ki kolo iiriya ni, asi hurusi ɓeŋ egesi gaw.

³ Asi yowosi cukusi daŋgayna a juɓ buu ma vinna tuwa, kay lina kal ki wa.

⁴ Fali ndaɗta ni suu hum boy nammana ŋgolo tin hurusi kay Yesu. Suu vina zul ŋgolo ii va ma bup bup vadl.

⁵ Vin maɗiira wanni muli suu vi suu Juifna u suu ŋgolo suu wi magaara gaɗta tok tasi ha Yerusalem.

⁶ Hu li namma ni Aan, mul ŋgol ma li ɓivunna, u Kaif u Jaŋ u Aleksandre, asi suu hu njafna vi mul ŋgol ma li ɓivunna tok tasiya.

⁷ Asi yow suu vovoɗta fokosi joɓosi ana, «Agi mbuɗ sana ki jivira na ni u sem gege? U saɓak vi gege?»

⁸ Piyer hurum oyra u Musuk Lonara dasi ana, «Agi mulina u suu ŋgolona,

⁹ ami ka karam fun ɓakŋa ni kay sa ma dagi ma mbuɗ ki jivina, asi ka joɓomi kam ana sana mbuɗ ki jivira ni nanage?

¹⁰ Agi halaŋ wagiya suu Israelna halaŋ wagi kiyo, sa namma ka coli dukugi wanni u saɓakŋa vi sem Yesu Kristu ma Nazaretna, nam ma agi ɓalam ki kolo hu gu garakŋa, Lona colom ki kolo iirina.

¹¹ Yesu ni sa ma magaara di kam ana, Ҥinira agi suu min zira noyoɗ kira mbuɗ a ɦinira garaŋga ni ndaɗu.

¹² Nam dew daŋŋi Sa ma Suɗta, hu duliyara halaŋŋi Lona ɦal sem sa ma daŋ ma suɗuygi kaɗi.»

¹³ Suu ŋgolona wi ɦiŋga vi Piyer u Jaŋ na ni asi mbuɗ lakira na jim, asi wi kasi ana asi ni suu ɦawana, haɗ magaara ka ŋgolɗi lay, asi hin wi kasi na daŋŋi, ana asi ni suu poy u Yesu jewna.

¹⁴ Asi gol irisi na ni wi sa ma garaɗ ki namma coli egesi zow ni asi ka fi va ma diɗi.

¹⁵ Asi cukusi ki buru hin lina vi suu ŋgolo suu kaɓakŋa ki tani gijaŋ ciwayra duk tasiya.

¹⁶ «Suu asina aygi mba li me u asi nige? Suu hu Yerusalemma halaŋ wi dlara mbuɗta asi laɗta ki u irisiya, aygi ka ndak a doorosi oloɗi may.

¹⁷ A boy namma zul ki duk suuna oloɗira wanni, lasasi las lasni dasi ana asi di boy namma maŋ sa ma daŋ u sem Yesu oloɗi.»

¹⁸ Asi yasi ay yini gaɗasi ana, asi di boy namma ki oloɗi, haɗ sa u sem Yesu oloɗi lay a fafatɗa.

¹⁹ Piyer u Jaŋ hoŋosi dira ana, «Agi saa u tagira tu gige, lini jivi fok Lona a humugi vunugi suumu ni.

²⁰ Ami tamira ka ndak a tin vunumi kay va ma ami wam u irimi lay, humum u humumi laynaɗi.»

²¹ Suu ŋgolona hoŋ lasasi las lasni cukusiya, asi fi boy may ma cukusi daŋgayna kamma kaɗi, kay suuna halaŋ geleɗ Lona kay boy ma li namma.

²² Sa ma garaɗ ki namma basaɗam su va ma dok fiɗi.

Suu vina cen Lona a nam ɦasi ɦiŋga

²³ Hu li ma asi cukusi kina ni, Piyer u Jaŋ tuɗ eg ndarayasina dasi boy ma muli suu li ɓivunna u suu ŋgolona dasina ayna.

²⁴ Asi hum boy namma na ni suu vina halaŋ gijaŋ cen Lona ko tasi dew ana, «Mala Suuna aŋŋi sa ma li huulona lay, li ndaŋgara lay, li mbo lumma ŋgolona u tlesuu hurumma layna.

²⁵ Aŋŋi sa ma di fun bumi David saaŋ ma sunda hu Musuk Lonara ana, Suuna yow kolo ŋga tasi na ni kay mege? Suuna saa saara dadamba na ni kay mege.

²⁶ Muli suu ŋgolo suu kay ndaŋgarana halaŋ col duuna, suu mulina halaŋ tok tasiya duu u Bu Suuna u Saam ma Suɗta lay.

²⁷ Herod u Pilat taɓ vunusi u suu hu ɦoŋzi ma ŋgolna u suu daŋŋa, u suu hu njafna vi suu Israelna halaŋ duu saaŋ ma sunda Yesu ma aŋ manamma ni gasi.

²⁸ Asi li dlara aŋ u saɓak maŋŋa u min maŋga saa ki kaɗ jew a laɗta ki wa.

²⁹ Cecemi Bu Suuna wi lassa vi suu maŋŋa, ɦasi eŋga a di boy maŋŋa ki u ɦiŋga.

³⁰ Maɗ koŋ ki kay ami li dlara mbuɗ mbuɗta, garaɗ suu tuguɗira kiyo, li takka u sem saaŋ ma sunda Yesu ma teteɗna.»

³¹ Asi daɓ cenda may ni li ma asi laki huna geŋeɗ na jik jik. Asi oy ki u Musuk Lonara gijaŋ ɓak Boy Lonana u ɦiŋga.

Suu vina taɓ tlegeyesi ki ko tasi dew

³² Suu vina tok tasi halaŋ, hurusi taɓi dew, saa masira dew, sa ma dukusi ma di ana vaamma ni kay tamu kaɗi, tlegeyesi halaŋ taɓi dew.

³³ Suu vovoɗta fi saɓakŋa a di boyna kay paɗta kolora vi Bu Suuna Yesu, Lona paɗ vunum ki kay dlaasira asi laɗta halaŋ.

³⁴ Dukusi wanni sa haw va cam kaɗi. Suu senena u ziginina kosina gususi kiyo, mbaa gursu ndaɗta aya,

³⁵ mba ɦal gursu ndaɗta maŋ suu vovoɗta. Asi ɓorow gursu ndaɗta maŋ suuna u va ma asi min a lamma.

³⁶ Ko Yosef ma Levina nammi goo ma Siprena, suu vovoɗta tinim sem ana Barnabas (ni di ana sa ma gaɗ suuna),

³⁷ nam gus sene mamma ay kiyo mbaa gursura fok suu vovoɗta.